Դաշտանադադար. դեղեր

Դաշտանադադար. դեղեր

Դաշտանադադարը բնական երևույթ է, որին պետք է պատրաստ լինեն բոլոր կանայք։

Այն սկսվում է, երբ կնոջ վերարտադրողական հորմոնների հավասարակշռությունը խախտվում է և ձվարաններում այլևս չեն առաջանում ձվաբջիջներ (այլ կերպ ասած՝ դադարում է ձվազատումը կամ օվուլյացիան)։

Դաշտանադադարը սովորաբար տեղի է ունենում 45-55 տարեկանում և կարող է ուղեկցվել այնպիսի գանգատներով և նշաններով, որոնք խանգարեն ձեր առօրյա կյանքը։ Ներկայացվող տեղեկատվությունը կօգնի ձեզ հասկանալու, թե ինչպես կարելի է բժշկի նշանակած դեղամիջոցների օգնությամբ մեղմացնել դաշտանադադարին ուղեկցող անցանկալի երևույթները։

Դաշտանադադարը հայտնի է նաև որպես «կլիմաքս» կամ «կյանքի փոփոխություն»։ Այն զարգանում է, երբ ձեր ձվարանները սկսում են արտադրել ավելի քիչ էստրոգեն և պրոգեստերոն, որին էլ հաջորդում է ձեր դաշտանների դադարումը։

Ընդհանուր առմամբ, դաշտանադադարի բուժումը կախված է ձեր գանգատներից և կարող է ներառել՝

  • ապրելակերպի փոփոխություններ (օրինակ՝ ազատ հագուստ, եթե առատացած քրտնարտադրությունը դարձել է խնդիր, սթրեսը մեղմացնող միջոցներ, ֆիզիկական ակտիվության ավելացում, սուրճի և կոֆեին պարունակող ըմպելիքների սահմանափակում և այլն)
  • առանց դեղատոմսի վաճառվող դեղեր
  • բժշկի կողմից նշանակված և դեղատոմսով դուրս գրվող դեղեր։

Դաշտանադադարի դեղերի տեսակները

Հորմոնային փոխարինող բուժում

Հորմոնային փոխարինող բուժումը (ՀՓԲ) դաշտանադադարի ախտանիշների դեմ ամենահաճախ նշանակվող տարբերակն է։ Բուժման այս մեթոդի էությունը ձեր օրգանիզմում նվազած էստրոգեն (և երբեմն՝ պրոգեստերոն) հորմոնն արտաքին ճանապարհով ստացվող դեղերով փոխարինելն է։

Տիբոլոն (Լիվիալ)

Սա սինթետիկ (արհեստական ճանապարհով ստացված) հորմոն է, որն իր ազդեցությամբ նման է էստրոգենին, պրոգեստերոնին և տեստոստերոնին։

Հակադեպրեսանտներ

Հակադեպրեսանտներ կարող են նշանակվել՝ մեղմացնելու դաշտանադադարին բնորոշ ջերմահորդանքները, օրինակ, այն դեպքերում, երբ դուք չեք ցանկանում կամ չեք կարող ընդունել ՀՓԲ։

Իմացե՛ք ավելին դաշտանադադարի ախտանիշների բուժման մեթոդների մասին:

Դաշտանադադարի դեղերի վերաբերյալ կարևոր տեղեկատվություն

Բոլոր դեղերն էլ ունեն կողմնակի ազդեցություններ։ Դաշտանադադարի գանգատները մեղմացնող դեղերի մեծ մասի առաջացրած անցանկալի ազդեցություններն, այնուամենայնիվ, լուրջ բնույթ չեն ստանում։

Վերջին տարիների ընթացքում կուտակված տվյալները վկայում են այն մասին, որ առողջ կանանց համար ՀՓԲ-ը կարելի է համարել բավարար արդյունավետ և անվտանգ։

Սակայն, ավելի վաղ իրականացված մի հետազոտությամբ ցույց էր տրվել, որ ՀՓԲ կարող է որոշ կանանց մոտ քիչ բարձրացնել քաղցկեղի որոշ տեսակների, թրոմբոզների (ստորին վերջույթների կամ թոքերի անոթներում մակարդուկների առաջացում) և ինսուլտի ռիսկը։ Այնուամենայնիվ, ամենավերջին հետազոտությունների արդյունքների հիման վրա բազմաթիվ փորձագետներ կասկածի տակ են դրել այս հետազոտության արդյունքների կարևորությունը և խորհուրդ են տալիս ՀՓԲ նշանակել բոլոր այն դեպքերում, երբ դաշտանադարն ուղեկցվում է կնոջ առօրյա և աշխատանքային կյանքը խաթարող գանգատներով։

Բոլոր դեպքերում, մինչև դաշտանադադարի դեղերն ընդունելը, զրուցեք ձեր բժշկի հետ հետևյալ թեմաներով՝

  • դեղի կողմնակի ազդեցություններ
  • դեղի օգուտներ
  • ինչ կլինի և ինչ անել, եթե դուք բաց թողնեք հերթական դեղաչափը
  • ինչ անել, եթե զգաք դեղի կողմնակի ազդեցություններ։

Հիշեք նաև, որ ձեզ նշանակած դեղերի ընդունումն ինքնուրույն դադարեցնելուց առաջ արժի այդ մասին զրուցել ձեր բժշկի հետ։

Հոդվածը վերանայվել է՝ 20-04-2021