Բուժում - Ողնուղեղային տրավմա

Ցավոք, վնասված ողնուղեղը վերականգնելու որևէ մեթոդ չկա:

Սակայն գիտնականները շարունակաբար փորձարկում են բուժման նոր մեթոդներ, որոնք ուղղված են նյարդային բջիջների ռեգեներացիային և ողնուղեղի վնասվածքից հետո տուժած նյարդերի գործունեության վերականգնմանը:

Ներկա պահին ողնուղեղի վնասվածքի բուժումը կենտրոնանում է հետագա վնասվածքը կանխարգելելու և տուժած անձանց ակտիվ և արդյունավետ կենսակերպ վերադառնալու վրա:

Անհետաձգելի միջոցառումներ

Անհետաձգելի բժշկական օգնությունը և հսկողությունը որոշիչ նշանակություն ունեն գլխի կամ պարանոցի տրավմաների ազդեցությունները և հետևանքները մեղմացնելու գործում: Ուստի, ողնուղեղի վնասվածքի բուժումը հաճախ սկսվում է հենց դժբախտ պատահարի վայրում:

Շտապբուժօգնության անձնակազմը տեղում՝ մինչև հիվանդանոց տեղափոխելը արագ, սակայն՝ խիստ զգուշորեն անշարժացնում է տուժողի պարանոցը և մեջքը, ըստ անհրաժեշտության ներմուծում հակաշոկային, ցավազրկող և այլ դեղամիջոցներ:

Բուժման վաղ (սուր) փուլեր

Անհետաձգելի բուժօգնության բաժանմունքում բժիշկները կենտրոնանում են հետևյալ խնդիրների լուծման վրա՝

• ինքնուրույն շնչառության կարգավորում և համարժեք գազափոխանակության ապահովում (ըստ անհրաժեշտության՝ անցում արհեստական գազափոխանակության)
• շոկի կանխարգելում և (կամ) բուժում
• պարանոցի և մեջքի առավել կայուն անշարժացում
• հնարավոր բարդությունների կանխարգելում, օրինակ՝ մեզի կամ կղանքի հեռացման ապահովում, շնչառական կամ սրտանոթային խնդիրների բուժում, խորանիստ երակների թրոմբոզի (ԽԵԹ) կանխարգելում և այլն:

Դեղորայքային բուժումից վերջին տարիներին հանվել է Մեթիլպրեդնիզոլոնի (Սոլու-Մեդրոլ) ն/ե ինֆուզիան, քանի որ պարզվել է, որ հնարավոր կողմնակի ազդեցությունները գերակշռում են ակնկալվող օգուտներին:

Հաճախ բժիշկները դիմում են վիրահատական բուժման, որպեսզի հեռացնեն կոտրված ոսկրերի բեկորները, օտար մարմինները, ճողվածքի ենթարկված սկավառակները կամ փշրված ողները: Վիրահատության հարց կարող է առաջանալ նաև ողնաշարը կայունացնելու և հետագա ցավերն ու ձևափոխումը կանխարգելելու համար:

Շարունակական բուժում

Երբ տուժողի վիճակը կամ հիվանդությունը կայունանում է, բժիշկներն իրենց ուշադրությունը կենտրոնացնում են հնարավոր երկրորդային խնդիրների լուծմանը, որոնցից են՝ ոսկրային ձևափոխումների շտկում, մկանային կոնտրակտուրաների, ճնշան պառկելախոցերի, միզապարկի և հաստ աղիների գործունեության հետ կապված խնդիրների, շնչառական և միզուղիների վարակների, արյան մակարդուկների կանխարգելում և բուժում:

Բուժման տևողությունը կախված է վնասվածքի բնույթից, տուժողի ընդհանուր առողջական վիճակից, առկա բարդություններից ու դրանց ծանրության աստիճանից:

Վերոնշյալ բոլոր խնդիրները հաղթահարելուց հետո հիվանդը կարող է տեղափոխվել վերականգնողական (ռեաբիլիտացիոն) բաժանմունք: