Գրադարան
Մենինգիոմա. բուժում
3 րոպե
Որպես դանդաղ աճող նորագոյացություն, մենինգիոման հաճախ որևէ բուժում չի պահանջում և բժիշկը կարող է խորհուրդ տալ երկարատև վերահսկողություն:
Ընդհանուր առմամբ, եթե ունեք մենինգիոմա, ձեզ առաջարկվող բուժումը կախված է բազմաթիվ գործոններից, այդ թվում՝
- ուռուցքի չափս և տեղակայում
- ուռուցքի աճի արագություն կամ այսպես կոչված «ագրեսիվություն»
- տարիք և ընդհանուր առողջական վիճակ
- բուժման նպատակներ:
Սպասողական մոտեցում
Մենինգիոմայով ոչ բոլոր մարդկանց է անհրաժեշտ անհապաղ սկսել որևէ բուժում: Փոքր և դանդաղ աճող մենինգիոմաները, որոնք որևէ գանգատ կամ ախտանիշ չեն պատճառում, գուցե բուժման կարիք չունենան:
Եթե որոշվում է, որ բուժման անհրաժեշտություն չկա, բժիշկը հավանաբար ձեզ կառաջարկի, որ պարբերաբար այցելեք նրան և անցնեք պատկերային և այլ հետազոտություններ:
Այունամենայնիվ, եթե բժիշկը հերթական ստուգումից հետո կարծում է, որ եկել է մենինգիոման բուժելու ժամանակը (օրինակ՝ սկսել են զարգանալ բարդություններ), կարող է ձեզ առաջարկել մի բուժման մի քանի տարբերակներ:
Վիրահատություն
Եթե մենինգիոման առաջացնում է կայուն կամ ժամանակի ընթացքում վատթարացող գանգատներ և ախտանիշներ, ձեր բժիշկը կարող է առաջարկել վիրահատական բուժում:
Վիրահատությունը համարվում է լիարժեք հաջողված, եթե տեխնիկապես հնարավոր է մենինգիոման հեռացնել ամբողջապես: Սակայն, երբեմն նորագոյացությունը կարող է աճել գլխուղեղի կենսականորեն կարևոր կառուցվածներին կիպ հարևանությամբ, և հնարավոր չլինի իրականացնել վիրահատություն կամ ուռուցքը հեռացնել ամբողջապես:
Վիրահատությունից հետո անհրաժեշտ բուժման տեսակը, եթե անհրաժեշտությունը կա, կախված է մի քանի գործոններից:
- Եթե հաջողվում է մենինգիոման հեռացնել ամբողջապես, որևէ հետագա բուժման անհրաժեշտություն կարող է և չլինել:
- Եթե ուռուցքը բարորակ է և վիրահատությունից հետո մնում է դրա միայն փոքր մասը, ձեև բժիշկը կարող է խորհուրդ տալ պարբերաբար հետազոտություններ կամ ավելացնել ստերեոտաքսիկ ճառագայթային թերապիա:
- Եթե ուռուցքն ատիպիկ կամ չարորակ է, դուք հավանաբար ճառագայթային թերապիայի կարիք ունեք:
Մենինգիոմայի վիրահատությունը պարունակում է ռիսկեր, այդ թվում՝ վարակում և արյունահոսություն: Այլ հնարավոր ռիսկերը կախված են մենինգիոմայի տեղակայումից: Օրինակ, տեսողական նյարդը շրջապատող մենինգիոմայի հեռացումը կարող է բերել տեսողության կորստի: Զրուցեք ձեր բժշկի ու վիրաբույժի հետ մենինգիոմայի վիրահատական բուժման հետ կապված ռիսկերի թեմայով:
Ճառագայթային թերապիա
Եթե վիրահատությամբ չի հաջողվում մենինգիոման ամբողջապես հեռացնել, ձեր բժիշկը կարող է առաջարկել ճառագայթային թերապիա՝ որպես վիրահատությանը փոխարինող կամ հաջորդող տարբերակ:
Ճառագայթային թերապիայի նպատակը մնացորդային մինինգիոմային բջիջները ոչնչացնելն է և դրա կրկնվելու հավանականությունը կրճատելը: Նման բուժման համար օգտագործվում է ուռուցքային օջախին ուղղված ճառագայթներ:
Ճառագայթային թերապիայի ներկա արդիականացումը թույլ է տալիս հնարավորինս մեծացնել ուռուցքային բջիջների վրա ճառագայթների ոչնչացնող ազդեցությունը՝ միաժամանակ թուլացնելով առողջ հյուսվածքների վրա նույն ազդեցության ուժը:
Դեղամիջոցներ
Մենինգիոմայի դեղորայքային բուժումը (քիմիոթերապիա) հազվադեպ է կիրառվում: Ձեր բժիշկը կարող է նշանակել դեղեր, եթե վիրահատության կամ ճառագայթային թերապիայի արդյունքները գոհացուցիչ չեն:
Այս պահին գոյություն չունի մենինգիոմայի քիմոթերապևտիկ բուժման որևէ լիարժեք ընդունելի սխեմա, սակայն գիտնականներն ինտենսիվորեն ուսումնասիրում են թիրախային մոտեցումները:
Հոդվածը տեղադրվել է՝ 08-02-2021 վերանայվել է՝ 17-04-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
