Ախտանիշներ - Պանիկ նոպա

Խուճապի կամ պանիկ նոպաները սովորաբար սկսվում են հանկարծակի և առանց նախանշանների:

Դրանք կարող են ի հայտ գալ ցանկացած պահի՝ մեքենա վարելիս, խանութում գնումներ անելիս, խոր քնած ժամանակ կամ գործնական հանդիպման ընթացքում: Խուճապի նոպաները կարող են առաջանալ հազվադեպ կամ հաճախակի:

Խուճապի նոպաներն ունեն բազմաթիվ տարբերակներ, սակայն ախտանիշները սովորաբար գագաթնակետին են հասնում րոպեների ընթացքում: Նոպայից հետո զարգանում է արտահայտված գերհոգնածություն և ուժերի սպառում։

Խուճապի նոպաները սովորաբար ներառում են հետևյալ գանգատներից կամ ախտանիշներից մի քանիսը՝

• մոտալուտ վտանգի կամ կործանման զգացում
• ինքնատիրապետման կորստի կամ մահվան վախ
• սրտխփոցով ուղեկցվող հաճախացած սրտազարկ (տախիկարդիա)
• քրտնարտադրություն
• դող կամ սարսուռ
• օդի պակաս, շնչարգելություն և հևոց կամ կոկորդում սեղմվածության և շնչահեղձության զգացում
• մարմնով սառը կամ տաք ներհոսներ
• սրտխառնոց
• որովայնային (ստամոքսի շրջանի) կծկանքներ
• ետկրծոսկրային ցավեր
• գլխացավ
• գլխապտույտ, ուշագնացության զգացում կամ ուշագնացություն
• ողջ մարմնով մեկ՝ ծածկոցներ և թմրածության զգացողություն
• անիրականության կամ շրջապատից կտրվելու զգացողություն (դեպերսոնալիզացիա):

Այս նշանները գերծանրաբեռնում են մարդու գլխուղեղն ու մտքերը՝ նրան դարձնելով ֆիզիկապես անկարող նոպայի ողջ ընթացքում։

Խուճապի նոպաների ամենավատ կողմերից մեկը խիստ վախն է, որ ապագայում նմանատիպ նոպաները կարող են կրկնվել: Խուճապի նոր նոպա ունենալու վախը կարող է այնքան ուժեղ լինել, որ ստիպված խուսափեք խուճապ առաջացնող ենթադրյալ իրավիճակներից:

Ե՞րբ դիմել բժշկին

Խուճապի նոպայի ախտանիշներ ունենալիս հնարավորինս շուտ դիմեք բժշկական օգնության: Լինելով խիստ անհարմարավետություն ստեղծող, այս նոպաներն, այնուամենայնիվ, վտանգավոր չեն, սակայն ինքնուրույն դժվարությամբ են հաղթահարվում և առանց բուժման ախտանիշները կարող են խորանալ:

Բացի այդ, խուճապի նոպայի ախտանիշները կարող են նմանվել մեկ այլ լուրջ առողջական խնդիրին, օրինակ՝ սրտամկանի ինֆարկտին, ուստի կարևոր է, որ բժիշկը գնահատի տվյալ իրավիճակը, եթե համոզված չեք, թե որն է ձեր գանգատների պատճառը: