Skip to main content

Բուժում - Դիզենտերիա

Շիգելլա վարակը կամ բակտերիալ դիզենտերիան սովորաբար անցնում է հինգից յոթ օրվա ընթացքում:

Փորլուծությունից կորցրած հեղուկի փոխլրացումը կարող է լինել այն ամբողջ բուժումը, որն անհրաժեշտ է, հատկապես, եթե ձեր ընդհանուր առողջական վիճակը բավարար է, իսկ շիգելա վարակը թեթև է:

Դեղատոմս չպահանջող դեղեր

Խոսեք ձեր բժշկի հետ նախքան դեղատոմսի չպահանջող որևէ դեղամիջոց ընդունելը, որը նախատեսված է փորլուծությունը բուժելու համար: Փորլուծությունը կարող է առաջանալ մի շարք առողջական վիճակների պատճառով, և այդ դեղամիջոցները կարող են վատթարացնել որոշ հիվանդությունների ընթացքը:

Եթե ​​լաբորատոր թեստը հաստատել է, որ ունեք շիգելա վարակ, Բիսմուտ սուբսալիցիլատ պարունակող դեղամիջոցը (Պեպտո-Բիսմոլ, Կաոպեկտատ) կարող է օգնել ձեր կղազատման հաճախականության նվազեցմանը և ձեր հիվանդության տևողության կրճատմանը: Այնուամենայնիվ, այն խորհուրդ չի տրվում երեխաներին, հղիներին կամ այն ​​մարդկանց, ովքեր ալերգիկ են Ասպիրինից:

Խուսափեք նաև աղիների գալարակծկանքները թուլացնող դեղամիջոցներ ընդունելուց, ինչպիսիք են Լոպերամիդը (Իմոդիում) և Դիֆենօքսիլատի և ատրոպինի համակցությունը (Լոմոտիլ) պարունակող դեղամիջոցներ: Սրանք խորհուրդ չեն տրվում շիգելա վարակի դեպքում, քանի որ դրանք կարող են նվազեցնել ձեր օրգանիզմի ունակությունը՝ մաքրելու բակտերիաները և վատթարացնել ձեր վիճակը:

Հակաբիոտիկներ

Ծանր շիգելայի վարակի դեպքում հակաբիոտիկները կարող են կրճատել հիվանդության տևողությունը: Այնուամենայնիվ, որոշ շիգելա բակտերիաներ դարձել են դեղակայուն, և ձեր բժիշկը կարող է խորհուրդ չտալ հակաբիոտիկներ, եթե ձեր շիգելա վարակը ծանր չէ:

Հակաբիոտիկները կարող են անհրաժեշտ լինել նաև նորածինների, տարեցների և ՄԻԱՎ վարակակիր մարդկանց համար, ինչպես նաև այն իրավիճակներում, երբ կա հիվանդության տարածման բարձր ռիսկ:

Հեղուկների և աղի փոխլրացում

Ընդհանուր առմամբ, առողջ չափահասների համար խմելու ջուրը կարող է բավարար լինել փորլուծության ջրազրկող ազդեցությունները դիմակայելու համար:

Երեխաները կարող են օգտվել բերանային (օրալ) ռեհիդրացիոն լուծույթից, ինչպիսին է Պեդիալիտը, որը հասանելի է դեղատներում: Բազմաթիվ դեղատներում առկա են նաև այսպիսի լուծույթների բրենդային տեսակները:

Երեխաները և չափահասները, ովքեր խիստ ջրազրկված են, բուժման կարիք ունեն հիվանդանոցում, որտեղ կարող են աղեր և հեղուկներ ստանալ երակով (ներերակային), այլ ոչ թե բերանով: Ներերակային հեղուկներն օրգանիզմին ապահովում են ջրով և հիմնական սննդանյութերով շատ ավելի արագ, քան բերանային լուծույթները:

Հոդվածը հրապարակվել է՝ 29-04-2020
Վերջին վերանայում՝ 07-04-2024