Ինքնօգնություն - Օստեոարթրիտ

Իմացեք ամեն ինչ ձեր վիճակի և այն կառավարելու մասին, հատկապես այն մասին, թե ինչպես կարող են ապրելակերպի փոփոխությունները ազդել ձեր ախտանիշների վրա:

Ավելորդ քաշի դեպքում վարժանքները և նիհարելը կարևոր միջոցներ են՝ նվազեցնելու օստեոարթրիտի հոդացավն ու կարկամությունը:

• Վարժանքներ արեք. ցածր ազդեցության վարժանքները կարող են մեծացնել ձեր տոկունությունը և ամրացնել ձեր հոդի շուրջ մկանները՝ դարձնելով ձեր հոդը ավելի կայուն: Փորձեք քայլել, հեծանիվ վարել կամ ջրային աերոբիկայով զբաղվել: Եթե զգում եք նոր հոդացավ, դադարեցրեք վարժանքները: Նոր ցավը, որը տևում է վարժանքից հետո մի քանի ժամ, հավանաբար նշանակում է, որ դուք չափն անցել եք, այլ ոչ թե վնաս եք պատճառել կամ որ պետք է ընդհանրապես դադարեցնեք վարժանքները: Կրկին փորձեք մեկ կամ երկու օր անց ավելի ցածր ինտենսիվության մակարդակով:
• Նիհարեք. լրացուցիչ քաշ կրելը մեծացնում է ծանրաբեռնվածությունը կրող հոդերի վրա, ինչպիսիք են ծնկները և կոնք-ազդրայինները: Նույնիսկ աննշան քաշի կորուստը կարող է թեթևացնել ճնշումը և նվազեցնել ցավը: Խոսեք դիետոլոգի հետ նիհարելու առողջ ուղիների մասին:

Դուք կարող եք նաև փորձել հետևյալ միջոցները:

• Շարժման թերապիա. Թայ-չին և յոգան ներառում են նուրբ վարժություններ և ձգումներ՝ զուգորդված խորը շնչառության հետ: Շատ մարդիկ օգտագործում են այս բուժումները իրենց կյանքում սթրեսը նվազեցնելու համար, և հետազոտությունները ցույց են տալիս, որ թայ-չին և յոգան կարող են նվազեցնել օստեոարթրիտի ցավը և բարելավել շարժումները: Համոզվեք, որ ձեր ընտրած յոգան նուրբ ձև է, և որ ձեր հրահանգիչը գիտի, թե ձեր հոդերից որն է ախտահարված: Խուսափեք շարժումներից, որոնք ձեր հոդերի մեջ ցավ են պատճառում:
• Տաք և սառը միջոցներ. ինչպես տաքացնող, այնպես էլ սառեցնող միջոցները կարող են թեթևացնել ձեր հոդի ցավն ու այտուցը: Տաքությունը, հատկապես խոնավ տաքությունը, կարող է օգնել մկանների հանգստանալուն և ցավի թեթևացմանը: Սառը կարող է թեթևացնել մկանային ցավերը վարժանքից հետո և նվազեցնել մկանային կծկանքը (սպազմը):
• Կապսաիցին. տեղային կապսաիցինը՝ կծու պղպեղի արտամզվածքը, որը քսվում է ձեր ցավոտ հոդը ծածկող մաշկին, կարող է օգնել: Հնարավոր է, որ դուք ստիպված լինեք կիրառել այն օրական երեքից չորս անգամ մի քանի շաբաթվա ընթացքում, նախքան օգուտ տեսնելը: Որոշ մարդիկ չեն կարող հանդուրժել մաշկի գրգռվածությունը: Կապսաիցինային նրբաքսուք օգտագործելուց հետո լավ լվացեք ձեր ձեռքերը։
• Բրեկետներ կամ կոշիկի ներդիրներ. կոշիկի ներդիրները կամ այլ սարքերը կարող են օգնել ցավի նվազեցմանը կանգնելիս կամ քայլելիս: Այս սարքերը կարող են աջակցել ձեր հոդին՝ հանելով դրանց վրայից ավելորդ լարվածությունը:
• Օժանդակող սարքեր. օժանդակող սարքերը կարող են օգնել ձեր հոդերին լարվածությունից ազատվելու համար: Ձեռնափայտը կամ քայլակը թուլացնում է ձեր ծնկների և ազդրերի լարվածությունը, երբ քայլում եք: Ձեռնափայտը բռնեք ցավող ոտքի հակառակ կողմի ձեռքում։ Բռնելու միջոցները կարող են հեշտացնել խոհանոցում աշխատելը, եթե ունեք մատների հոդերի օստեոարթրիտ: Ստուգեք կատալոգները կամ բժշկական պարագաների խանութները կամ հարցրեք ձեր բժշկին կամ պրոֆեսիոնալ թերապևտին օժանդակ սարքերի մասին:

Կանխարգելիչ միջոցառումներ

Ընդհանուր առմամբ արթրիտները, և այդ թվում՝ օստեոարթրիտը, կարող են ձեզ դարձնել ավելի քիչ ճկուն և քիչ շարժունակ, ինչը կարող է մեծացնել պատահարների հավանականությունը (վայր ընկնել և այլն):

Ահա որոշ հնարքներ, որոնք կարող են կրճատել այսպիսի ռիսկերը։

• Վերացրեք տան «վտանգները». պահեք սենյակները բավարար լուսավորված և վերացրեք շարժմանը պատահաբար խոչընդոտող առարկաները կամ իրերը՝ էլեկտրական հոսանքի կամ այլ լարեր, հատակին առկա ոչ անհրաժեշտ իրեր և այլն։ Համոզվեք, որ հատակի գորգերը կամ կարպետները չունեն ծալքեր։ Բաղնիքի հատակին փռեք ռետինե չսահող գորգիկ։ Եթե ունեք շարժողական սահմանափակումներ, բաղնիքում և մյուս սենյակներում տեղադրեք տեղաշարժմանն օժանդակող միջոցներ և այլ պարագաներ՝ հենակներ, քայլակներ, ձեռնափայտեր, բռնակներ և այլն։
• Բարելավեք հավասարակշռությունը. կան որոշ վարժանքներ, որոնք օժանդակում են մարմնի հավասարակշռության պահպանմանը և կանխարգելում վայր ընկնելը (օրինակ՝ յոգա և այլն)։
• Հրաժարվեք բարձրակրունկ կոշիկներից. կրեք պատահաբար վայր ընկելն ավելի քիչ հավանական դարձնող և հարմարավետ, չսահող ներբաններով կոշիկներ։
• Զգուշությամբ ալկոհոլ օգտագործեք. մի՛ օգտագործեք մեծ քանակով ալկոհոլ, քանի որ ոգելից խմիչքները կարող են խախտել ձեր հավասարակշռությունը։
• Ստուգեք տեսողությունը. տեսողության ամենատարածված շեղումները, օրինակ՝ կարճատեսությունը կամ հեռատեսությունը կարող են ազդել տեղաշարժումների վրա։ Կրեք միայն ձեր տեսողությանը համապատասխան ակնոց։
• Օգնություն խնդրեք. որոշ գործեր թողեք ընտանիքի անդամներին կամ գործընկերներին, օրինակ՝ աթոռի վրա բարձրանալը, լամպ փոխելը, տնային որոշ գործողություններ և այլն։

Այլընտրանքային բժշկություն

Օստեոարթրիտի համար խոստումնալից հավելյալ և այլընտրանքային բուժումները ներառում են հետևյալը:

• Ասեղնաբուժություն. որոշ ուսումնասիրություններ ցույց են տալիս, որ ասեղնաբուժությունը կարող է թեթևացնել ցավը և բարելավել շարժումները ծնկների օստեոարթրիտ ունեցող մարդկանց մոտ: Ասեղնաբուժության ընթացքում մազից բարակ ասեղներ են մտցվում ձեր մաշկի մեջ՝ ձեր մարմնի ճշգրիտ կետերում:
• Գլյուկոզամին և խոնդրոիտին. այս սննդային հավելումների վերաբերյալ ուսումնասիրությունները հակասական են: Մի քանիսը օգուտներ են գտել օստեոարթրիտ ունեցող մարդկանց համար, մինչդեռ շատերը ցույց են տալիս, որ այս հավելումները ավելի լավ չեն ազդում, քան պլացեբոն: Գլյուկոզամինը և խոնդրոիտինը կարող են փոխազդել արյունը նոսրացնող միջոցների հետ, ինչպիսին է Վարֆարինը (Յանտովեն) և առաջացնել արյունահոսության հետ կապված խնդիրներ:
• Ավոկադո-սոյայի ոչ օճառային նյութեր. այս սննդային հավելումը` ավոկադոյի և սոյայի յուղերի խառնուրդը, լայնորեն օգտագործվում է Եվրոպայում ծնկների և ազդրի օստեոարթրիտի բուժման համար: Այն գործում է որպես հակաբորբոքային, և որոշ ուսումնասիրություններ ցույց են տվել, որ կարող է դանդաղեցնել կամ նույնիսկ կանխել հոդերի վնասումը:
• Օմեգա-3 ճարպաթթուներ. Օմեգա-3-ները, որոնք հայտնաբերվում են յուղոտ ձկան և ձկան յուղի հավելումներում, կարող են օգնել ցավի թեթևացմանը և շարժումների բարելավմանը:

Խոսեք ձեր բժշկի հետ այն հավելումների մասին, որոնք ցանկանում եք փորձել: