Շիզոֆրենիա. ախտորոշում

Շիզոֆրենիա. ախտորոշում
Անգլերեն անվանումը՝ Schizophrenia Diagnosis

Եթե որևէ մեկի մոտ առաջանում է արտասովոր վարք, որն ուղեկցվում է ցնորքներով և զառանցական մտքերով, ապա կարևոր է, որ առանց ուշացնելու դիմեք բժշկական օգնության:

Շիզոֆրենիան համարվում է փսիխոզ, որի ժամանակ խանգարվում է մարդու՝ իր և շրջապատող աշխարհի ընկալումը: Շիզոֆրենիայով մարդը կարող է և չգիտակցել, որ ունի առողջական խնդիր կամ խուսափի բժիշկներից (հատկապես, եթե ունի պարանոիդ զառանցանք): Ուստի, նման դեպքերում պետք է դիմել բժշկին և չսպասել այդ մարդու համաձայնությանը, քանի որ վաղ ախտորոշումը և առանց ուշացման մեկնարկած բուժումը կարող են ապահովել ավելի լավ արդյունքներ:

Շիզոֆրենիան ախտորոշելու համար գոյություն չունի որևէ եզակի հետազոտություն: Ինչպես բազմաթիվ այլ հոգեկան հիվանդությունների, այնպես էլ շիզոֆրենիայի ախտորոշման հիմքը կազմում է մարդու հոգեկան առողջության գնահատումը, որը սովորաբար կատարվում է հոգեբույժի կամ հոգեթերապևտի կողմից:

Վերջինս ներառում է ընթացիկ ախտանիշների, նախկինում կրած հիվանդությունների, ընդհանուր առողջական վիճակի, ընտանեկան պատմության և թմրամիջոցների օգտագործման հետ կապված հարցեր: Օգտակար կարող է լինել նաև հետազոտվողի ընտանիքի անդամների հետ զրույցը, քանի որ կան բազմաթիվ ախտանիշներ, որոնց մասին շիզոֆրենիայով հիվանդը կարող է չգիտակցել:

Շիզոֆրենիայի ախտորոշման մեջ կարևոր նշանակություն ունեն նաև մի շարք այլ հետազոտություններ, որոնց նպատակը մարդու ֆիզիկական առողջությունը գնահատելն է: Օրինակ, բժիշկը կարող է նշանակել արյան տարբեր հետազոտություններ և գլխուղեղի ՄՌՏ, որ ժխտվի (կամ հաստատվի) հնարավոր այլ հիվանդությունները:

Շիզոֆրենիայի ախտորոշումը հաստատվում է հոգեբույժի կողմից, ով կարող է նաև առաջարկել տվյալ մարդուն և իր վիճակին առավել համապատասխանող բուժումը: Սովորաբար շիզոֆրենիան ախտորոշվում է, եթե ախտանիշներն ունեն ավելի քան 6 ամսվա պատմություն կամ այնքան ծանր են, որ դպրոցում, աշխատավայրում, տանը կամ հասարակության մեջ հանգեցրել են ֆունկցիոնալ խնդիրների:

Երբեմն հոգեբույժը կարող է ախտորոշել ոչ թե շիզոֆրենիա, այլ՝ փսիխոզ, հատկապես, եթե ախտանիշները ծանր չեն և չունեն երկարատև պատմություն: Այունամենայնիվ, փսիխոզով մարդկանց մի մասի մոտ ավելի ուշ կարող է զարգանալ շիզոֆրենիա, թեև բազմաթիվ մարդիկ կարող են նաև վերջնականապես ապաքինվել:

Հոդվածը վերանայվել է՝ 11-05-2019