Ախտանիշներ - Տոքսոպլազմոզ

Տոքսոպլազմայով մարդկանց մեծ մասը որևէ գանգատ չի ներկայացնում և տեղյակ չէ, որ վարակված է այս մակաբույծով:

Որոշ մարդկանց մոտ կարող են ի հայտ գալ գրիպանման (ընդհանուր մրսածությանը բնորոշ) ախտանիշներ, այդ թվում՝

• ջերմություն
• այտուցված ավշային հանգույցներ (կարող է շարունակվել շաբաթներ)
• գլխացավ
• մարմնի կոտրտվածություն (մկանացավ)
• մաշկի ցանավորում:

Աչքի ախտահարման ախտանիշներ

Տոքսոպլազմա մակաբույծները կարող են վարակել աչքի ներքին հյուսվածքները, այդ թվում՝ առողջ իմունային համակարգով անձանց մոտ: Սակայն հիվանդությունը ստանում է ավելի ծանր ընթացք, եթե իմունիտետը թուլացած է: Աչքի վարակը կոչվում է ակնային (օկուլյար) տոքսոպլազմոզ: Ախտանիշներից են՝

• աչքի ցավ
• տեսողության վատացում
• տեսադաշտում լողացող կետեր կամ բծեր:

Բուժումից դուրս մնալու դեպքում աչքի ախտահարումը կարող է հանգեցնել կուրության:

Թուլացած իմունիտետով մարդիկ

Թուլացած իմունային համակարգով մարդկանց մոտ հավանական է, որ տոքսոպլազմոզի ընթացքը դառնա ավելի ծանր: Ավելի վաղ տարիքում ունեցած տոքսոպլազմոզային վարակը կարող է կրկին ակտիվանալ: Ռիսկի խմբում են ՄԻԱՎ/ՁԻԱՀ-ով ապրող, քաղցկեղի դեմ բուժում ստացող կամ որևէ օրգանի փոխպատվաստումով մարդիկ:

Աչքի լուրջ ախտահարումից բացի, թուլացած իմունիտետով անձի մոտ տոքսոպլազմոզը կարող է բերել թոքային կամ ուղեղային ծանր վարակի: Խիստ հազվադեպ վարակը կարող է նաև դրսևորվել օրգանիզմի այլ հյուսվածքներում:

Թոքերի վարակը կարող է առաջացնել՝

• շնչառական խնդիրներ
• ջերմություն
• հազ:

Տոքսոպլազմոզը կարող է առաջացնել գլխուղեղի բորբոքում, որը նաև կոչվում է էնցեֆալիտ: Ախտանիշներից են՝

• շփոթվածություն
• կոորդինացիայի խանգարումներ
• մկանային թուլություն
• ցնցումներ
• զգոնության շեղումներ:

Տոքսոպլազմոզի ախտանիշները նորածինների մոտ

Հղիության ընթացքում տոքսոպլազմոզը կարող է վարակված մորից փոխանցվել պտղին: Սա կոչվում է բնածին տոքսոպլազմոզ:

Հղիության առաջին եռամսյակի ընթացքում հաճախ վարակն առաջացնում է ավելի ծանր շեղումներ: Այն նաև կարող է հանգեցնել վիժման: Տոքսոպլազմոզով ծնված նորածինների մոտ ծանր վարակը կարող է ի հայտ գալ ծնվելուց անմիջապես հետո կամ դրսևորվել վաղ նորածնային շրջանում: Բժշկական խնդիրներից են՝

• գլխուղեղը շրջապատող հեղուկի մեծ քանակություն, որը կոչվում է հիդրոցեֆալիա
• աչքերի ծանր վարակ
• ուղեղային հյուսվածքի շեղումներ
• մեծացած լյարդ կամ փայծաղ:

Ծանր վարակի ախտանիշները կարող են լինել տարբեր: Դրանք կարող են ներառել՝

• մտավոր կամ շարժողական հմտությունների հետ կապված խնդիրներ
• կուրություն կամ այլ տեսողական խնդիրներ
• լսողության խնդիրներ
• ցնցումներ
• սրտային խանգարումներ
• մաշկի և աչքերի սպիտակենու դեղնություն (դեղնուկ)
• ցանավորում:

Տոքսոպլազմոզով նորածինների մեծ մասի մոտ որևէ ախտանիշ չի հայտնաբերվում: Սակայն խնդիրները կարող են դրսևորվել ուշ մանկական կամ դեռահաս տարիներին: Դրանցից են՝

• աչքի վարակների կրկնություն
• շարժողական հմտությունների զարգացման խնդիրներ
• մտածողության և ուսման խնդիրներ
• լսողության կորուստ
• աճի հապաղում
• վաղ սեռահասունացում:

Ե՞րբ դիմել բժշկին

Զրուցեք բժշկի հետ լաբորատոր թեստ անցնելու մասին, եթե անհանգստացած եք մակաբույծով վարակված լինելու մասին: Եթե նախատեսում եք հղիանալ կամ արդեն հղի եք, այցելեք բժշկին, եթե կասկածում եք, որ կարող էիք տոքսոպլազմայով վարակված լինել:

Ծանր տոքսոպլազմոզի ախտանիշներից են մշուշոտ տեսողությունը, շփոթվածությունը և կորդինացիայի կորուստը: Դրանք պահանջում են անհետաձգելի բուժօգնություն, հատկապես, եթե ունեք թուլացած իմունային համակարգ: