Պարկինսոնի հիվանդությամբ բազմաթիվ մարդիկ շարունակում են ապրել հարուստ և արժանի կյանքով, թեև ժամանակի ընթացքում կարող է առաջանալ որոշ հարմարեցումներ կատարելու կարիք։
Եթե ունեք Պարկինսոնի հիվանդություն, ձեր ապրելակերպի մեջ և ֆիզիկական միջավայրում փորձեք կատարել այնպիսի փոփոխություններ, որոնք կհեշտացնեն ձեր առողջական վիճակի հետ կապված սահմանափակումները։
Առողջ սննդակարգ
Բջջանքով հարուստ սննդակարգը, ներառյալ՝ թարմ մրգերը, բանջարեղենները և ընդերավորները, ինչպես նաև շատ ջուր խմելը կարող են կանխարգելել փորկապությունը, որը հաճախ ուղեկցում է Պարկինսոնի հիվանդությանը։ Փորձեք նաև ձեր սննդակարգում ավելացնել օմեգա-3 ճարպաթթուների քանակը։
Վարժանքներ
Ֆիզիկական վարժանքները կարող են ամրապնդել ձեր մկանները, կայունացնել հավասարակշռությունը, ինչպես նաև նվազեցնել դեպրեսիան և անհանգստությունը։ Ֆիզիոթերապևտը կարող է խորհուրդ տալ, թե ինչպիսի վարժանքներ կարելի է կատարել, որ մեղմացվեն շարժումների «քարացման», հավասարակշռության կորստի և մյուս գանգատները։
Աշխատանք
Նախկին աշխատանքն անվտանգ և արդյունավետ կերպով շարունակելու ձեր կարողությունը կախված է հիվանդության ծանրության աստիճանից և բուժման արդյունավետությունից։ Եթե ձեր առողջական վիճակը թույլ է տալիս, կարող եք շարունակել ձեր աշխատանքը, սակայն փորձեք զրուցել ձեր ղեկավարների հետ, որ վերանայվի ձեր աշխատանքային ժամերը կամ ձեր աշխատասենյակը հարմարեցվի ձեր կարիքներին։
Սեռական կյանք
Պարկինսոնի հիվանդությամբ որոշ մարդկանց մոտ կարող է առաջանալ սեռական հակման, ունակության կամ բավարարվածության նվազեցում։ Մյուսների մոտ դոֆամինին փոխարինող դեղերը կարող են առաջացնել սեռական մղումներ կամ ցանկություններ։ Զրուցեք ձեր բժշկի հետ և նրա խորհրդով այցելեք այս հարցերով զբաղվող մասնագետին, եթե ձեզ մոտ նկատել եք վերոնշյալ գանգատները։
Այլընտրանքային բժշկություն
Հավելյան և օժանդակող բուժումները կարող են օգնել թեթևացնել Պարկինսոնի հիվանդության որոշ ախտանիշներ և բարդություններ, ինչպիսիք են ցավը, հոգնածությունը և դեպրեսիան: Երբ իրականացվում են ձեր բուժման հետ համատեղ, այս բուժումները կարող են բարելավել ձեր կյանքի որակը:
Ձեր բժշկի իմացությամբ դուք կարող եք փորձել հետևյալ միջոցներից մեկնումեկը կամ մի քանիսը՝
- մերսում, որը կարող է նվազեցնել մկանների լարվածությունը և նպաստել թուլացմանը
- յոգա և թայ չի, որոնք օգտագործում են դանդաղ, սլացիկ շարժումներ, որոնք կարող են բարելավել ճկունությունը, հավասարակշռությունը և մկանային ուժը
- Ալեքսանդր մեթոդ, որը կենտրոնանում է մկանների կեցվածքի, հավասարակշռության և մկանների օգտագործման մասին մտածելու վրա, կարող է նվազեցնել մկանային լարվածությունը և ցավը:
- մեդիտացիա, որը կարող է նվազեցնել սթրեսը և ցավը և բարելավել ձեր բարեկեցության զգացումը
- տնային կենդանիներով թերապիա, երբ շուն կամ կատու ունենալը կարող է մեծացնել ձեր ճկունությունը, շարժունակությունը և բարելավել ձեր հուզական առողջությունը
- ռելաքսացիայի մեթոդներ, որոնք օգնում են նվազեցնելու ձեր արյան ճնշումը, սրտի հաճախությունը և բարելավելու մկանային տոնուսը:
Հոդվածը հրապարակվել է՝ 06-05-2019
Վերջին վերանայում՝ 23-04-2024