Գրադարան

Դաշտանադադար. բուժում

Դաշտանադադար. բուժում

Time Read 2 րոպե

Դաշտանադադարը ​դեղորայքային բուժում չի պահանջում։

Դրա փոխարեն, բուժումները կենտրոնանում են ձեր գանգատներն ու ախտանիշները թեթևացնելու և տարիքի մեծացմամբ պայմանավորված քրոնիկ հիվանդությունների կանխարգելման կամ կառավարման վրա:

Բուժումները կարող են ներառել հետևյալը:

  • Հորմոնային բուժում. Էստրոգենային բուժումը դաշտանադադարային ջերմահորդանքների թեթևացման ամենաարդյունավետ բուժման տարբերակն է: Կախված ձեր անձնական և ընտանեկան հիվանդության պատմությունից՝ ձեր բժիշկը կարող է առաջարկել Էստրոգենի ամենացածր դեղաչափերը ամենակարճ ժամանակահատվածի համար, որն անհրաժեշտ է ձեզ ախտանշանները թեթևացնելու համար: Եթե ձեր արգանդը պահպանված է (վիրահատությամբ հեռացված չէ), բացի Էստրոգենից, ձեզ անհրաժեշտ կլինի նաև Պրոգեստին: Էստրոգենը նաև օգնում է ոսկրային հյուսվածքի կորստի կանխմանը՝ օստեոպորոզի կանխարգելմանը: Երկարաժամկետ հորմոնային բուժումը կարող է ունենալ սրտանոթային և կրծքագեղձի քաղցկեղի որոշ ռիսկեր, ուստի ավելի անվտանգ է հորմոնները ստանալ դաշտանադադարի մոտեցման շրջանում և ոչ երկարատև ժամանակաշրջանի ընթացքում: Զրուցեք ձեր բժշկի հետ հորմոնային բուժման առավելությունների և ռիսկերի մասին, և ճշտեք, թե արդյոք դա ձեզ համար անվտանգ ընտրություն է:
  • Հեշտոցային էստրոգեն. հեշտոցային չորությունը թեթևացնելու համար էստրոգենը կարող է ուղղակիորեն ներմուծել հեշտոցի մեջ որպես հեշտոցային նրբաքսուք (կրեմ), հաբեր կամ օղակ: Այս բուժումն ազատում է էստրոգենի փոքր քանակություն, որն անմիջականորեն ներծծվում է հեշտոցային հյուսվածքների կողմից: Հեշտոցային էստրոգենը կարող է օգնել հեշտոցային չորության մեղմացմանը, սեռական հարաբերության հետ կապված անհարմարավետության և որոշ միզային ախտանիշների թեթևացմանը:
  • Ցածր դեղաչափով հակադեպրեսանտներ. որոշ հակադեպրեսանտներ, որոնք կապված են սերոտոնինի հետընտրական ինհիբիտորներ (SSRIs) կոչվող դեղերի դասի հետ, կարող են նվազեցնել դաշտանադադարի ջերմահորդանքները: Ցածր չափաբաժիններով հակադեպրեսանտը ջերմահորդանքների կառավարման համար կարող է օգտակար լինել այն կանանց համար, ովքեր առողջական պատճառներով չեն կարող ընդունել էստրոգեն կամ ովքեր տրամադրության խանգարման պատճառով ունեն հակադեպրեսանտի կարիք:
  • Գաբապենտին (Գրալիզ, Հորիզանտ, Նեյոնտին). Գաբապենտինը հավանության է արժանացել ցնցումները բուժելու համար, սակայն նաև օգնում է ջերմահորդանքների մեղմացմանը: Այս դեղն օգտակար է այն կանանց համար, ովքեր չեն կարող օգտագործել էստրոգենային բուժում, և նրանց, ովքեր նաև ունենում են գիշերային ջերմահորդանքներ:
  • Կլոնիդին (Կատապրես, Կապվեյ). Կլոնիդինի դեղահաբը կամ սպեղանին, որը սովորաբար օգտագործվում է բարձր արյան ճնշումը բուժելու համար, կարող է որոշ չափով թեթևացնել ջերմահորդանքները:
  • Օստեոպորոզի կանխարգելման կամ բուժման դեղեր. կախված անհատական կարիքներից՝ բժիշկները կարող են դեղորայք առաջարկել օստեոպորոզի կանխարգելման կամ բուժման համար: Կան մի քանի դեղամիջոցներ, որոնք օգնում են ոսկրանյութի կորստի նվազեցմանը և կոտրվածքների ռիսկի կրճատմանը: Ձեր բժիշկը կարող է նշանակել վիտամին D–ի հավելումներ, որոնք կօգնեն ոսկորների ամրացմանը:

Նախքան բուժման որևէ տարբերակի վերաբերյալ որոշում կայացնելը, խոսեք բժշկի հետ ձեր տարբերակների և յուրաքանչյուրի հետ կապված ռիսկերի ու օգուտների մասին: Ամեն տարի վերանայեք ձեր տարբերակները, քանի որ ձեր կարիքները և բուժման տարբերակները կարող են փոխվել:

Հոդվածը տեղադրվել է՝ 20-04-2021 վերանայվել է՝ 14-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով