Բարդություններ - Մենոպաուզա

Դաշտանադադարից հետո որոշակի հիվանդությունների ձեր ռիսկը մեծանում է:

• Սրտի և արյունատար անոթների (սրտանոթային) հիվանդություն. երբ ձեր էստրոգենի մակարդակը նվազում է, սրտանոթային հիվանդության ռիսկը մեծանում է: Սրտային հիվանդությունը կանանց, ինչպես նաև տղամարդկանց մահվան հիմնական պատճառն է: Ուստի, կարևոր է կանոնավոր վարժանքներ անելը, առողջ սննդակարգը և նորմալ քաշը պահպանելը: Հարցրեք ձեր բժշկին խորհուրդներ, թե ինչպես պաշտպանել ձեր սիրտը, օրինակ՝ ինչպես նվազեցնել ձեր խոլեստերինը կամ արյան ճնշումը, եթե այն չափազանց բարձր է:
• Օստեոպորոզ. այս վիճակը հանգեցնում է ոսկորների փխրունության և թուլացման, ինչը բերում է կոտրվածքների ռիսկի բարձրացման: Դաշտանադադարից հետո առաջին մի քանի տարիների ընթացքում դուք կարող եք արագորեն կորցնել ոսկրերի խտությունը՝ մեծացնելով օստեոպորոզի ռիսկը: Օստեոպորոզ ունեցող հետդաշտանադադարի կանայք հատկապես խոցելի են ողնաշարի, կոնքերի և դաստակների կոտրվածքների նկատմամբ:
• Անմիզապահություն. հեշտոցի և միզուկի հյուսվածքները կորցնում են առաձգականությունը, ուստի դուք կարող եք զգալ միզելու հաճախակի, հանկարծակի կամ անդիմադրելի ցանկություն, որին հաջորդում է մեզի ակամա արտահոսքը (հարկադիր անմիզապահություն) կամ մեզի արտահոսքը հազի, ծիծաղի կամ ծանրություն բարձրացնելու ժամանակ (սթրեսային անմիզապահություն): Դուք կարող եք ավելի հաճախ ունենալ միզուղիների վարակներ: Կոնքի հատակի մկանների ամրապնդրումը Կեգելի վարժություններով և տեղային հեշտոցային էստրոգենի օգտագործումը, ինչպես նաև հորմոնային բուժումը կարող են օգնել անմիզապահության ախտանիշների թեթևացմանը:
• Սեռական գործունեության անկում. դաշտանադադարից հետո հեշտոցային չորությունը և հեշտոցի պատերի առաձգականության կորուստը կարող են սեռական հարաբերությունը դարձնել տհաճ ու ցավոտ, ինչպես նաև առաջացնել թեթև արյունահոսություն: Բացի այդ, զգայունության նվազումը կարող է թուլացնել սեռական ակտիվության ձեր ցանկությունը (լիբիդո): Նման իրավիճակում ջրի վրա հիմնված հեշտոցային խոնավացնող միջոցներն ու քսանյութերը (լուբրիկանտներ) կարող են օգնել: Եթե հեշտոցային քսանյութը բավարար չէ, շատ կանանց կարող է օգտակար լինել տեղային հեշտոցային էստրոգենային բուժումը, որը հասանելի է հեշտոցային նրբաքսուքի (կրեմ), հաբերի կամ օղակի տեսքով:
• Քաշի ավելացում. դաշտանադադարի ժամանակաշրջանում և դաշտանադադարից հետո բազմաթիվ կանայք քաշ են հավաքում, քանի որ նյութափոխանակությունը դանդաղում է: Ձեզ կարող է անհրաժեշտ լինել ավելի քիչ ուտել և ավելի շատ ֆիզիկապես ակտիվ լինել՝ պարզապես ձեր ընթացիկ քաշը պահպանելու համար: