Պատճառներ - Ինսուլտ

Ինսուլտի երկու հիմնական պատճառ կա՝ խցանված զարկերակ (իշեմիկ ինսուլտ) կամ արյունատար անոթի արտահոսք կամ պայթում (հեմոռագիկ ինսուլտ):

Որոշ մարդիկ կարող են ունենալ գլխուղեղի արյան հոսքի միայն ժամանակավոր ընդհատում, որը հայտնի է որպես տրանզիտոր իշեմիկ գրոհ (ՏԻԳ), որը չի առաջացնում տևական ախտանիշներ:

Իշեմիկ ինսուլտ

Սա ինսուլտի ամենատարածված տեսակն է: Այն առաջանում է, երբ գլխուղեղի արյունատար անոթները նեղանում կամ արգելափակվում են՝ առաջացնելով արյան հոսքի կտրուկ նվազում (իշեմիա): Արյունատար անոթների խցանումը կամ նեղացումն առաջանում են այդ անոթներում կուտակվող ճարպային նստվածքներից, արյան մակարդուկներից (թրոմբ) կամ այլ մասնիկներից, որոնք անցնում են արյան միջոցով, առավել հաճախ՝ սրտից և խցանում ուղեղի արյունատար անոթները (էմբոլիա):

Որոշ նախնական հետազոտություններ ցույց են տալիս, որ COVID-19 վարակը կարող է մեծացնել իշեմիկ ինսուլտի վտանգը, սակայն անհրաժեշտ է ավելի շատ ուսումնասիրություն:

Հեմոռագիկ ինսուլտ

Հեմոռագիկ ինսուլտը (հայտնի է նաև որպես «արյունահոսող ինսուլտ», «ներուղեղային արյունազեղում» կամ «ուղեղային արյունահոսություն») զարգանում է, երբ գլխուղեղի անոթները արյունահոսում կամ պատռվում են։ Ուղեղային արյունահոսությունները կարող են առաջանալ արյունատար անոթների վրա ազդող բազմաթիվ հիվանդություններով։ Հեմոռագիկ ինսուլտի հետ կապված գործոններից են՝

Հեմոռագիկ ինսուլտը առաջանում է, երբ գլխուղեղի արյունատար անոթը արտահոսում է կամ պատռվում` հանգեցնելով արյունահոսության: Այն հայտնի է նաև որպես արյունահոսող ինսուլտ, ներուղեղային արյունազեղում կամ ուղեղային արյունահոսություն:

Ուղեղի արյունազեղումները կարող են առաջանալ բազմաթիվ վիճակներից, որոնք ախտահարում են արյունատար անոթները: Հեմոռագիկ ինսուլտի հետ կապված գործոնները ներառում են հետևյալը`

• չվերահսկվող արյան բարձր ճնշում (հիպերտենզիա), որը թուլացնում է զարկերակի պատը և զգալիորեն մեծացնում բարձր ճնշման տակ պատռվելու հավանականությունը
• գերբուժում արյունը նոսրացնող միջոցներով (հակակագուլանտներ), որոնք բարձրացնում են հեմոռագիկ ինսուլտի հավանականությունը
• ձեր արյունատար անոթների պատերի թույլ հատվածների արտափքում (անևրիզմա), որը կարող է արյան ճնշման ազդեցությամբ պատռվել և առաջացնել ուղեղային արյունահոսություն
• վնասվածք, մասնավորապես՝ գանգուղեղային տրավմա, որը կարող է առաջացնել գլխուղեղի անոթների մեխանիկական վնասում և ուղեղային արյունահոսություն (օրինակ՝ ավտովթարի պատճառով)
• արյունատար անոթների պատերին սպիտակուցի կուտակումներ, որոնք հանգեցնում են անոթային պատի թուլության (ուղեղային ամիլոիդ անգիոպաթիա)
• իշեմիկ ինսուլտ, որը հանգեցնում է արյունահոսության։

Գլխուղեղային արյունահոսության ավելի հազվադեպ հանդիպող պատճառ է բարակ պատերով արյունատար անոթների անկանոն կծիկի պատռումը (արտերիովենոզային մալֆորմացիա):

Տրանզիտոր (անցողիկ) իշեմիկ գրոհ

Տրանզիտոր իշեմիկ գրոհը (ՏԻԳ), որը երբեմն հայտնի է որպես «մինիինսուլտ» կամ «միկրոինսուլտ», ինսուլտին նմանվող ախտանիշների ժամանակավոր շրջան է: ՏԻԳ-ը մշտական վնաս չի պատճառում: Այն առաջանում է գլխուղեղի մի մասի արյունամատակարարման ժամանակավոր նվազման պատճառով, որը կարող է տևել ընդամենը հինգ րոպե:

Իշեմիկ ինսուլտի նման, ՏԻԳ-ն առաջանում է, երբ մակարդուկը կամ մասնիկը (էմբոլիա) նվազեցնում կամ արգելափակում է արյան հոսքը դեպի նյարդային համակարգի մի շրջան:

Դիմեք շտապ օգնության, նույնիսկ եթե կարծում եք, որ դուք ունեցել եք ՏԻԳ, քանի որ ձեր ախտանիշները լավացել են: Հնարավոր չէ պարզել, թե ձեզ մոտ ինսուլտ է, թե ՏԻԳ՝ հիմնվելով միայն ախտանիշների վրա: Եթե ունեցել եք ՏԻԳ, նշանակում է, որ դուք կարող եք ունենալ գլխուղեղը սնուցող զարկերակի մասնակի արգելափակում կամ նեղացում: ՏԻԳ-ի առկայությունը մեծացնում է ավելի ուշ լիարժեք ինսուլտ զարգանալու ռիսկը:

Ռիսկի գործոններ

Բազմաթիվ գործոններ կարող են մեծացնել ինսուլտի վտանգը: Պոտենցիալ կանխարգելելի կամ բուժելի ինսուլտի ռիսկի գործոնները ներառում են հետևյալը:

Ապրելակերպի ռիսկի գործոններ

• ավելորդ քաշ կամ գիրություն
• ֆիզիկական անգործություն («նստակյաց» ապրելակերպ)
• ալկոհոլի չարաշահում (մեծ քանակների կամ անդադար օգտագործում)
• ապօրինի թմրամիջոցների օգտագործում, ինչպիսիք են կոկաինը և մետամֆետամինը:

Առողջական խնդիրների ռիսկի գործոններ

• բարձր արյան ճնշում (հիպերտենզիա)
• ծխելը կամ երկրորդային ծխի ազդեցությունը
• բարձր խոլեսթերին
• դիաբետ
• քնի օբստրուկտիվ ապնոէ
• սրտանոթային հիվանդություն, ներառյալ սրտային անբավարարությունը, սրտի արատները, սրտի վարակը կամ սրտի անկանոն ռիթմը (առիթմիա), ինչպես, օրինակ, նախասրտերի ֆիբրիլյացիան (շողացող առիթմիա)
• ինսուլտի, սրտամկանի ինֆարկտի կամ ՏԻԳ–ի անձնական կամ ընտանեկան պատմություն (անամնեզ)
• COVID-19 վարակ:

Այլ ռիսկի գործոններ

• Տարիք. 55 տարեկան և ավելի բարձր տարիքի մարդիկ ունեն ինսուլտի ավելի բարձր ռիսկ, քան ավելի երիտասարդները:
• Ռասա կամ էթնիկ պատկանելիություն. աֆրոամերիկացիները և իսպանացիներն ունեն ինսուլտի ավելի բարձր ռիսկ, քան այլ ռասաների կամ էթնիկ ծագման մարդիկ:
• Սեռ. տղամարդիկ ինսուլտի ավելի մեծ ռիսկ ունեն, քան կանայք: Կանայք սովորաբար ավելի մեծ տարիքում են ինսուլտ ունենում, և ավելի հավանական է, որ մահանան ինսուլտից, քան տղամարդիկ:
• Հորմոններ. էստրոգեն պարունակող հակաբեղմնավորիչ հաբերի օգտագործումը կամ հորմոնային բուժումները բարձրացնում են ինսուլտի ռիսկը: