Ախտանիշներ - Պերիկարդիտ

Կրծքավանդակային կամ սրտի շրջանի ցավը պերիկարդիտի ամենատարածված ախտանիշն է:

Այն սովորաբար ծակող կամ դանակահարող բնույթի է: Սակայն, որոշ մարդիկ նշում են բութ, ձգձգվող կամ ճնշող բնույթի կրծքավանդակային ցավ:

Պերիկարդիտային ցավն առավել հաճախ զգացվում է կրծքավանդակի կենտրոնում՝ կրծոսկրի ետևում կամ ձախ կողմում: Ցավը կարող է՝

• տարածվել դեպի ձախ ուս և պարանոց կամ երկու ուսեր
• ուժգնանալ հազալիս, պառկելիս կամ խոր շունչ քաշելիս
• թեթևանալ նստելիս կամ առաջ թեքվելիս:

Պերիկարդիտի այլ ախտանիշներից են՝

• չոր հազ
• հոգնածություն, ընդհանուր թուլություն կամ վատառողջ լինելու զգացողություն
• ոտքերի կամ ոտնաթաթերի այտուցվածություն
• ցածր աստիճանի ջերմություն
• որպես բաբախում զգացվող սրտազարկ, որը նաև կոչվում է սրտխփոց
• պառկած վիճակում շնչարգելություն և հևոց
• որովայնի այտուցվածություն:

Առանձնահատուկ ախտանիշները կախված են պերիկարդիտի տեսակից: Ըստ ախտանիշների բնույթի և դրանց տևողության պերիկարդիտը խմբավորված է տարբեր դասերի:

• Սուր պերիկարդիտը սկսվում է հանկարծակի, բայց տևում է չորս շաբաթից ոչ ավելի: Դրանից հետո ևս կարող են առաջանալ սրացման դրվագներ: Հնարավոր է, որ սուր պերիկարդիտը դժվար լինի տարբերակել սրտամկանի ինֆարկտի առաջացրած ցավից:
• Կրկնվող (ռեկուրենտ) պերիկարդիտն առաջանում է սուր պերիկարդիտի նոպայից մոտ 4-6 շաբաթ անց: Այս միջակայքում որևէ ախտանիշ չի գրանցվում:
• Չդադարող պերիկարդիտը տևում է մոտ 4-6 շաբաթ, բայց ոչ ավելի, քան երեք ամիս: Ախտանիշները շարունակվում են այս ամբողջ ընթացքում։
• Քրոնիկ կոնստրիկտիվ պերիկարդիտը սովորաբար դանդաղ է զարգանում և տևում է երեք ամսից ավելի:

Ե՞րբ դիմել բժշկին

Անմիջապես դիմեք բուժօգնությaն, եթե ունեք կրծքավանդակային ցավի նոր ախտանիշներ:

Պերիկարդիտի ախտանիշներից շատերը նման են սրտի և թոքերի այլ հիվանդությունների ախտանիշներին: Կարևոր է, որ մանրակրկիտ ստուգվեք բժշկի կողմից, եթե ունեք որևէ տեսակի կրծքավանդակային ցավ: