Գրադարան

Օստեոպորոզ. պատճառներ

Օստեոպորոզ. պատճառներ

Time Read 4 րոպե

Ձեր ոսկորները մշտական վերանորգման մեջ ​են՝ հին ոսկրային հյուսվածքները քայքայվում են և փոխարինվում են նոր ստեղծվածով:

Երբ դուք երիտասարդ եք, ձեր օրգանիզմը նոր ոսկոր ստեղծում է ավելի արագ, քան քայքայում է հին ոսկորը, և ձեր ոսկրային զանգվածն ավելանում է: 20-ական տարեկանների սկզբից հետո այս գործընթացը դանդաղում է, և մարդկանց մեծամասնությունը ոսկրային զանգվածի գագաթնակետին հասնում է մինչև 30 տարեկանը: Մարդկանց տարիքի հետ ոսկրային զանգվածն ավելի արագ է կորչում, քան ձևավորվում է:

Ձեզ մոտ օստեոպորոզի զարգացման հավանականությունը մասամբ կախված է նրանից, թե որքան ոսկրային զանգված եք ձեռք բերել ձեր երիտասարդ տարիներին: Ոսկրային զանգվածի գագաթնակետը մասամբ ժառանգական է: Այն նաև տատանվում է էթնիկ խմբերի միջև: Որքան բարձր է ձեր ոսկրային զանգվածի գագաթնակետը, այնքան ավելի շատ ոսկոր ունեք «բանկում» և այնքան ավելի քիչ հավանական է, որ տարիքի հետ օստեոպորոզով հիվանդանաք:

Ռիսկի գործոններ

Մի շարք գործոններ կարող են մեծացնել ձեր օստեոպորոզի զարգացման հավանականությունը՝ ներառյալ ձեր տարիքը, ռասան, ապրելակերպի ընտրությունը և բժշկական վկճակներն ու բուժումը:

Անփոփոխելի (չձևափոխվող) ռիսկեր

Օստեոպորոզի որոշ ռիսկի գործոններ ձեր վերահսկողությունից դուրս են:

  • Ձեր սեռը. կանայք օստեոպորոզով հիվանդանալու շատ մեծ հավանականություն ունեն, քան տղամարդիկ:
  • Տարիք. որքան մեծանում եք, այնքան մեծանում է օստեոպորոզի վտանգը:
  • Ռասա. դուք օստեոպորոզի ամենամեծ ռիսկի տակ եք, եթե սպիտակամորթ եք կամ ասիական ծագում ունեք:
  • Ընտանեկան պատմություն. օստեոպորոզով հիվանդ ծնող կամ եղբայր ունենալը ձեզ ավելի մեծ ռիսկի է ենթարկում, հատկապես, եթե ձեր մայրը կամ հայրը կոտրել են ազդրը:
  • Մարմնակառուցվածք. ցածրահասակ և փոքրամարմին կանանց և տղամարդկանց ոսկրային զանգվածն ավելի փոքր է, ուստի բարձրանում է տարիքի հետ ոսկրային հյուսվածքի սահմանային կորստի և օստեոպորոզի ռիսկը:

Հորմոնների մակարդակներ

Օստեոպորոզն ավելի հաճախ հանդիպում է այն մարդկանց մոտ, ովքեր իրենց օրգանիզմում ունեն որոշ հորմոնների չափից շատ կամ խիստ քիչ քանակներ: Օրինակները ներառում են հետևյալը:

  • Սեռական հորմոններ. սեռական հորմոնների նվազած մակարդակները հակված են թուլացնելու ոսկորները: Դաշտանադադարի ժամանակ կանանց էստրոգենի մակարդակի նվազումը օստեոպորոզի զարգացման ամենաուժեղ ռիսկի գործոններից մեկն է: Շագանակագեղձի քաղցկեղի բուժումը, որը տղամարդկանց մոտ նվազեցնում է տեստոստերոնի մակարդակը և կրծքագեղձի քաղցկեղի բուժումը, որը կանանց մոտ նվազեցնում է էստրոգենի մակարդակը, հավանաբար արագացնում է ոսկրային կորուստը:
  • Վահանաձև գեղձի հետ կապված խնդիրներ. վահանաձև գեղձի հորմոնների չափազանց մեծ քանակությունը կարող է հանգեցնել ոսկորների կորստի: Սա կարող է առաջանալ, եթե ձեր վահանաձև գեղձը գերակտիվ է կամ եթե դուք չափից շատ եք վահանաձև գեղձի հորմոնալ դեղամիջոցներ ընդունում՝ վահանաձև գեղձի անբավարար ակտիվությունը (հիպոթիրեոզ) բուժելու համար:
  • Այլ գեղձեր. օստեոպորոզը նաև կապված է պարաթիրոիդ (հարվահանաձև գեղձերի) և մակերիկամների գերակտիվության հետ (Քուշինգի համախտանիշ):

Սննդակարգային գործոններ

Օստեոպորոզը ավելի հավանական է, որ առաջանա այն մարդկանց մոտ, ովքեր ունեն հետևյալ սննդակարգային ռիսկի գործոնները:

  • Կալցիումի անբավարար ընդունում. ողջ կյանքի ընթացքում կալցիումի պակասը դեր է խաղում օստեոպորոզի զարգացման մեջ: Սննդով անբավարար կալցիումը ընդունումը նպաստում է ոսկրերի խտության նվազմանը, ոսկորների վաղաժամ կորստին և կոտրվածքների ռիսկի բարձրացմանը:
  • Սնուցման խանգարումներ. սննդի ընդունման խիստ սահմանափակումը և պակասորդային քաշը թուլացնում են ոսկորներն ինչպես տղամարդկանց, այնպես էլ կանանց մոտ:
  • Ստամոքս-աղիքային վիրաբուժություն. ձեր ստամոքսի չափսը փոքրացնող կամ աղիների մի մասը հեռացնող (մասնահատման) վիրահատությունները սահմանափակում են սննդանյութերի, ներառյալ կալցիումի ներծծման հասանելի մակերեսը: Այս վիրահատությունները կարող են առաջարկվել ձեր քաշի նվազեցման նպատակով և ստամոքս-աղիքային այլ խանգարումների դեպքում:

Ստերոիդներ և այլ դեղամիջոցներ

Բերանով ընդունվող (օրալ) կամ ներարկային կորտիկոստերոիդ դեղամիջոցների երկարատև օգտագործումը, ինչպիսիք են Պրեդնիզոնը և Կորտիզոնը, ընկճում են ոսկրերի վերականգնման գործընթացը: Օստեոպորոզը նաև կապված է այնպիսի դեղամիջոցների հետ, որոնք օգտագործվում են հետևյալ վիճակների դեմ պայքարելու կամ դրանք կանխելու համար՝

  • ցնցումներ
  • ստամոքսային ռեֆլյուքս
  • քաղցկեղ
  • փոխպատվաստված օրգանի կամ հյուսվածքի պոկում:

Հիվանդություններ և վիճակներ

Օստեոպորոզի ռիսկը բարձրացնող հիվանդություններից և առողջական վիճակներից են՝

  • ցելիակայի հիվանդություն
  • աղիների բորբոքային հիվանդություն
  • երիկամային կամ լյարդային հիվանդություն
  • քաղցկեղ
  • բազմակի միելոմա
  • ռևմատոիդ արթրիտ:

Ապրելակերպի ընտրություններ

Որոշ վատ սովորույթներ կարող են մեծացնել օստեոպորոզի վտանգը: Օրինակները ներառում են հետևյալը:

  • Նստակյաց ապրելակերպ. մարդիկ, ովքեր շատ ժամանակ են անցկացնում նստած, ունեն օստեոպորոզի ավելի բարձր ռիսկ, քան նրանք, ովքեր ավելի ակտիվ են: Դիմացկունության ցանկացած վարժանք և ակտիվություն, որը նպաստում է հավասարակշռությանն ու լավ կեցվածքին, օգտակար է ձեր ոսկորների համար, սակայն, հավանաբար առանձնահատուկ օգտակար կարող են լինել քայլելը, վազելը, ցատկելը, պարելը և ծանրությունների բարձրացումը:
  • Ալկոհոլի չափից ավելի օգտագործում. օրական երկու չափաբաժնից ավելի ալկոհոլային խմիչքների կանոնավոր օգտագործումը մեծացնում է օստեոպորոզի վտանգը։
  • Ծխախոտի օգտագործում. Ծխախոտի օգտագործումը. ծխախոտի ստույգ դերը օստեոպորոզի զարգացման մեջ պարզ չէ, սակայն ապացուցված է, որ ծխախոտի օգտագործումը նպաստում է ոսկորների թուլացմանը:

Հոդվածը տեղադրվել է՝ 30-04-2018 վերանայվել է՝ 03-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով