Բուժում - Բերանային կանդիդոզ

Բերանի խոռոչի կանդիդոզի ցանկացած բուժման նպատակը խմորասնկիկների արագ տարածման կանխարգելումն է:

Սակայն լավագույն մոտեցումը կարող է կախված լինել ձեր տարիքից, ընդհանուր առողջական վիճակից և վարակի պատճառներից: Հնարավորության դեպքում հիմքում ընկած պատճառների վերացումը կարող է կանխել կրկնությունը:

• Առողջ չափահասներ և երեխաներ. բժիշկը կարող է խորհուրդ տալ հակասնկիկային դեղամիջոցներ: Դրանք առկա են տարբեր դեղաձևերով՝ լուծույթներ, հաբեր կամ հեղուկ, որով ողողում եք ձեր բերանի խոռոչը և հետո կուլ տալիս: Եթե այս տեղային ազդեցության դեղամիջոցները արդյունավետ չեն, ձեր բժիշկը կարող է նշանակել դեղամիջոցներ, որոնք ազդում են ձեր ամբողջ օրգանիզմի վրա:
• Նորածիններ և կերակրող մայրեր. եթե դուք կրծքով կերակրող մայր եք և ձեր նորածին երեխան ունի բերանի խոռոչի կանդիդոզ, վարակը կարող է ձեր միջև «շրջագայել»: Բժիշկը կարող է ձեր երեխային նշանակել որևէ թույլ հակասնկիկային դեղամիջոց, իսկ ձեզ՝ կրծքերն օծելու հակասնկիկային նրբաքսուք (կրեմ):
• Թուլացած իմունային համակարգով չափահասներ. բժիշկն ամենայն հավանականությամբ խորհուրդ կտա ընդհանուր ազդեցության հակասնկիկային դեղամիջոցներ:

Կաթնախտը կարող է կրկնվել նույնիսկ բուժվելուց հետո, եթե դրա առաջացման պատճառը, օրինակ՝ վատ ախտազերծվող ատամնապրոթեզը կամ ներշնչման ստերոիդների օգտագործումը չի դադարեցվել: