Վագինիտ. պատճառներ

Վագինիտ. պատճառներ

Հեշտոցի լորձաթաղանթի բորբոքման պատճառը և դրա հիման վրա՝ բուժումը կախված է վագինիտի տեսակից

Ահա թե ինչու մինչև բուժում նշանակելը բժիշկը նախ ցանկանում է ախտորոշել վագինիտի զարգացման պատճառը:

  • Բակտերիալ վագինոզ. հեշտոցաբորբի առաջացման ամենատարածված պատճառը բակտերիալ վագինոզն է, որը զարգանում է հեշտոցում առկա նորմալ բակտերիալ միկրոֆլորայի փոփոխությամբ պայմանավորված այլ տեսակի միկրոօրգանիզմների գերաճի պատճառով: Սովորաբար նորմայում հեշտոցում հայտնաբերվող բակտերիաները (լակտոբացիլներ) հակակշռվում են այլ տեսակի բակտերիաներով (անաերոբներ): Երբ վերջիններս դառնում են խիստ մեծաքանակ, խախտում է նորմալ հավասարակշռությունը՝ առաջացնելով բակտերիալ վագինոզ: Վագինիտի այս տեսակն ավելի հավանական է, որ կապված է սեռական հարաբերության հետ, հատկապես, երբ դուք ունեք տարբեր կամ նոր սեռական զուգընկերներ: Սակայն բակտերիալ վագինոզ կարող է զարգանալ նաև ակտիվ սեռական կյանք չվարող կանանց մոտ:
  • Խմորասնկային վարակ. սա առաջանում է հեշտոցում սնկիկային օրգանիզմների՝ սովորաբար կադիդայի (Candida albicans) գերաճի հետևանքով՝ առաջացնելով հեշտոցային կանդիդոզ: Candida albicans-ը կարող է նաև առաջացնել մարմնի այլ խոնավ շրջանների ախտահարում, օրինակ՝ բերանում (կաթնախտ), մաշկային ծալքերում կամ եղուգներում: Այս սունկը կարող է առաջացնել նաև տակդիրային ցանավորում:
  • Տրիխոմոնոզ (տրիխոմոնիազ). սա տարածված սեռական ճանապարհով փոխանցվող հիվանդություն է (ՍՃՓՀ), որը հարուցվում է մանրադիտակային չափսի միաբջիջ Trichomonas vaginalis մակաբույծով։ Տրիխոմոնիազային վարակը տարածվում է հիվանդ կամ վարակակիր զուգընկերոջից՝ սեռական ճանապարհով: Տղամարդկանց մոտ տրիխոմոնոզը սովորաբար վարակում է միզուղիները, սակայն հաճախ որևէ գանգատ չի առաջացնում: Կանանց մոտ տրիխոմոնոզը սովորաբար ախտահարում է հեշտոցը և կարող է առաջացնել որոշ ախտանիշներ: Այն նաև բարձրացնում է կանանց մոտ այլ ՍՃՓՀ-ով վարակման ռիսկը:
  • Ոչ վարակային վագինիտ. հեշտոցային (վագինալ) սփրեյները, հեշտոցի խոռորի «ներքին» լվացումները, գրգռիչ նյութերը և սպերմիցիդային արտադրանքները կարող են առաջացնել հեշտոցի լորձաթաղանթի ալերգիկ ռեակցիա կամ գրգռում: Օտար մարմինները, օրինակ՝ թղթե անձեռոցիկները կամ «մոռացված» տամպոնները նույնպես կարող են գրգռել հեշտոցի նուրբ լորձաթաղանթը:
  • Դաշտանադադարի գենիտոուրինար համախտանիշ (հեշտոցային ատրոֆիա). դաշտանադադարից կամ ձվարանների վիրահատական հեռացումից հետո կնոջ օրգանիզմում էստրոգենների մակարդակը կտրուկ նվազում է, որը բերում է հեշտոցի լորձաթաղանթի հյուծման *(կոչվում է հետաճ կամ ատրոֆիա) և երբեմն՝ գրգռման ու չորացման («չոր հեշտոց»):

Ռիսկի գործոններ

Հեշտոցաբորբի զարգաման ռիսկը բարձրացնող գործոններից են՝

  • հորմոնալ տեղաշարժեր, օրինակ՝ հղիության հետ կապված, հակաբեղմնավորիչ հաբերի ընդունում կամ դաշտանադադարի ընթացքում (մենոպաուզա, կլիմաքս)
  • սեռական ակտիվ կյանք
  • որևէ ՍՃՓՀ առկայություն
  • դեղերի ընդունում, օրինակ՝ հակաբիոտիկներ և ստերոիդներ
  • որպես բեղմնականխիչ միջոց սպերմիցիդների օգտագործում (սպերմատոզոիդները ոչնչացնող քիմիական նյութեր)
  • ոչ պատշաճ բուժվող կամ հսկողությունից դուրս մնացած դիաբետ
  • գրգռիչ ազդեցությամբ հիգիենիկ արտադրանքների օգտագործում, օրինակ՝ վաննայի փրփուր, հեշտոցային (վագինալ) սփրեյներ կամ դեզադորանտներ
  • հեշտոցի խոռոչի «ներքին» լվացումներ
  • խոնավ կամ կիպ ներքնազգեստի կամ զգեստի կրում
  • որպես հակաբեղմնավորիչ միջոց ներարգանդային միջոցների օգտագործում:

Հոդվածը վերանայվել է՝ 30-03-2021