Աղմուկ ականջներում (տինիտուս)

Եթե դուք ձեր ականջներում զգում եք զնգոց կամ այլ արտասովոր աղմուկներ, դա կարող է լինել տինիտուսի նշան:

Ականջներում աղմուկը կամ տինիտուսը համեմատաբար տարածված երևույթ է և հաճախ ունի ժամանակավոր բնույթ: Սակայն երբեմն ակաջներում աղմուկը կարող է կայունանալ և դառնալ մշտական՝ խանգարելով ձեր լսողությանը և ուշադրությունը կենտրոնացնելուն, հատկապես բացարձակ լռության պայմաններում:

Ի՞նչ է տինիտուսը

Տինիտուսով մարդիկ զգում են ձայներ, որոնք իրականում նրանց շրջակայքում բացակայում են:

Այսպիսի վիճակը հաճախ նկարագրում են որպես «զնգոց ականջներում», սակայն «զնգոցից» բացի դուք ականջներում կարող եք զգալ այլ ձայներ ևս՝ մուրճի հարվածի ձայն («չխկոց»), «կտտոց», սուլոց կամ «ֆշշոց», «դժժոց» և այլ ձայնային զգացողություններ:

Աղմուկը կարող է լինել թույլ կամ ուժեղ և կարող է հայտնվել ինչպես մեկ, այնպես էլ երկու ականջներում: Երբեմն աղմուկը կարող է դրսևորվել ոչ թե որպես ձայն, այլ գլխի ներսում անորոշ զգացողություն:

Տինիտուսը կարող է հայտնվել և անհետանալ կամ էլ անհանգստացնել օրվա մեծ մասը, եթե ոչ՝ 24 ժամ:

Տարբերում են տինիտուսի երկու հիմնական տարբերակներ՝

• սուբյեկտիվ, որը լսում եք միայն դուք (սա ամենահաճախ հանդիպող տեսակն է)
• օբյեկտիվ, որը կարող է լսել նաև բժիշկը, օրինակ՝ ականջների արյունատար անոթների, ոսկրերի կամ մկանների խնդիրների դեպքում:

Հազվադեպ, մարդիկ կարող են ականջներում զգալ այնպիսի աղմուկ, որը թվում է, թե սկսվում և անհետանում է (կամ ուժեղանում և թուլանում է) սրտազարկի հետ միասին: Սա հայտնի է որպես «պուլսացվող աղմուկ» (պուլսացվող տինիտուս):

Ականջներում աղմուկի պատճառները

Ականջներում աղմուկը կարող է առաջանալ, եթե կա լսողական համակարգի որևէ խնդիր, որը տեղակայված է ձեր ականջներում և ներկայացնում է ուղեղի մի մասը:

Աղմուկն ավելի հաճախ ի հայտ է գալիս այն մարդկանց մոտ, ովքեր ունեն լսողության թուլացում կամ ականջների հետ կապված որևէ այլ խնդիր, սակայն կարող են առաջանալ նաև նորմալ լսողությամբ մարդկանց շրջանում:

Տինիտուսը կարող է հայտնվել ինչպես չափահասների, այնպես էլ երեխաների մոտ, սակայն ավելի հաճախ գրանցվում է մեծ տարիքով մարդկանց շրջանում, որը կարող է կապված լինել լսողության տարիքային թուլացման հետ:

Երբեմն այնքան էլ պարզ չէ, թե ինչու է մարդու ականջներում առաջանում աղմուկ: Տինիտուսի ավելի հաճախ հանդիպող պատճառներից են՝

• լսողության կորուստ
• ականջի ծծմբախցան (հատկապես՝ արտաքին լսողական ուղին խցանելիս)
• ուժեղ աղմուկների ազդեցություն
• ականջի վարակներ
• ներքին ականջի մկանային սպազմ
• ծնոտ-քունքային հոդի ախտահարումներ
• ուռուցքներ, օրինակ՝ ակուստիկ նևրինոմա (վեստիբուլյար շվանոմա)
• գլխի կամ պարանոցի վնասվածքներ
• Մենյերի հիվանդություն
• եվստախյան փողի գործունեության խանգարումներ
• հազվադեպ՝ արյունատար անոթների հիվանդություններ (աթերոսկլերոզ, բարձր արյան ճնշում)
• որոշ դեղեր (հակաբիոտիկներ, քաղցկեղի դեղեր, միզամուղներ, խինինի պատրաստուկներ, որոշ հակադեպրեսանտներ և Ասպիրին):

Սթրեսը, անհանգստությունը և տագնապը, կոֆեինը և որոշ դեղեր կարող են տինիտուսով մարդկանց մոտ ուժեղացնել այս գանգատը:

Զրուցեք ձեր բժշկի հետ, եթե կասկածում եք, որ ունեք տինիտուս: Բժիշկը կարող է ստուգել ձեր ականջները, որ հայտնաբերի աղմուկի առաջացման պատճառը: Նա կարող է նաև ձեզ ուղեգրել աուդիոլոգի կամ քիթ-կոկորդ-ականջաբանի խորհրդատվության:

Տինիտուսի ազդեցությունները

Որոշ մարդիկ կարող են հարմարվել ականջներում աղմուկի զգացողությանը՝ առանց լուրջ ուշադրություն դարձնելու այս գանգատին: Մյուսների համար տինիտուսը կարող է դառնալ խիստ նյարդայնացնող՝ առաջացնելով տագնապ, դյուրագրգռություն, կենտրոնացաման դժվարություն, անքնություն կամ դեպրեսիա:

Նման լրացուցիչ գանգատների կամ դրանց սրացման դեպքում դիմեք ձեր բժշկին: Այցելեք բժշկին նաև, եթե ունեք պուլսացվող տինիտուս: