Ախտանիշներ - Միտրալ ստենոզ

Միտրալ փականի ստենոզը սովորաբար դանդաղ է վատթարանում:

Դուք կարող եք երկար տարիներ չունենալ որևէ ախտանիշ կամ նշել միայն թեթև ախտանիշներ: Միտրալ փականի ստենոզի ախտանիշները կարող են ի հայտ գալ ցանկացած, նույնիսկ մանկական տարիքում:

Միտրալ փականի ստենոզի ախտանիշները ներառում են հետևյալը՝

• շնչարգելություն և հևոց, հատկապես ֆիզիկական ակտիվության կամ պառկած վիճակում
• հոգնածություն, հատկապես ֆիզիկական ակտիվության ժամանակ
• այտուցված ոտնաթաթեր կամ ոտքեր
• արագացած, թրթռացող կամ բաբախող սրտազարկի զգացողություններ (սրտխփոց)
• գլխապտույտ կամ ուշագնացություն
• ստետոսկոպով լսելիս ոչ նորմալ սրտային հնչույններ, որը նաև կոչվում է սրտի աղմուկ
• թոքերում հեղուկի կուտակում
• սրտի անկանոն ռիթմեր (առիթմիաներ)
• կրծքավանդակում անհարմարավետության զգացողություն կամ ցավ
• հազալիս արյունային խորխ (արյունախխում)։

Միտրալ փականի ստենոզի ախտանիշները կարող են ի հայտ գալ կամ վատթարանալ, երբ սրտի կծկումները հաճախանում են, օրինակ՝ ֆիզիկական վարժանքների ժամանակ: Ցանկացած բան, որն օրգանիզմի համար լարվածություն (սթրես) է առաջացնում, ներառյալ հղիությունը կամ վարակները, կարող է առաջացնել ախտանիշներ:

Ե՞րբ դիմել բժշկին

Արտահերթ անհետաձգելի այցի համար զանգեք ձեր բժշկին, եթե ունեք կրծքավանդակի շրջանում ցավ, արագացած, թրթռում կամ սրտխփոցի զգացողություն առաջացնող սրտազարկ կամ ֆիզիկական ակտիվության ընթացքում շնչարգելություն կամ հևոց: Ձեր բժիշկը կարող է խորհուրդ տալ այցելել սրտի հիվանդությունների ոլորտում մասնագիտացած բժշկին՝ սրտաբանին:

Եթե ձեզ ախտորոշել են միտրալ փականի ստենոզ, սակայն չեք ունեցել ախտանիշներ, հարցրեք ձեր բժշկին, թե որքան հաճախ պետք է կատարեք բժշկական այցելություններ և պարբերական ստուգումներ: