Գրադարան

Ողնուղեղային վնասվածքներ. ախտանիշներ

Ողնուղեղային վնասվածքներ. ախտանիշներ

Time Read 3 րոպե

Ողնուղեղի վնասվածքից հետո ստորին վերջույթները ղեկավարելու ունակությունը կախված է երկու գործոնից՝ վնասվածքի շրջանից և ծանրության աստիճանից:

Վնասման հատվածը որոշվում է ֆունկցիաների և զգացողության կորստի ամենացածր հատվածով: Ձեր ողնուղեղի ամենաստորին նորմալ հատվածն անվանում են վնասվածքի նյարդաբանական մակարդակ:

Վնասվածքի ծանրության աստիճանը հաճախ գնահատում են որպես ամբողջականություն և դասակարգում հետևյալ երկու խմբերից մեկնումեկում՝

  • ամբողջական. երբ ողնուղեղի վնասվածքից ներքև ձեր բոլոր զգացողական (սենսոր) և շարժողական (մոտոր) ֆունկցիաները խախտված են (բացակայում են)
  • ոչ ամբողջական. երբ ողնուղեղի վնասվածքից ներքև ձեր որոշ զգացողական (սենսոր) և շարժողական (մոտոր) ֆունկցիաներ պահպանված են (ոչ ամբողջական վնասվածքն ունի իր ծանրության աստիճանները):

Ի լրումն, ողնուղեղի վնասվածքից առաջացած պարալիզը (կաթված) կարող է դրսևորվել որպես՝

  • տետրապլեգիա (կվադրիպլեգիա). եթե ողնուղեղային վնասվածքը տեղակայված է պարանոցային հատվածում, ապա պարալիզվում են ձեր բոլոր վերջույթները (երկու ձեռքեր ու դաստակներ և երկու ոտքեր ու ոտնաթաթեր), իրանը և կոնքի օրգանները
  • պարապլեգիա. եթե ողնուղեղային վնասվածքը տեղակայված է պարանոցային հատվածից ներքև՝ կրծքային, գոտկային կամ սրբանային հատվածներում, ապա ամբողջովին կամ մասնակի պարալիզվում են ձեր իրանը, ոտքերը և կոնքի օրգանները:

Բժշկական անձնակազմը կատարում է թեստերի մի շարք, որպեսզի որոշի ողնուղեղի վնասվածքի նյարդաբանական մակարդակը և ամբողջականությունը:

Ծանր ողնուղեղային վնասվածքները կարող են առաջացնել հետևյալ գանգատներից և ախտանիշներից մեկնումեկը կամ մի քանիսը՝

  • շարժողական ունակության կորուստ
  • զգացողությունների կորուստ կամ փոփոխություն, ներառյալ՝ տաքի, սառի և հպան
  • աղիների կամ միզապարկի գործունեությունը վերահսկելու կորուստ
  • ռեֆլեքսների գերակտիվացում կամ կծկանքներ (սպազմ) կամ հակառակը՝ կորուստ
  • սեռական գործունեության, սեռական զգացողության և պտղաբերության խանգարումներ
  • ողնուղեղի նյարդաթելերի վնասման պատճառով ցավեր կամ ուժեղ ծակծկող զգացողություններ
  • դժվարացած շնչառություն, հազի և թոքերն արտազատուկներից մաքրելու թուլացում:

Անհետաձգելի բուժօնգություն պահանջող ախտանիշներ

Վթարից կամ դժբախտ պատահարից առաջացած ողնուղեղային վնասվածքից հետո որոշ ախտանիշներ արժանի են առավել ուշադրության, քանի որ վկայում են անհետաձգելի բուժօգնության անհրաժեշտության մասին: Դրանցից են՝

  • մեջքի սաստիկ ցավեր կամ պարանոցի, ձեռքերի կամ մեջքի շրջանում ճնշման զգացողություն
  • մարմնի ցանկացած շրջանի թուլություն, համաչափ շարժումների խախտում կամ պարալիզ
  • ձեռքերում, ոտնաթաթերում կամ մատներում թմրածություն, ծակծկոցներ կամ զգացողությունների կորուստ
  • միզապարկի կամ աղիների գործունեության խանգարում (ակամա միզում կամ կղում)
  • հավասարակշռության խանգարումներ և քայլքի դժվարություններ
  • դժվարաշնչություն
  • պարանոցի կամ մեջքի արտասովոր ոչ բնական դիրք:

Ե՞րբ այցելել բժշկին

Գլխի կամ պարանոցի շրջանում ստացած ցանկացած լուրջ վնասվածքից հետո պահանջվում է անհետաձգելի բժշկական օգնություն, նախ և առաջ՝ զննում և ողնուղեղի հնարավոր վնասման գնահատում: Նման դեպքերում ավելի ճիշտ է առաջնորդվել այն ենթադրությամբ, որ տուժողը ստացել է ողնուղեղի վնասվածք՝ քանի դեռ հակառակը չի ապացուցվել, քանի որ՝

  • ծանր ողնուղեղային վնասվածքը միշտ չէ, որ անմիջապես ակնառու է լինում, իսկ անտեսելու դեպքում չի բացառվում ավելի լուրջ վնասվածքի պատահական առաջացում
  • թմրածությունը կամ պարալիզը կարող են ի հայտ գալ վնասվածքից անմիջապես հետո կամ զարգանալ աստիճանաբար, երբ ողնուղեղի շուրջը սկսում է կուտակվել արյուն կամ զարգանում է այտուց
  • վնասվածքը ստանալու և բուժումը սկսելու միջև ընկած ժամանակային միջակայքը կարող է ունենալ վճռորոշիչ նշանակություն:

Հոդվածը տեղադրվել է՝ 21-02-2021 վերանայվել է՝ 23-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով