Նկարագիր - Միտրալ ստենոզ

Միտրալ փականի ստենոզը, որը երբեմն կոչվում է միտրալ ստենոզ, ձախ սրտի երկու խոռոչների միջև ընկած միտրալ կամ երկփեղկ փականի նեղացումն է:

Նեղացած փականը նվազեցնում կամ արգելափակում է արյան հոսքը ձախ նախասրտից դեպի սրտի գլխավոր արտամղիչ խոռոչ՝ ձախ փորոք:

Միտրալ փականի ստենոզը կարող է առաջացնել հոգնածություն և շնչարգելություն (հևոց): Այլ հնարավոր ախտանիշներից են՝ անկանոն սրտազարկ (առիթմիա), գլխապտույտ, կրծքավանդակային ցավ կամ արյունախխում (հազալիս՝ արյուն): Որոշ մարդիկ որևէ ախտանիշ չեն նշում:

Միտրալ փականի ստենոզը կարող է առաջանալ ստրեպտոկոկային կոկորդի մի բարդության պատճառով, որը կոչվում է ռևմատիզմ (ռևմատիկ տենդ): Ռևմատիզմն այժմ հազվադեպ է հանդիպում ԱՄՆ-ում և այլ զարգացած երկրներում:

Միտրալ փականի ստենոզի բուժումը կարող է ներառել դեղորայք կամ միտրալ փականի վերականգնման կամ փոխարինման վիրահատություն: Որոշ մարդիկ ունեն միայն կանոնավոր բժշկական այցերի ու ստուգումների կարիք: Բուժումը կախված է վիճակի ծանրության աստիճանից և վատթարանալուց: Չբուժված մնալու դեպքում միտրալ փականի ստենոզը կարող է հանգեցնել ծանր սրտային բարդությունների: