Պատճառներ - Պանիկ նոպա

Դեռևս հայտնի չէ, թե ինչու են որոշ մարդկանց մոտ առաջանում խուճապի նոպաներ կամ զարգանում խուճապային (պանիկ) խանգարում:

Այնուամենայնիվ, ըստ որոշ վարկածների խուճապի նոպայի և խուճապային խանգարման մեջ որոշակի դեր ունեն հետևյալ գործոնները՝

• գենետիկա (ժառանգական նախատրամադրվածություն)
• ուժեղ կամ մշտական և կայուն սթրես
• առանձնահատուկ բնավորության խառնվածք, երբ անձը սթրեսի կամ բացասական հույզերի նկատմամբ ավելի զգայուն է
• գլխուղեղի տարբեր շրջանների գործունեության որոշակի փոփոխություններ:

Սկզբում խուճապի նոպաները սկսվում են հանկարծակի և առանց որևէ նախանշանի, սակայն ժամանակի ընթացքում հրահրվում են գալիս որոշակի իրավիճակներից:

Հետազոտական տվյալները թույլ են տալիս ենթադրել, որ վտանգի դեմ օրգանիզմի բնական «պայքարիր կամ փախչիր» պատասխանը կարող է ներգրավված լինել խուճապի նոպաների մեջ: Օրինակ, եթե ձեզ վրա գազազած կենդանի հարձակվի, ձեր մարմինը բնազդաբար կարձագանքի: Ձեր սրտազարկը և շնչառությունը կարագանան և ձեր օրգանիզմը կպատրաստվի կյանքին սպառնացող իրավիճակին: Նմանատիպ ռեակցիաներ նաև առաջանում են խուճապի նոպայի ժամանակ: Սակայն պարզ չէ, թե ինչու են որոշ մարդկանց մոտ ակնհայտ վտանգի բացակայության պայմաններում զարգանում խուճապի նոպաներ:

Ռիսկի գործոններ

Խուճապային խանգարման ախտանիշները հաճախ սկսվում են ուշ դեռահասության կամ վաղ չափահասության տարիքում և ավելի տարածված են կանանց, քան տղամարդկանց շրջանում:

Գործոնները, որոնք կարող են մեծացնել խուճապի նոպաների կամ խուճապային խանգարման զարգացման ռիսկը, ներառում են՝

• խուճապի նոպաների կամ խուճապային խանգարման վերաբերյալ ընտանեկան պատմություն (անամնեզ)
• կյանքի մեծ սթրես, օրինակ՝ սիրելի մարդու մահը կամ ծանր հիվանդություն
• տրավմատիկ իրադարձություն, օրինակ՝ սեռական բռնության կամ ծանր վթարի ենթարկվելը
• կյանքի մեծ փոփոխություններ, օրինակ՝ բաժանություն կամ երեխայի ծնունդ
• ծխախոտի կամ մեծ քանակով կոֆեինի օգտագործում
• մանկական տարիքում ֆիզիկական կամ սեռական բռնության ենթարկված լինելու պատմություն: