Ախտանիշներ - Պերիտոնիտ

Սուր տարածուն պերիտոնիտը բնորոշվում է արագ զարգացող ծանր ընթացքով։

Պերիտոնիտի ախտանիշները ներառում են՝

• որովայնային ցավ կամ ցավոտություն
• որովայնի փքվածություն (փորափքանք, մետեորիզմ) կամ լցվածության զգացում
• ջերմություն
• ստամոքսի խանգարում և փսխումներ
• ախորժակի բացակայություն
• փորլուծություն
• միզարձակման կրճատում (օլոգուրիա)
• ծարավի զգացում
• կղազատման կամ աղիքային գազերը դուրս հանելու անկարողություն
• հոգնածության զգացում
• շփոթվածություն:

Եթե անցնում եք պերիտոնեալ դիալիզ, պերիտոնիտի ախտանիշները նաև կարող են ներառել՝

• դիալիզի հեղուկի պղտորություն
• դիալիզի հեղուկում սպիտակ բծերի, նստվածքի կամ խցանի առկայություն, որը կոչվում է ֆիբրին:

Պերիտոնիտի ամենատարածված ախտանիշը որովայնի սուր և ուժգին ցավերն են կամ լարվածությունը (որովայնի պատի տախտականման պնդացում), որը հայտնի է որպես սուր որովայն։ Ծանր դեպքերում որովայնային ցավերն աստիճանաբար սաստկանում և տարածվում են ամբողջ որովայնով, ուղեկցվում ինքնազգացողության կտրուկ վատացմամբ, դիմագծերի սրմամբ, դեմքի գունատությամբ, անոթազարկի արագացմամբ (րոպեում մինչև 140 զարկ և ավելի) և որովայնի փքվածությամբ:

Սակայն պերիտոնիտը կարող է զարգանալ նաև ավելի քիչ, թույլ կամ անորոշ նշաններով, հատկապես քրոնիկ ընթացքի դեպքում։

Ե՞րբ դիմել բժշկին

Պերիտոնիտը կարող է կյանքին վտանգ ներկայացնել, եթե արագ բուժում չստանաք: Անմիջապես զանգահարեք ձեր բժշկին, եթե ունեք որովայնի ուժեղ ցավ կամ ցավոտություն, փքվածություն կամ լցվածության զգացում, ինչպես նաև՝

• ջերմություն
• ստամոքսի խանգարում և փսխում
• միզարձակության քչացում
• ծարավ
• կղազատման կամ աղիքային գազերը դուրս հանելու անկարողություն:

Պերիտոնիտը նաև կարող է առաջանալ կույր աղիքի որդանման ելունի պատռվածքից կամ որովայնի լուրջ վնասվածքից հետո:

• Ամնիջապես դիմեք բուժօգնության, եթե ունեք որովայնի ուժեղ ցավ: Ցավը կարող է այնքան սաստիկ լինել, որ չկարողանաք հանգիստ նստել կամ հարմար դիրք գտնել:
• Զանգեք 1-03 և կանչեք շտապ օգնություն կամ անհապաղ այցելեք մոտակա հիվանդանոց, եթե ավտովթարից կամ վնասվածքից հետո որովայնի ուժեղ ցավ ունեք: