Տախիկարդիա (հաճախասրտություն)

Տախիկարդիան բժշկական տերմին է, որը բնութագրվում է րոպեում 100 զարկից ավելի սրտի կծկումների հաճախականությամբ։

Անկանոն սրտի ռիթմի (առիթմիա) բազմաթիվ տեսակներ կարող են առաջացնել տախիկարդիա:

Սրտի արագ ռիթմը միշտ չէ, որ մտահոգիչ է: Օրինակ, սրտի ռիթմը սովորաբար բարձրանում է ֆիզիկական վարժանքների ընթացքում կամ որպես սթրեսի պատասխան:

Տախիկարդիան կարող է որևէ ախտանիշ կամ բարդություն չառաջացնել: Այնուամենայնիվ, չբուժվելու դեպքում տախիկարդիայի որոշ ձևեր կարող են հանգեցնել լուրջ առողջական խնդիրների, ներառյալ սրտային անբավարարությունը, ինսուլտը կամ սրտային հանկարծամահությունը:

Տախիկարդիայի բուժումը կարող է ներառել հատուկ հնարքները (մանևրներ), դեղորայքային բուժումը, կարդիովերսիան կամ վիրահատությունը՝ հաճախացած սրտազարկը վերահսկելու համար:

Տախիկարդիայի տեսակները

Կան տախիկարդիայի բազմաթիվ տարբեր տեսակներ: Սինուսային տախիկարդիան վերաբերվում է սրտի կծկումների հաճախականության սովորական աճին, որը հաճախ առաջանում է ֆիզիկական վարժանքների կամ սթրեսի պատճառով:

Տախիկարդիայի մյուս տեսակները խմբավորվում են ըստ սրտի այն շրջանի, որը պատասխանատու է արագացած սրտազարկի համար և ըստ պատճառի: Տախիկարդիայի ընդհանուր տեսակները, որոնք առաջանում են անկանոն սրտազարկի պատճառով (առիթմիա), ներառում են հետևյալը:

  • Շողացող առիթմիա (նախասրտերի շողացում). սա տախիկարդիայի ամենատարածված տեսակն է: Սրտի վերին խոռոչներում (նախասրտեր) քաոսային անկանոն էլեկտրական ազդանշանները առաջացնում են արագացած սրտազարկ: Շողացող առիթմիան կարող է լինել ժամանակավոր, սակայն որոշ դրվագներ կարող են վերանալ միայն բուժման շնորհիվ:
  • Նախասրտերի թրթռում. նախասրտերի թրթռումը նման է շողացող առիթմիային, սակայն սրտազարկերն ավելի կազմակերպված են: Նախասրտերի թրթռման դրվագները կարող են ինքնուրույն անհետանալ կամ պահանջել բուժում: Նախասրտերի թրթռում ունեցող մարդկանց մոտ հաճախ մեկ այլ դեպքում առաջանում է շողացող առիթմիա:
  • Փորոքային հաճախասրտություն (վենտրիկուլյար տախիկարդիա). այս տեսակի առիթմիան սկսվում է սրտի ստորին խոռոչներից (փորոքներ): Արագացած սրտազարկը թույլ չի տալիս, որ փորոքները լցվեն արյունով և արդյունավետ կծկվեն՝ արտամղելու բավարար ծավալի արյուն: Փորոքային հաճախասրտության դրվագները կարող են լինել կարճատև և տևել մի քանի վայրկյան՝ առանց վնաս պատճառելու: Սակայն մի քանի վայրկյանից ավելի տևող դրվագները կարող են կյանքին վտանգ ներկայացնել:
  • Վերփորոքային հաճախասրտություն (սուպրավենտրիկուլյար տախիկարդիա). վերփորոքային հաճախասրտությունը լայն տերմին է, որը ներառում է այն առիթմիաները, որոնք սկսվում են փորոքներից վերև: Այն առաջացնում է սրտի ուժեղ բաբախումների դրվագներ (սրտխփոց), որոնք սկսվում են և ավարտվում են հանկարծակի:
  • Փորոքների շողացում (վենտրիկուլյար ֆիբրիլյացիա). արագացած և քաոսային էլեկտրական ազդանիշները համակարգված կծկվելու փոխարեն առաջացնում են փորոքների թրթռում (դող): Այս լրջագույն խնդիրը կարող է ավարտվել հիվանդի մահով, եթե սրտի ռիթմը րոպեների ընթացքում չվերականգնվի: Փորոքների շողացմամբ մարդկանց մեծ մասն ունի որևէ սրտային հիվանդություն կամ ստացել է ծանր տրավմա, օրինակ՝ կայծակի հարված:

Հոդվածը վերանայվել է՝ 30-01-2023