Պատճառներ - Տախիկարդիա

Տախիկարդիան ցանկացած պատճառով սրտի ռիթմի հաճախացումն է:

Այն կարող է հանդես գալ որպես սրտազարկի սովորական արագացում՝ ի պատասխան ֆիզիկական գործ անելու ծանրաբեռնվածության կամ սթրեսային իրավիճակի (սինուսային տախիկարդիա): Սինուսային տախիկարդիան համարվում է ախտանիշ, այլ ոչ թե հիվանդություն:

Տախիկարդիան նաև կարող է առաջանալ անկանոն սրտի ռիթմի պատճառով (առիթմիա): Տախիկարդիայի բերող պատճառները կարող են ներառել՝

• բարձր ջերմություն (տենդ)
• ալկոհոլի չարաշահում կամ զրկանք (աբստինենցիա)
• կոֆեինի մեծ քանակներ
• բարձր կամ ցածր արյան ճնշում (հիպերտենզիա կամ հիպոտենզիա)
• արյան էլեկտրոլիտների հավասարակշռության խախտում, ինչպիսիք են կալիումը, նատրիումը, կալցիումը և մագնեզիումը
• դեղամիջոցների կողմնակի ազդեցություններ
• գերակտիվ վահանաձև գեղձ (հիպերթիրեոզ)
• արյան կարմիր բջիջների (էրիթրոցիտների) թվաքանակի կրճատում, որը կոչվում է սակավարյունություբ (անեմիա) և հաճախ զարգանում է արյունահոսության պատճառով
• ծխախոտի օգտագործում
• ապօրինի թմրամիջոցների, ներառյալ՝ խթանիչերի օգտագործում, ինչպիսիք են կոկաինը կամ մեթամֆետամինը:

Որոշ դեպքերում տախիկարդիայի հստակ պատճառը պարզ չէ:

Տախիկարդիայի պատճառը հասկանալու համար օգտակար կլինի իմանալ, թե ինչպես է նորմայում աշխատում սիրտը:

Ինչպե՞ս է սիրտը բաբախում

Սիրտը կազմված է 4 խոռոչից՝ երկու վերին (նախասրտեր կամ ատրիա) և երկու ստորին (փորոքներ կամ վերտրիկուլա):

Նորմայում սրտի ռիթմը վերահսկվում է աջ նախասրտի բնական ռիթմավարով (սինուսային հանգույց)։ Սինուսային հանգույցն ուղարկում է էլեկտրական գրգիռներ (իմպուլսներ), որոնք սկիզբ են տալիս սրտի յուրաքանչյուր կծկմանը: Այս էլեկտրական իմպուլսներն անցնում են նախասրտերով՝ առաջացնելով դրանց կծկում և արյան մղում դեպի փորոքներ:

Այնուհետև էլեկտրական ազդանշանները հասնում են բջիջների մի կուտակման, որը կոչվում է նախասիրտ-փորոքային հանգույց (AV), որտեղ քիչ դանդաղում են: Այս թեթև հապաղումը թույլ է տալիս, որ փորոքները լցվեն արյունով: Երբ էլեկտրական իմպուլսները հասնում են փորոքներ, այս խոռոչները ևս կծկվում են՝ արյունը մղելով դեպի թոքեր կամ օրգանիզմի մնացած շրջաններ:

Առողջ սրտում այս ազդանիշային համակարգը սովորաբար գործում է համաչափ՝ առաջացնելով հանգիստ վիճակում րոպեում 60–ից մինչև 100 սրտազարկ:

Ռիսկի գործոններ

Ընդհանուր առմամբ, տարիքն առնելը կամ սրտի ռիթմի որոշ խնդիրների վերաբերյալ ընտանեկան պատմությունը (անամնեզ) բարձրացնում են հաճախ տախիկարդիայով ընթացող առիթմիաների ռիսկը: Ի լրումն, ցանկացած որևէ հիվանդություն, որը հանգեցնում է սրտի լրացուցիչ բեռնվածության կամ սրտամկանի վնասման, բարձրացնում է տախիկարդիայի ռիսկը:

Հակառակ դրան, ապրելակերպի փոփոխությունները կամ սրտի հետ կապված կամ այլ հիվանդությունների բուժումը կարող են կրճատել տախիառիթմիկ առիթմիաների ռիսկը: