Անհետաձգելի բուժօգնության բաժանմունքում բժիշկը, լսելով ձեր գանգատները, մանրակրկիտ զննելով ձեր մարմինը, ստուգելով շարժումները և զգացողական ֆունկցիաները, ինչպես նաև տալով պատահարի վերաբերյալ որոշ հարցեր, կարող է բավարար կարծիք կազմել ողնուղեղի հնարավոր վնասման մասին:
Սակայն, եթե տուժող անձը գանգատվում է պարանոցային ցավերից կամ ունի գիտակցության խանգարում և ի վիճակի չէ կոնտակտի մեջ մտնել, ապա անհետաձգելի ախտորոշիչ հետազոտությունները դառնում են անհրաժեշտություն:
- Ռենտգեն հետազոտություն. բժիշկներն այս հետազոտությունը նշանակում են գրեթե բոլոր այն դեպքերում, երբ կասկածում են տրավմայից հետո ողնուղեղի վնասվածք: Ռենտգեն հետազոտությունը կարող է հայտնաբերել ողնային խնդիրներ, ողնաշարային ուռուցքներ, կոտրվածքներ կամ դեգեներատիվ փոփոխություններ:
- Համակարգչային տոմոգրաֆիա (ԿՏ). ԿՏ սքանը դարձյալ հիմնված է ռենտգենյան ճառագայթների վրա, սակայն թույլ է տալիս ստանալ հետազոտվող շրջանի կամ օրգանի ավելի մանրակրկիտ պատկերներ և ավելի հստակորեն հայտնաբերել ոսկրային, սկավառակների հետ կապված և այլ խնդիրներ:
- Մագնիսա-ռեզոնանսային տոմոգրաֆիա (ՄՌՏ). ՄՌՏ-ն ռենտգենյան ճառագայթների փոխարեն օգտագործում է ուժեղ մագնիսական ալիքներ, որոնց միջոցով էլ համակարգչով ստացվում է մանրակրկիտ պատկեր: Սա խիստ օգտակար է ողնաշարի խոշորացված պատկերը զննելու և կառուցվածքային տարբեր շեղումներ հայտնաբերելու համար:
Վնասվածքից մի քանի օր անց, երբ այտուցի մի մասը կարող է թուլանալ, ձեր բժիշկը կանցկացնի ավելի համապարփակ նյարդաբանական հետազոտություն՝ ձեր վնասվածքի մակարդակն ու ամբողջականությունը որոշելու համար: Սա ներառում է ձեր մկանների ուժի և թեթև հպումների և ծակծկոցներ զգալու ձեր կարողության ստուգումը:
Հոդվածը հրապարակվել է՝ 21-02-2021
Վերջին վերանայում՝ 07-04-2024