Skip to main content

Կանխարգելում - Օստեոարթրիտ

Իրականում, անհնար է ամբողջովին կանխարգելել օստեոարթրիտը, սակայն հնարավոր է նվազեցնել հիվանդության ռիսկը կամ դանդաղեցնել հարաճուն զարգացումը։

Օստեոարթրիտի զարգացման հավանականությունը կրճատող հիմնական սկզբունքը հոդերի վնասման կանխարգելումն է և ընդհանուր առողջությանը հետևելը։

  • Հետևեք հոդերի առողջությանը. ֆիզիկական ակտիվ գործեր անելիս, օրինակ՝ մարզվելիս կամ վարժանքներ կատարելիս հետևեք, որ հոդերը չափից դուրս չծանրաբեռնվեն։ Խոսքն առաջին հերթին վերաբերվում է կոնքազդրային հոդերին, ծնկներին և ձեռքերի հոդերին։ Ֆիզիկական ակտիվության պայմաններում փորձեք իրանի դիրքը պահպանել հարմար վիճակում և խուսափեք նույն դիրքում երկար ժամանակ մնալուց, որը կարող է երկար ժամանակ գերլարված պահել որոշ հոդերը։ Սեղանի շուրջ աշխատանք կատարելիս համոզվեք, որ աթոռն ունի ճիշտ բարձրություն։ Երկար ժամանակ գրասենյակային գործ անելիս ժամանակ առ ժամանակ ընդմիջեք գործերը և քայլեք շրջակայքում։ Լողը և հեծանիվ վարելը թույլ են տալիս հոդերի ծանրաբեռնվածությունը պահել ձեր հսկողության շրջանակներում։
  • Ամրապնդեք մկանները. մկանները զգալիորեն օժանդակում են հոդերի պաշտպանվածությանը, քանի որ իրենց վրա են վերցնում ծանրաբեռնվածության մի մասը։ Հետևաբար, որքան ամուր և ուժեղ են ձեր մկանները, այդքան թեթևանում է ծանրություն կրող հոդերի ծանրաբեռնվածությունը։ Ֆիզիկապես ակտիվ առօրյան և կանոնավոր վարժանքները թույլ են տալիս, որ մկանները մնան առողջ և դառնան ավելի ամուր։ Աշխատեք շաբաթական ընդհանուր 150 րոպե (2 ժամ և 30 րոպե) լինել չափավոր ծանրաբեռնվածությամբ ֆիզիկապես ակտիվ։ 65-ն անց տարիքում փորձեք ֆիզիկապես ակտիվ լինել օրական շուրջ 30 րոպե։
  • Պահպանեք առողջ քաշը. ավելորդ քաշը կամ գիրությունը կարող են խորացնել օստեոարթրիտի ընթացքը։ Հակառակը, պահպանելով նորմալ մարմնի քաշ, հոդերը պաշտպանում եք ավելորդ ծանրաբեռնվածությունից։

Հոդվածը հրապարակվել է՝ 29-04-2018
Վերջին վերանայում՝ 04-04-2024