Քնի օբստրուկտիվ ապնոէ

Քնի օբստրուկտիվ ապնոէն պոտենցիալ ծանր քնի խանգարում է, որն առաջացնում է քնած ժամանակ շնչառության կրկնվող ընդհատումներ:

Կան քնի ապնոէի մի քանի տեսակներ, սակայն ամենատարածվածը քնի օբստրուկտիվ ապնոէն է: Անպոէի այս տեսակը տեղի է ունենում, երբ ձեր ըմպանի մկանները քնի ընթացքում պարբերաբար թուլանում և խցանում են ձեր շնչուղին` առաջացնելով շնչառության կարճատև ընդհատում: Քնի օբստրուկտիվ ապնոէի տեսանելի նշանը խռմփոցն է:

Եթե ունեք քնի օբստրուկտիվ ապնոէ, ձեր շնչառությունը քնած ժամանակ պարբերաբար ընդհատվում է, որը տևում է մի քանի վայրկյանից սկսած մինչև 10-20 վայրկյան, հազվադեպ՝ ավելի երկար («ապնոէ»-ն թարգմանվում է որպես «շնչառության կանգ»): Ապնոէի այս դրվագից հետո դուք հանկարծակի արթնանում եք շնչահեղձության զգացումով, մի քանի անգամ խոր շնչում և նորից քնում՝ շրջապատը «լցնելով» ձեր խռմփոցներով։

Գիշերվա ընթացքում դուք կարող եք ունենալ բազմաթիվ այսպիսի դրվագներ և առավոտյան քնից արթնանաք ոչ թե հանգստացած, այլ՝ հոգնածության զգացումով և տեղյակ չլինեք, թե ինչպես եք ձեր շնչառության կանգերով սարսափի մեջ պահել տան անդամներին։

Քնի օբստրուկտիվ ապնոէն կարող է ունենալ թեթևից մինչև ծանր ընթացք։ Ծանր դեպքերում գիշերվա ընթացքում դուք կարող եք ունենալ շնչառության ընդհատման հարյուրավոր դրվագներ։ Քնի ապնոէն ձեր քունը և դրա հետ կապված՝ առօրյան խանգարող հետևանքներից (օրինակ՝ ցերեկային քնկոտություն) բացի կարող է պատճառել մի շարք լուրջ առողջական խնդիրներ: Խաթարելով ձեր (ինչպես նաև ձեր տան անդամների) քունը, առաջացնելով ցերեկային քնկոտություն և ուշադրության կենտրոնացման շեղումներ, ինչպես նաև բարձրացնելով սրտանոթային և այլ հիվանդությունների զարգացման ռիսկը, քնի օբստրուկտիվ ապնոէն նաև կարող է դառնալ նաև ճանապարհատրանսպորտային և այլ պատահարների պատճառ։

Կան քնի օբստրուկտիվ ապնոէի բուժման մի շարք մոտեցումներ: Բուժումներից մեկը հատուկ սարքի օգտագործումն է, որը հիմնված է քնած ժամանակ դրական ճնշման միջոցով ձեր շնչուղին բաց պահելու վրա: Մեկ այլ տարբերակ է բերանային հարմարանքը, որը քնի ընթացքում ուղղում է ձեր ստորին ծնոտը դեպի առաջ և բացում կծվածքը: Որոշ դեպքերում բժիշկը կարող է առաջարկել վիրահատություն: Քնի ապնոէի բուժումը օգնում է կարգավորելու ձեր քունը, դրանով իսկ բարձրացնում է ձեր կյանքի որակը և կրճատում վերոնշյալ բարդությունների առաջացման ռիսկը։

Հոդվածը վերանայվել է՝ 06-05-2021