Ախտորոշում - Տոքսոպլազմոզ

Տոքսոպլազմայի ախտորոշումը հիմնված է արյան թեստերի վրա:

Լաբորատոր թեստերը կարող են հայտնաբերել հակամարմինների երկու տեսակներ: Դրանցից մեկն իմունային համակարգն արտադրում է մակաբույծի նոր և ակտիվ վարակի ընթացքում: Մյուս հակամարմինն արյան մեջ հայտնվում է, եթե դուք անցյալում ունեցել եք վարակ: Կախված արդյունքներից, բժիշկը կարող է մեկ կամ երկու շաբաթ հետո կրկնել թեստը:

Լրացուցիչ ախտորոշիչ թեստերը նշանակվում են կախված այլ ախտանիշների առկայությունից, ձեր առողջական վիճակից և այլ գործոններից:

Ակնային ախտանիշներ

Եթե ունեք աչքի վարակ և համապատասխան ախտանիշներ, բժիշկը ձեզ կուղեգրի ակնաբույժի խորհրդատվության: Ակնաբույժը կարող է զննել ձեր աչքերը, ստուգել տեսողությունը և հատուկ լինզաներով կամ սարքերով դիտել աչքի ներսում ընկած գոյացությունները:

Ուղեղային և նյարդային համակարգի այլ ախտանիշներ

Եթե առկա են գլխուղեղի բորբոքման ախտանիշներ, բժիշկը կարող է առաջարկել՝

• գլխուղեղի պատկերային հետազոտություն (ՄՌՏ կամ ԿՏ)՝ տոքսոպլազմոզով պայմանավորված կառուցվածքային շեղումներ հայտնաբերելու համար
• ողնուղեղային հեղուկի թեստ՝ մակաբույծ հայտնաբերելու համար
• գլխուղեղի հյուսվածքի բիոպսիա (եզակի դեպքերում):

Հղիություն

Բազմաթիվ երկրներում հղիների տոքսոպլազմոզի սքրինինգը պարտադիր չէ, սակայն խորհուրդ է տրվում հետևյալ դեպքերում՝

• առկա են ակտիվ տոքսոպլազմային վարակ հիշեցնող ախտանիշներ
• պտղի գերձայնային հետազոտությամբ արձանագրվել է տոքսոպլազմոզին բնորոշ շեղումներ (օրինակ՝ հիդրոցեֆալիա):

Եթե ունեք ակտիվ վարակ, այն կարող է փոխանցվել արգանդում գտնվող պտղին: Նման կասկածի դեպքում կարող է նշանակվել հարպտղային ջրերի (ամնիոտիկ հեղուկի) թեստ, եթե՝

• արյան թեստը դրական է
• արյան թեստը կասկածելի է
• պտղի գերձայնային հետազոտությամբ արձանագրվել է տոքսոպլազմոզին բնորոշ շեղումներ (օրինակ՝ հիդրոցեֆալիա):

Նորածիններ

Վարակի կասկածի դեպքում կարող է անցկացվել նորածնի արյան թեստեր: Եթե ստացվում է դրական արդյունք, կարող է առաջանալ լրացուցիչ բազմաթիվ թեստերի անհրաժեշտություն, այդ թվում՝

• գլխուղեղի գերձայնային հետազոտություն կամ ԿՏ
• ողնուղեղային հեղուկի թեստ
• աչքի թեստեր
• լսողության թեստեր
• գլխուղեղի ակտիվության թեստ, որը կոչվում է էլեկտրոէնցեֆալոգրաֆիա: