Գրադարան

Թիրեոտոքսիկոզ. բարդություններ

Թիրեոտոքսիկոզ. բարդություններ

Time Read 2 րոպե

Թիրեոտոքսիկոզը կարող է բարդանալ տարբեր առողջական խնդիրներով:

Սրտային խնդիրներ

Թիրեոտոքսիկոզի ամենալուրջ բարդություններից մի քանիսը ներառում են սիրտը, այդ թվում՝

  • սրտի ռիթմի խանգարում, որը կոչվում է շողացող առիթմիա և բարձրացնում է ինսուլտի ռիսկը
  • կանգային սրտային անբավարարություն՝ հիվանդություն, երբ սիրտն այլևս անկարող է ապահովել օրգանիզմի պահանջներին բավարարող արյան շրջանառություն։

Փխրուն ոսկորներ

Չբուժված թիրեոտոքսիկոզը կարող է թուլացնել և փխրունացնել ոսկորները: Այս հիվանդությունը կոչվում է օստեոպորոզ: Ոսկորների ամրությունը մասամբ կախված է դրանց մեջ կալցիումի և մյուս միներալների քանակից: Վահանաձև գեղձի հորմոնների չափազանց մեծ քանակությունը դժվարացնում է կալցիումի ոսկորներ ներթափանցելը:

Տեսողության խնդիրներ

Թիրեոտոքսիկոզով որոշ մարդկանց մոտ զարգանում է թիրեոիդային աչքի հիվանդություն կոչվող խնդիրը: Այն ավելի տարածված է ծխող մարդկանց շրջանում: Այս հիվանդությունն ազդում է աչքը շրջապատող մկանների և մյուս հյուսվածքների վրա:

Թիրեոիդային աչքի հիվանդության ախտանիշները ներառում են՝

  • աչքերում ծակծկոցներ կամ մռմռոցի զգացողություն
  • աչքերում ճնշում կամ ցավ
  • փքված կամ ետ քաշված կոպեր
  • կարմրած կամ բորբոքված աչքեր
  • լուսազգայունություն
  • երկտեսություն։

Չբուժված մնալու դեպքում աչքի խնդիրները կարող են բերել տեսողության կորստի:

Գունափոխված, այտուցված մաշկ

Հազվադեպ Գրեյվսի հիվանդությամբ մարդկանց մոտ կարող է զարգանալ Գրեյվսի դերմոպաթիա: Սա հանգեցնում է նրան, որ մաշկը փոխում է գույնը և այտուցվում է, հաճախ՝ սրունքների և ոտքերի վրա:

Թիրեոտոքսիկ կրիզ

Այս խիստ հազվադեպ հանդիպող հիվանդությունը նաև կոչվում է թիրեոիդ փոթորիկ: Թիրեոտոքսիկոզը բարձրացնում է թիրեոտոքսիկ կրիզի ռիսկը: Այն առաջացնում է սուր, երբեմն կյանքին սպառնացող ախտանիշներ: Թիրեոտոքսիկ կրիզը պահանջում է անհետաձգելի բուժօգնություն: Ախտանիշները կարող են ներառել՝

  • տենդ
  • արագացած սրտազարկ
  • սրտխառնոց
  • փսխում
  • փորլուծություն
  • ջրազրկում
  • շփոթվածություն
  • զառանցանք (դելիրիում):

Հոդվածը տեղադրվել է՝ 06-05-2021 վերանայվել է՝ 09-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով