Ախտանիշներ - Վագինիտ

Հեշտոցաբորբի գանգատները և ախտանիշները կախված են առաջացման պատճառից:

Սակայն, վագինիտ ունեցող կանայք ավելի հաճախ նշում են՝

• հեշտոցային արտադրության գույնի, հոտի և քանակի փոփոխություն
• հեշտոցային քոր և գրգռվածություն
• ցավ սեռական հարաբերության ժամանակ
• ցավոտ միզարձակում (դիզուրիա)
• թեթև հեշտոցային արյունահոսություն կամ արյան հետքեր:

Եթե ունեք հեշտոցային արտադրություն, ապա արտադրուկի բնույթը կարող է հուշել ձեր վագինիտի տեսակի մասին:

• Բակտերիալ վագինոզ. ձեզ մոտ կարող է առաջանալ մոխրագույն-սպիտակ, տհաճ հոտով արտադրություն: Հոտը, որը հաճախ նկարագրվում է որպես ձկան հոտ, կարող է ավելի ակնհայտ դառնալ սեռական հարաբերությունից հետո:
• Խմորասնկիկային վարակ. հեշտոցային կանդիդոզի հիմնական ախտանիշը քորն է, սակայն դուք կարող եք ունենալ թանձր սպիտակ արտադրուկ, որը նման է կաթնաշոռի:
• Տրիխոմոնոզ. տրիխոմոնիազ կոչվող վարակը կարող է առաջացնել կանաչադեղնավուն, երբեմն փրփրուն արտադրուկ:

Ե՞րբ այցելել բժշկին

Այցելեք ձեր բժշկին, եթե ձեզ մոտ զարգացել են հեշտոցային ախտանիշներ, հատկապես հետևյալ դեպքերում:

• Դուք ունեք խիստ տհաճ հեշտոցային հոտ, արտադրություն կամ քոր:
• Դուք երբեք չեք ունեցել հեշտոցային վարակ: Ձեր բժշկին այցելելը կարող է պարզել պատճառը և օգնել ձեզ, որ սովորեք գանգատների ու ախտանիշների հայտնաբերումը:
• Դուք նախկինում ունեցել եք հեշտոցային վարակներ:
• Դուք ունեցել եք բազմաթիվ սեռական զուգընկերներ կամ վերջերս՝ նոր զուգընկեր: Դուք կարող եք ունենալ սեռական ճանապարհով փոխանցվող վարակ, որոնցից որոշներն ունեն այնպիսի գանգատներ և ախտանիշներ, որոնք նման են կանդիդոզային վարակի կամ բակտերիալ վագինոզի նշաններին:
• Դուք ավարտել եք առանց դեղատոմսի կանդիդոզի դեմ դեղամիջոցների կուրսը, բայց ձեր ախտանիշները պահպանվում են:
• Դուք ունեք ջերմություն, դող և սարսուռ կամ կոնքային ցավ:

Սպասողական մոտեցում

Հավանաբար կարիք չկա այցելել ձեր բժշկին ամեն անգամ, երբ ունեք հեշտոցային գրգռվածություն և արտադրություն, հատկապես, եթե՝

• նախկինում ունեցել եք հեշտոցային կանդիդոզային վարակի ախտորոշում, և ձեր գանգատներն ու ախտանիշները նույնն են, ինչ նախկինում
• գիտեք կանդիդոզային վարակի գանգատներն ու ախտանիշները և վստահ եք, որ դա այն է, ինչ ունեք: