Նախադաշտանային համախտանիշ. ախտորոշում

Նախադաշտանային համախտանիշ. ախտորոշում

Գոյություն չունի որևէ հատուկ ֆիզիկական նշան կամ լաբորատոր թեստ, որը կարող է հստակորեն ախտորոշել նախադաշտանային համախտանիշը:

Բժիշկը կարող է որևէ առանձին ախտանիշ վերագրել այս վիճակին, եթե դա ձեր կանխատեսելի նախադաշտանային վիճակի նշաններից մեկն է: Որպես կանոն, նախադաշտանային համախտանիշը չի ախտորոշվում, եթե ունեք միայն ֆիզիկական ախտանիշներ։

Ձեր ախտանիշների նախադաշտանային բնույթը հաստատելու համար բժիշկը կարող է առաջարկել, որ առնվազն երկու դաշտանային ցիկլերի համար օրացույցում կամ օրագրում գրանցեք ձեր ախտանիշները: Նշեք այն օրը, երբ առաջին անգամ զգում եք նախադաշտանային համախտանիշի ախտանիշները և այն օրը, երբ դրանք անհետանում են: Նաև նշեք այն օրերը, երբ ձեր դաշտանները սկսվում և ավարտվում են: Ձեր օրագիրը ներկայացրեք բժշկին և երկուսով քննարկեք արդյունքները: Բժիշկը կախտորոշի նախադաշտանային համախտանիշ, եթե ձեր ախտանիշները այնքան ծանր են, որ խանգարում են ձեր առօրյան։

Որոշ հիվանդություններ կամ առողջական խնդիրներ կարող են նմանակել նախադաշտանային համախտանիշը, օրինակ՝ քրոնիկ հոգնածության համախտանիշ, վահանաձև գեղձի հիվանդություններ կամ տրամադրության խանգարումներ (դեպրեսիա և տագնապ): Ձեր ախտորոշումը հստակեցնելու համար բժիշկը կարող է առաջարկել, որ անցնեք որոշ հետազոտություններ, օրինակ՝ վահանաձև գեղձի գործունեության թեստ կամ տրամադրության սքրինինգային թեստ:

Հոդվածը վերանայվել է՝ 08-05-2021