Ախտանիշներ - Բերանային կանդիդոզ

Բերանի խոռոչի կանդիդոզը դրսևորվում է բերանի լորձաթաղանթին սպիտակ բծերով կամ «կղզյակներով», որոնք կարող են մաքրվել՝ թողնելով կարմրած կամ թույլ արյունահոսող մակերեսներ։

Երեխաներ և չափահասներ

Սկզբում դուք կարող եք նույնիսկ չնկատել բերանի խոռոչի կանդիդոզի ախտանիշները: Գանգատները և ախտանիշները կարող են ներառել՝

• լեզվի, այտերի ներքին մակերևույթների, երբեմն՝ բերանի քիմքի, լնդերի և նշագեղձերի վրա կրեմանման սպիտակ ախտահարումներ
• կաթնաշոռի տեսք ունեցող մի փոքր բարձրացած ախտահարված մակերեսներ
• կարմրություն, այրոց կամ ցավոտություն, որը կարող է բավականաչափ ուժեղ լինել և խանգարել ուտելուն կամ կուլ տալուն
• թեթև արյունահոսություն ախտահարված մակերեսներին քսվելիս կամ փառը քերելիս
• ձեր բերանի անկյուններում ճաքեր և կարմրություն
• բերանում բամբակի զգացողություն
• համի զգացողության կորուստ
• պրոթեզների տակ կարմրություն, գրգռվածություն և ցավ (պրոթեզային ստոմատիտ):

Ծանր դեպքերում, որոնք սովորաբար կապված են քաղցկեղի կամ ՄԻԱՎ/ՁԻԱՀ-ից թուլացած իմունային համակարգի հետ, ախտահարումները կարող են տարածվել ներքև՝ դեպի կերակրափող՝ բերանի ետևից մինչև ստամոքս ձգվող երկար, մկանային խողովակ (կանդիդոզային էզոֆատիգ): Եթե դա տեղի ունենա, դուք կարող եք զգալ կուլ տալու դժվարություն և ցավ կամ զգալ, որ սնունդը խրվում է ձեր կոկորդում:

Նորածիններ և կրծքով կերակրող մայրեր

Ի հավելումն բերանի հստակ սպիտակ ախտահարումների, նորածինները կարող են խնդիրներ ունենալ սնման հետ կապված կամ լինել անհանգիստ և դյուրագրգիռ: Նրանք կարող են վարակը փոխանցել իրենց մայրերին կրծքով կերակրման ժամանակ: Այնուհետև վարակը կարող է «շրջագայել» մոր կրծքերի և երեխայի բերանի միջև:

Եթե կնոջ կրծքերը վարակվում են կանդիդայով, կարող են զարգանալ հետևյալ գանգատներն ու նշանները՝

• անսովոր կարմիր, զգայուն, ճաքած կամ քոր առաջացնող պտուկներ
• պտուկը շրջապատող ավելի մուգ հատվածում (արեոլա) փայլուն կամ թեփոտվող մաշկ
• անսովոր ցավ կերակրման ժամանակ կամ ցավոտ պտուկներ կերակրումների միջև
• հազվադեպ՝ կրծքագեղձի խորքում սուր ցավեր:

Ե՞րբ դիմել բժշկին

Եթե դուք կամ ձեր երեխան բերանի ներսում ունեք սպիտակավուն ախտահարումներ (փառ), դիմեք ձեր բժշկին կամ ատամնաբույժին:

Կանդիդոզը տարածված չէ առողջ ավելի մեծ երեխաների, դեռահասների և չափահասների մոտ, ուստի, եթե այն զարգանում է, դիմեք ձեր բժշկին՝ որոշելու, թե արդյոք անհրաժեշտ է լրացուցիչ գնահատում՝ հիմնական հիվանդության կամ այլ պատճառի առկայությունը ստուգելու համար: