Բուժում - Օստեոպորոզ

Բուժման առաջարկները հաճախ հիմնված են առաջիկա 10 տարում ոսկորի կոտրվածքի ​ձեր ռիսկի գնահատման վրա՝ օգտագործելով այնպիսի տեղեկություններ, ինչպիսիք են ոսկրային խտության թեստը:

Եթե ձեր ռիսկը բարձր չէ, բուժումը կարող է չներառել դեղորայք և փոխարենը կենտրոնանալ ոսկրային կորստի և ընկնելու ռիսկի գործոնների փոփոխման վրա:

Բիսֆոսֆոնատներ

Կոտրվածքների բարձր ռիսկ ունեցող տղամարդկանց և կանանց համար օստեոպորոզի դեմ առավել լայնորեն նշանակվող դեղամիջոցներն են բիսֆոսֆոնատները: Օրինակներից են՝

• Ալենդրոնատ (Բինոստո, Ֆոզամաքս)
• Իբանդռրոնատ (Բոնիվա)
• Ռիսեդրոնատ (Ակտոնել, Ատելվիա)
• Զոլեդրոնիկաթթու (Ռեկլաստ, Զոմետա):

Կողմնակի ազդեցությունները ներառում են՝ սրտխառնոց, որովայնի ցավ և այրոցքի (изжога) նման ախտանիշներ: Դրանք ավելի քիչ հավանական է, որ առաջանան, եթե դեղը ճիշտ ընդունվի: Բիսֆոսֆոնատների ներերակային ձևերը չեն առաջացնում ստամոքսի խանգարում, սակայն կարող են առաջացնել ջերմություն, գլխացավ և մկանային ցավ:

Բիսֆոսֆոնատների խիստ հազվադեպ բարդությունը ազդրոսկորի մեջտեղի կոտրվածքն է կամ ճաքը: Երկրորդ հազվադեպ բարդությունը ծնոտի ոսկորների հետաձգված ապաքինումն է (ծնոտի օստեոնեկրոզ): Դա կարող է առաջանալ ինվազիվ ատամնաբուժական պրոցեդուրայից հետո, ինչպիսին է ատամը հեռացնելը:

Դենոսումաբ

Բիսֆոսֆոնատների համեմատ՝ Դենոսումաբը (Պրոլիա, Քսգևա) տալիս է ոսկրային խտության նմանատիպ կամ ավելի լավ արդյունքներ և նվազեցնում է բոլոր տեսակի կոտրվածքների հավանականությունը: Դենոսումաբը տրվում է ենթամաշկային ներարկումների միջոցով յուրաքանչյուր վեց ամիսը մեկ:

Բիսֆոսֆոնատների նման, Դենոսումաբն ունի նույն հազվադեպ բարդությունը՝ առաջացնելով կոտրվածքներ կամ ճաքեր ազդրոսկրի մեջտեղում և ծնոտի օստեոնեկրոզ: Եթե ընդունում եք Դենոսումաբ, ձեզ հարկավոր է շարունակել բուժումն անորոշ ժամանակով: Վերջին հետազոտությունները ցույց են տալիս, որ դեղամիջոցը դադարեցնելուց հետո կարող է լինել ողնաշարի կոտրվածքների բարձր ռիսկ:

Հորմոնային բուժումներ

Էստրոգենը, հատկապես երբ սկսվում է դաշտանադադարից անմիջապես հետո, կարող է օգնել ոսկրերի խտության պահպանմանը: Այնուամենայնիվ, էստրոգենային բուժումը կարող է մեծացնել կրծքագեղձի քաղցկեղի և արյան մակարդուկների (թրոմբ) առաջացման վտանգը, ինչը կարող է ինսուլտի պատճառ դառնալ: Հետևաբար, էստրոգենը սովորաբար օգտագործվում է երիտասարդ կանանց ոսկրերի առողջության համար կամ այն կանանց մոտ, որոնց դաշտանադադարի ախտանիշները նույնպես բուժում են պահանջում:

Ռալոքսիֆենը (Էվիստա) ընդօրինակում է հետդաշտանադադարում գտնվող կանանց մոտ ոսկրերի խտության վրա էստրոգենի օգտակար ազդեցությունը՝ առանց էստրոգենի հետ կապված որոշ ռիսկերի: Այս դեղամիջոցի ընդունումը կարող է նվազեցնել կրծքագեղձի քաղցկեղի որոշ տեսակների ռիսկը: Ջերմահորդանքները հնարավոր կողմնակի ազդեցություն են: Ռալոքսիֆենը նաև կարող է մեծացնել արյան մակարդուկների ռիսկը:

Տղամարդկանց մոտ օստեոպորոզը կարող է կապված լինել տեստոստերոնի մակարդակի տարիքային աստիճանական անկման հետ: Տեստոստերոնի փոխարինող բուժումը կարող է օգնել բարելավելու ցածր տեստոստերոնի ախտանշանները, սակայն , սակայն օստեոպորոզի բուժման օգտակարությունը բավարար չափով ուսումնասիրված չէ: Բոլոր դեպքերում, տեստոստերոնը կարող է ավելացվել տղամարդկանց օստեոպորոզի դեղամիջոցներին:

Ոսկրագոյացման դեղամիջոցներ

Եթե դուք ունեք ծանր օստեոպորոզ կամ եթե օստեոպորոզի ավելի տարածված բուժումները բավականաչափ լավ չեն օգնում, ձեր բժիշկը կարող է առաջարկել փորձել հետևյալ դեղամիջոցներից մեկնումեկը:

• Տերիպարատիդ (Բոնսիտիմ Ֆորտեո). այս հզոր դեղամիջոցը նման է պարաթիրոիդ հորմոնին և խթանում է նոր ոսկորների աճը: Այն տրվում է մաշկի տակ ամենօրյա ներարկումով՝ մինչև երկու տարի:
• Աբալոպարատիդը (Տիմլոս). սա պարաթիրոիդ հորմոնին նման մեկ այլ դեղամիջոց է: Այս դեղը կարելի է ընդունել ընդամենը երկու տարի։
• Ռոմոսոզումաբ (Էվենիտի). սա օստեոպորոզի բուժման նորագույն դեղամիջոց է, որը խթանում է ոսկորագյոացումը: Այն տրվում է որպես ամենամսյա ներարկում և սահմանափակվում է մեկ տարվա բուժման ընթացքում:

Այն բանից հետո, երբ դադարեցնեք ոսկրագոյացման այս դեղամիջոցների օգտագործում, դուք ամենայն հավանականությամբ պետք է ընդունեք օստեոպորոզի մեկ այլ դեղամիջոց՝ ոսկրային նոր աճը պահպանելու համար: