Պատճառներ - Վագինիտ

Պատճառը կախված է նրանից, թե ինչ տեսակի հեշտոցաբորբ ունեք:

• Բակտերիալ վագինոզ. վագինիտի այս ամենատարածված տեսակը առաջանում է հեշտոցում հայտնաբերվող բակտերիաների փոփոխության հետևանքով, ինչը խախտում է հավասարակշռությունը: Թե ինչն է առաջացնում անհավասարակշռություն, անհայտ է: Հնարավոր է բակտերիալ վագինոզ առանց ախտանիշների: Վագինիտի այս տեսակը, հավանաբար, կապված է սեռական հարաբերության հետ, հատկապես, եթե ունեք բազմաթիվ սեռական զուգընկերներ կամ նոր սեռական զուգընկեր: Սակայն, բակտերիալ վագինիտը հանդիպում է նաև այն կանանց մոտ, ովքեր չեն վարում սեռական կյանք:
• Խմորասնկիկային վարակներ. դրանք առաջանում են, երբ հեշտոցում զարգանում է սնկիկային օրգանիզմի գերաճ (սովորաբար՝ Candida albicans-ի): C. albicans-ը վարակներ է առաջացնում նաև ձեր մարմնի այլ խոնավ շրջաններում, օրինակ՝ բերանի խոռոչում (կաթնախտ), մաշկի ծալքերում և եղունգների շերտերում: Կանդիդան նաև կարող է առաջացնել տակդիրայինշփաբորբ։
• Տրիխոմոնոզ (տրիխոմոնիազ). սեռական ճանապարհով փոխանցվող այս տարածված վարակը պայմանավորված է մանրադիտակային, միաբջիջ մակաբույծով, որը կոչվում է Trichomonas vaginalis: Այս օրգանիզմը տարածվում է վարակված անձի հետ սեռական հարաբերության ժամանակ։ Տղամարդկանց մոտ տրիխոմոնիազը սովորաբար ախտահարում է միզուղիները, սակայն հաճախ այն չի առաջացնում ախտանիշներ։ Կանանց մոտ տրիխոմոնիազը սովորաբար վարակում է հեշտոցը և կարող է առաջացնել ախտանիշներ: Այն նաև մեծացնում է կանանց մոտ սեռական ճանապարհով փոխանցվող այլ վարակների վտանգը:
• Ոչ վարակիչ վագինիտ. հեշտոցային սփրեյները, հեշտոցային լվացումները, լոգանքները, օճառները, անուշահոտ լվացող միջոցները և սերմնասպան միջոցները (սպերմիցիդներ) կարող են առաջացնել ալերգիկ ռեակցիա կամ գրգռել հեշտոցի նախադռան և հեշտոցային հյուսվածքները: Հեշտոցում գտնվող օտար մարմինները, ինչպիսիք են անձեռոցիկները կամ մոռացված տամպոնները, նույնպես կարող են գրգռել հեշտոցային հյուսվածքները:
• Դաշտանադադարի միզասեռային համախտանիշ (հեշտոցային ատրոֆիա). դաշտանադադարից կամ ձեր ձվարանների վիրահատական հեռացումից հետո էստրոգենի մակարդակի նվազումը կարող է հանգեցնել հեշտոցային լորձաթաղանթի բարակելուն (հետաճ կամ ատրոֆիա), ինչը երբեմն առաջացնում է հեշտոցի գրգռում, այրոցի զգացողություն ու չորություն:

Ռիսկի գործոններ

Վագինիտի զարգացման ռիսկը մեծացնող գործոնները ներառում են՝

• հորմոնային տեղաշարժեր, ինչպիսիք են հղիության, հակաբեղմնավորիչ հաբերի կամ դաշտանադադարի հետ կապված փոփոխությունները
• սեռական ակտիվություն
• սեռական ճանապարհով փոխանցվող վարակի առկայություն
• դեղորայք, ինչպիսիք են հակաբիոտիկները և ստերոիդները
• ծնելիության վերահսկման համար սպերմիցիդների օգտագործում
• չվերահսկվող դիաբետ
• հիգիենայի միջոցների օգտագործում, ինչպիսիք են պղպջակային լոգանքը, հեշտոցային սփրեյը կամ հեշտոցային դեզոդորանտը
• հեշտոցի խոռոչի լվացումներ
• խոնավ կամ կիպ ներքնազգեստ կամ զգեստ հագնելը
• հղիության վերահսկման համար ներարգանդային միջոցների, օրինակ՝ ներարգանդային պարույրի օգտագործում: