Սիֆիլիս. կանխարգելում

Սիֆիլիսի դեմ որևէ պատվաստանյութ գոյություն չունի, սակայն դուք կարող եք կանխարգելել այս վարակը՝ հետևելով մի շարք օգտակար խորհուրդներին:

Ընտրեք անվտանգ սեքս

Անվտանգ սեռական հարաբերությունը սիֆիլիսային վարակի կանխարգելման լավագույն ուղին է: Ուստի, սիֆիլիսի և մյուս սեռական ճանապարհով փոխանցվող հիվանդությունների (ՍՃՓՀ) կանխարգելման համար կարևոր է, որ՝

• սեռական հարաբերության ժամանակ մշտապես օգտագործեք լատեքսային պահպանակներ
• բերանային (օրալ) սեքսի դեպքում մշտապես օգտագործեք «ատամների պահպանակներ»
• սահամանափակեք ձեր սեռական զուգընկերների թիվը կամ պարզապես ունենաք միայն մեկ առողջ սեռական զուգընկեր
• խուսափեք սիֆիլիսով վարակված, սիֆիլիսին բնորոշ ախտանիշներ ունեցող կամ սիֆիլիսի դեմ բուժվող մարդկանց հետ սեռական կապերից (վերջին դեպքում՝ քանի դեռ բուժումը լիարժեք չի ավարտվել)
• պարբերաբար հետազոտվեք ՍՃՓՀ նկատմամբ
• խուսափեք «ժամանցային» թմրամիջոցներից և ալկոհոլից, հատկապես՝ սեռական հարաբերություններից առաջ և ընթացքում, որոնք կարող են սառեցնել ձեր քննադատական վերաբերմունքը և ձեզ մղել անպաշտպան սեռական վարքագծերի:

Տեղեկացրեք ձեր զուգընկերոջը

Եթե լաբորատոր հետազոտությամբ հաստատվում է սիֆիլիս, ապա այս մասին տեղեկացրեք բոլոր՝ ներկա և վերջին երեք ամսվանից մինչև մեկ տարվա սեռական զուգընկերներին: Նրանք պետք է տեղեկացված լինեն, որ անցնեն սիֆիլիսի հայտնաբերման թեստ, և, եթե հիվանդությունը հաստատվեց, սկսեն բուժումը: Փորձեք սիֆիլիսով վարակված լինելու փաստը սեռական զուգընկերներին հաղորդել հստակ, սակայն՝ գաղտնիությունը պահելով:

Հիշեք նաև, որ քանի դեռ լիարժեք չեք բուժվել, պետք է զերծ մնալ որևէ տեսակի սեռական հարաբերությունից:

Հղի կանանց սքրինինգ

Մարդիկ կարող են սիֆիլիսով վարակված լինել և չիմանալ այդ մասին: Նույն կերպ, սիֆիլիսով հիվանդ հղի կինը կարող է չիմանալով վարակը փոխանցել իր չծնված երեխային: Ուստի, խիստ ցուցված է, որպեսզի հղի կանայք անցնեն սիֆիլիսի հայտնաբերման սքրինինգային հետազոտություն: