Ստամոքսի քաղցկեղ. ախտորոշում

4 րոպե

Ստամոքսի քաղցկեղի ախտորոշման կամ հայտնաբերման համար օգտագործվող հետազոտություններն ու միջոցառումները ներառում են հետևյալը:

• Ձեր ստամոքսը ներսից դիտում. քաղցկեղի նշաններ փնտրելու համար ձեր բժիշկը կարող է օգտագործել փոքրիկ լուսավորող տեսախցիկ՝ զննելու ձեր ստամոքսը ներսից: Այս միջոցառումը կոչվում է վերին էնդոսկոպիա (գաստրոսկոպիա): Բարակ խողովակը, որի ծայրին տեղադրված է փոքրիկ տեսախցիկ, զգուշությամբ անցկացվում է ձեր կոկորդով ու կերակրափողով դեպի ստամոքս:
• Հյուսվածքի նմուշառում թեստավորման համար. եթե ​​ձեր ստամոքսում հայտնաբերվել է քաղցկեղ կասկածվող գոյացություն կամ փոփոխություն, դրա փոքր մասը կարող է հեռացվել հետազոտման համար: Սա կոչվում է բիոպսիա և կարող է կատարվել վերին էնդոսկոպիայի ընթացքում: Հյուսվածքային նմուշը հեռացնելու համար էնդոսկոպիկ խողովակով անցկացնում են հատուկ գործիքներ: Նմուշն ուղարկվում է լաբորատորիա՝ բջջաբանական հետազոտման:

Ստամոքսի քաղցկեղի փուլի (տարածվածության) որոշում

Ստամոքսի քաղցկեղ հայտնաբերելուց հետո դուք կարող եք անցնել լրացուցիչ հետազոտություններ՝ պարզելու, թե արդյոք քաղցկեղը տարածվել է: Այս տեղեկությունն օգտագործվում է քաղցկեղին փուլ սահմանելու համար: Փուլը ցույց է տալիս ձեր բժշկին, թե որքան է տարածվել ձեր քաղցկեղը և թույլ է տալիս գնահատելու ձեր կանխատեսումը (պրոգնոզը): Ստամոքսի քաղցկեղի փուլը որոշելու համար օգտագործվող հետազոտություններն ու միջոցառումները ներառում են հետևյալը:

• Արյան թեստեր. արյան թեստը չի կարող ախտորոշել ստամոքսի քաղցկեղը։ Սակայն, արյան թեստերը կարող են ձեր բժշկին տալ ձեր առողջական վիճակի մասին օգտակար հուշումներ: Օրինակ, ձեր լյարդի գործունեությունը գնահատող թեստերը կարող են հայտնաբերել ստամոքսի քաղցկեղի հետ կապված խնդիրներ, որոնք տարածվել են լյարդի վրա: Արյան թեստի մեկ այլ տեսակով արյան մեջ փնտրվում է քաղցկեղային բջիջների կտորներ: Սա կոչվում է շրջանառվող ուռուցքի ԴՆԹ թեստ: Ստամոքսի քաղցկեղով հիվանդ մարդկանց մոտ այս թեստն օգտագործվում է միայն որոշակի իրավիճակներում: Օրինակ, այն կարող է օգտագործվել, եթե ունեք տարածված քաղցկեղ և չեք կարող բիոպսիա անցնել: Արյունից բջիջների կտորներ հավաքելը կարող է տեղեկատվություն տալ ձեր բժշկական թիմին, որը կօգնի ձեր բուժման ծրագրի կազմելուն:
• Ստամոքսի գերձայնային հետազոտություն (սոնոգրաֆիա). սա պատկերային թեստ է, որը պատկերներ ստեղծելու համար օգտագործում է ձայնային ալիքներ: Ստամոքսի քաղցկեղի դեպքում պատկերը կարող են ցույց տալ, թե որքան խորն է քաղցկեղն աճել ստամոքսի պատի մեջ: Պատկերներ ստանալու համար բարակ խողովակը, որի ծայրին տեղադրված է տեսախցիկ, անցկացվում ​​է կոկորդով՝ հասնելով ստամոքս: Ստամոքսի պատկերներ ստանալու համար օգտագործվում է հատուկ գերձայնային գործիք: Գերձայնային հետազոտությունը կարող է օգտագործվել ստամոքսի մոտ գտնվող ավշային հանգույցները դիտելու համար: Պատկերները կարող են օգնել ասեղի ուղղորդմանը՝ ավշային հանգույցներից բիոպսիոն հյուսվածք հավաքելու համար: Հեռացված հյուսվածքը հետազոտվում է լաբորատորիայում՝ քաղցկեղային բջիջներ հայտնաբերելու համար:
• Պատկերային հետազոտություններ. այս հետազոտությունները ստեղծում են պատկերների շարք, որն օգնում է ձեր բժշկական թիմին՝ գտնելու ստամոքսի քաղցկեղի տարածման նշաններ: Պատկերները կարող են ցույց տալ մոտակա ավշային հանգույցներում կամ օրգանիզմի այլ շրջաններում քաղցկեղային բջիջների կուտակումները: Նման հետազոտություններից են համակարգչային տոմոգրաֆիան (ԿՏ) և պոզիտրոնային էմիսիոն տոմոգրաֆիան (ՊԷՏ):
• Վիրահատություն. երբեմն պատկերային հետազոտությունները չեն ապահովում ձեր քաղցկեղի հստակ պատկերը, ուստի անհրաժեշտ է լինում կատարել վիրահատություն՝ այն ներսից դիտելու համար: Վիրահատությունը կարող է հայտնաբերել տարածված քաղցկեղ, որը նաև կոչվում է մետաստազավորված քաղցկեղ: Վիրահատությունը կարող է օգնել ձեր բժշկական թիմին համոզվելու, որ լյարդի կամ որովայնի վրա քաղցկեղի փոքր մասնիկներ չկան:

Որոշ իրավիճակներում կարող են օգտագործվել այլ հետազոտություններ:

Ձեր բժշկական թիմն օգտագործում են այս հետազոտություններով ստացված տեղեկատվությունը, որ ձեր քաղցկեղին փուլ սահմանեն: Ստամոքսի քաղցկեղի փուլերը նշանակվում են 0-ից 4 թվանշաններով:

0 փուլում քաղցկեղը փոքր է և ընդգրկում է միայն ստամոքսի ներքին մակերեսը: Ստամոքսի 1-ին փուլի քաղցկեղն աճել է ստամոքսի ներքին շերտերում: 2-րդ և 3-րդ փուլում քաղցկեղը ստամոքսի պատի մեջ ավելի խորն է աճել և կարող է տարածված լինել մոտակա ավշային հանգույցների վրա: 4-րդ փուլում ստամոքսի քաղցկեղը կարող է ստամոքսի պատով ներաճել դեպի մոտակա օրգաններ: 4-րդ փուլը նաև ներառում է այն քաղցկեղները, որոնք տարածվել են դեպի օրգանիզմի այլ՝ հեռավոր շրջաններ: Երբ քաղցկեղը տարածվում է, կոչվում է մետաստատիկ քաղցկեղ: Երբ ստամոքսի քաղցկեղը մետաստազներ է տալիս, այն հաճախ տարածվում է դեպի ավշային հանգույցներ կամ լյարդ: Քաղցկեղը նաև կարող է տարածվել դեպի որովայնի օրգանները ծածկող լորձաթաղանթ, որը կոչվում է որովայնամիզ (պերիտոնեում):

Բժշկական թիմը կարող է ձեր առաջին բուժումից հետո ձեր քաղցկեղին նոր փուլ տալ: Գոյություն ունեն ստամոքսի քաղցկեղի այլ փուլային համակարգեր, որոնք կարող են օգտագործվել վիրահատությունից կամ քիմիոթերապիայից հետո:

Ձեր կանխատեսումը (պրոգնոզը)

Բժշկական թիմն օգտագործում է ձեր քաղցկեղի փուլը՝ ձեր կանխատեսումը գնահատելու համար: Կանխատեսումն այն է, թե որքան հավանական է, որ քաղցկեղը բուժվի: Ստամոքսի քաղցկեղի դեպքում վաղ փուլի քաղցկեղի կանխատեսումը բարվոք է: Քանի փուլը բարձրանում է, բուժման հնարավորությունները նվազում են: Նույնիսկ այն դեպքում, երբ ստամոքսի քաղցկեղը հնարավոր չէ բուժել, բուժումը կարող է վերահսկել քաղցկեղը՝ երկարացնելով ձեր կյանքը և մեղմացնելով ձեր գանգատներն ու ախտանիշները:

Ստամոքսի քաղցկեղի կանխատեսման վրա ազդող գործոնները կարող են ներառել՝

• քաղցկեղի տեսակը
• քաղցկեղի փուլը
• ստամոքսում քաղցկեղի տեղակայումը
• ձեր ընդհանուր առողջական վիճակը
• արդյոք ձեր քաղցկեղը վիրահատությամբ ամբողջովին հեռացվել է
• ինչպես է ձեր քաղցկեղը պատասխանում քիմիոթերապիային կամ ճառագայթային բուժմանը:

Եթե ​​մտահոգված եք ձեր կանխատեսմամբ, խոսեք այդ մասին ձեր բժշկի հետ: Հարցրեք ձեր քաղցկեղի լրջության մասին: