Կանխարգելում - Տախիկարդիա

Տախիկարդիայի կանխման լավագույն մեթոդը սիրտն առողջ պահելն է և սրտային հիվանդության կանխարգելումը:

Եթե արդեն ունեք սրտային հիվանդություն, վերահսկեք տախիկարդիան և հետևեք ձեր բուժման ծրագրին: Համոզվեք, որ լիովին հասկացել եք ձեր բուժման ծրագիրը և ընդունեք բոլոր դեղամիջոցներն այնպես, ինչպես հրահանգել է ձեր բժիշկը:

Սրտային հիվանդության ռիսկը նվազեցնելուն ուղղված ապրելակերպի փոփոխությունները կարող են օգնել հաճախասրտություն առաջացնող առիթմիաների կանխարգելմանը: Կատարեք հետևյալ քայլերը:

• «Առողջացրեք» ձեր սննդակարգը. ընտրեք ամբողջահատիկ ձավարեղենով, անճարպ մսով, ցածր յուղայնության կաթնամթերքով և մրգերով ու բանջարեղենով հարուստ սննդակարգ: Սահմանափակեք աղը, շաքարը, ալկոհոլը, հագեցած ճարպերն ու այսպես կոչված տրանս-ճարպերը:
• Պարբերաբար վարժանքներ արեք. օրերի մեծ մասում փորձեք առնվազն 30 րոպե զբաղվել ֆիզիկական վարժություններով:
• Պահպանեք առողջ քաշը. ավելորդ քաշը, առավել ևս՝ գիրությունը մեծացնում են սրտային հիվանդության առաջացման ռիսկը։
• Վերահսկեք բարձր արյան ճնշումը (հիպերտենզիա) կամ բարձր խոլեստերինը. կատարեք ապրելակերպի համապատասխան շտկումներ և ընդունեք դեղամիջոցներն այնպես, ինչպես նշանակված է արյան բարձր ճնշումը կամ բարձր խոլեստերինը վերահսկելու համար:
• Դադարեցրեք ծխելը. եթե ծխում եք և չեք կարող ինքնուրույն թողնել ծխելը, զրուցեք բժշկի հետ այն մոտեցումների կամ ծրագրերի մասին, որոնք կօգնեն կոտրելու ձեր ծխելու սովորույթը:
• Ալկոհոլ օգտագործեք միայն չափավոր քանակներով. եթե օգտագործում եք ալկոհոլ, արեք դա չափավոր քանակներով: Առողջ չափահաս մարդու համար սա նշանակում է օրական ոչ ավելի քան 1 չափաբաժին կանանց համար և օրական մինչև 2 չափաբաժին տղամարդկանց համար: Առողջական որոշ խնդիրների դեպքում խորհուրդ է տրվում լիովին հրաժարվել ալկոհոլից: Խնդրեք ձեր բժշկին ձեր վիճակին հատուկ խորհրդատվություն ստանալու համար:
• Մի՛ օգտագործեք ապօրինի թմրամիջոցներ կամ խթանիչներ, ինչպիսին է կոկաինը. զրուցեք բժշկի հետ ձեզ համապատասխանող ծրագրի մասին, եթե չեք կարողանում ինքնուրույն դադարեցնել դրանց օգտագործումը:
• Դեղորայք օգտագործեք զգուշությամբ. մրսածության կամ հազի որոշ դեղամիջոցներ պարունակում են խթանիչներ, որոնք կարող են նպաստել սրտազարկի հաճախացմանը: Հարցրեք ձեր բժշկին, թե որ դեղամիջոցներից է պետք խուսափել:
• Սահմանափակեք կոֆեինը. եթե խմում եք կոֆեին պարունակող ըմպելիքներ, դա արեք չափավոր (օրական 1-2 բաժակից ոչ ավելի):
• Կառավարեք սթրեսը. գտեք հուզական սթրեսի մեղմացման եղանակներ: Ավելի շատ ֆիզիկական վարժանքներ կատարելը, գիտակցվածությամբ զբաղվելը և փոխօգնության խմբերում այլ մարդկանց հետ շփումները սթրեսի նվազեցման որոշ ուղիներ են:
• Անցեք նախատեսված ստուգումները. կանոնավոր կերպով անցեք բուժզննումները և տեղեկացրեք բժշկին ձեր սրտազարկերի ցանկացած փոփոխության մասին: Եթե ձեր ախտանշանները փոխվում կամ վատանում են կամ հայտնվում են նորերը, անմիջապես տեղեկացրեք ձեր բժշկին: