Վահանաձև գեղձի քաղցկեղ

Վահանաձև գեղձի քաղցկեղ
Անգլերեն անվանումը՝ Thyroid Cancer

​Վահանաձև գեղձի քաղցկեղը զարգանում է, երբ այս օրգանի ձևափոխված բջիջները սկսում են անկառավարելի կերպով կիսվել ու շատանալ:

Մինչ օրս դեռ լիարժեք պարզաբանված չէ, թե ինչու են վահանաձև գեղձի բջիջները վերափոխվում ու դառնում քաղցկեղային: Ներկայումս մեծ դեր է հատկացվում ճառագայթմանը և ժառանգական որոշակի գործոններին, որոնք կարող են բարձրացնել վահանաձև գեղձի քաղցկեղի զարգացման ռիսկը:

Վահանաձև գեղձի քաղցկեղի ախտանիշները

Վահանաձև գեղձի քաղցկեղը հաճախ զարգանում է դանդաղ՝ վաղ փուլերում չդրևսորելով որևէ գանգատ կամ արտաքին նշան: Ավելի ուշ փուլեորւմ կարող են ի հայտ գալ հետևյալ ախտանիշները՝

  • պարանոցի վրա, կոկորդի շրջանում անցավ ուռածություն
  • վահանաձև գեղձի այտուցվածություն
  • ձայնի խռպոտացում կամ անհասկանալի կայուն հազ
  • կլման հետ կապված դժվարություններ (դիսֆագիա)
  • «կոկորդային» բնույթի շնչարգելություն:

Վահանաձև գեղձի քաղցկեղի նշանները կարող են դրսևորվել նաև այս գեղձի այլ հիվանդությունների ժամանակ, ուստի առանց հետաձգելու այցելեք ձեր բժշկին, եթե ձեզ մոտ նկատել եք վերոնշյալ նշաններից մեկը կամ մի քանիսը:

Վահանաձև գեղձի քաղցկեղի ախտորոշումը հիմնված է տարբեր աղբյուրներից ստացված տվյալների վրա, այդ թվում՝ գանգատներ և ընդհանուր առողջական վիճակ, զննման արդյունքներ, լաբորատոր թեստեր, վահանաձև գեղձի սոնոգրաֆիա կամ համակարգչային շերտագիր (CT), բիոպսիա և կոկորդի էնդոսկոպիկ հետազոտություն:

Վահանաձև գեղձի քաղցկեղի բուժումը

Վահանաձև գեղձի վաղ հայտնաբերված քաղցկեղը կարող է արդյունավետ կերպով բուժվել:

Նման դեպքերում հաճախ առաջարկվում է վիրահատություն՝ գեղձի մասնակի կամ ամբողջական հեռացում (տոտալ թիրոիդէկտոմիա): Ոչ հազվադեպ բուն վահանաձև գեղձից բացի կարող են հեռացվել նաև մոտակա ավշային գեղձերը:

Վահանաձև գեղձի քաղցկեղի բուժման այլ տարբերակներից են նաև թիրեոիդ հորմոնային փոխարինող բուժումը, ռադիոակտիվ յոդային բուժումը, երբեմն՝ քիմիոթերապիա կամ արտաքին ճառագայթային բուժում: Ոչ հազվադեպ բժիշկները նշանակում են տարբեր մեթոդների զուգակցում:

Հոդվածը վերանայվել է՝ 31-05-2019