Նկարագիր - Պերիտոնիտ

Պերիտոնիտը ծանր հիվանդություն է, որը սկսվում է որովայնի խոռոչից:

Դա մարմնի խոռոչներից է, որը գտնվում է կրծքավանդակի և կոնքի խոռոչների միջև: Պերիտոնիտն առաջանում է, երբ որովայնի ներսում գտնվող հյուսվածքային բարակ շերտը բորբոքվում է: Այս շերտը կոչվում է որովայնամիզ (պերիտոնեում) և ծածկում է որովայնի խոռոչի օրգաններն ու մյուս կառուցվածքները: Պերիտոնիտը սովորաբար տեղի է ունենում բակտերիալ կամ սնկիկային վարակի պատճառով:

Տարբերում են պերիտոնիտի երկու տեսակ:

• Ինքնաբուխ (սպոնտան) բակտերիալ պերիտոնիտ. այս վարակի պատճառը բակտերիաներն են: Դա կարող է առաջանալ, երբ ինչ-որ մեկն ունի լյարդային հիվանդություն, ինչպիսին է ցիռոզը կամ երիկամային հիվանդություն:
• Երկրորդային պերիտոնիտ. պերիտոնիտը կարող է առաջանալ որովայնի խոռոչում որևէ օրգանի թափածակման կամ պատռման պատճառով: Կամ դա կարող է պայմանավորված լինել այլ առողջական վիճակներով:

Պերիտոնիտի դեպքում կարևոր է արագ բուժում ստանալ: Բժիշկները կարող են վարակը վերացնել մի շարք մեթոդներով: Նրանք նաև կարող են բուժել այն առողջական խնդիրները, որոնք կարող են առաջացնել որովայնի խոռոչի վարակ: Պերիտոնիտի բուժումը սովորաբար ներառում է դեղամիջոցներ, որոնք օգտագործվում են բակտերիայից առաջացած վարակների համար և կոչվում են հակաբիոտիկներ: Պերիտոնիտով որոշ մարդիկ վիրահատության կարիք ունեն: Եթե դուք չեք ստանում բուժում, պերիտոնիտը կարող է հանգեցնել լուրջ վարակի, որը տարածվում է մարմնով մեկ և կարող է մահացու լինել:

Պերիտոնիտի տարածված պատճառներից է երիկամային անբավարարության բուժումը, որը կոչվում է որովայնային (պերիտոնեալ) դիալիզ: Այս բուժումն օգնում է ազատվել արյան թափոնային նյութերից, երբ երիկամներն ի զորու չեն անել այս գործը: Եթե դուք ստանում եք որովայնային դիալիզ, կարող եք օգնել պերիտոնիտի կանխարգելմանը դիալիզից առաջ, ընթացքում և հետո պահպանելով պատշաճ հիգիենա: Օրինակ, կարևոր է լվանալ ձեռքերը և մաքրել կաթետերի շուրջ մաշկը: