Բարդություններ - ՈւՊԳԽ

Ուշադրության պակասի գերակտիվության խանգարումը (ՈւՊԳԽ) կարող է դժվարացնել երեխաների կյանքը:

ՈւՊԳԽ ունեցող երեխաները՝

• հաճախ խնդիրներ են ունենում դասարանում, ինչը կարող է հանգեցնել ուսման ձախողման և առաջադիմության վատթարացման և այլ երեխաների ու չափահասների կողմից դիտողությունների կամ քննադատության
• հակված են ավելի շատ պատահարների և բոլոր տեսակի վնասվածքների, քան այն երեխաները, ովքեր չունեն ՈւՊԳԽ
• հակված են ունենալու վատ ինքնագնահատական
• ավելի հավանական է, որ դժվարություններ ունենան հասակակիցների և չափահասների հետ շփվելու և ընդունվելու համար
• ալկոհոլի և թմրամիջոցների չարաշահման և այլ հանցավոր վարքագծի վտանգի տակ են:

Զուգակցվող հիվանդություններ (համահիվանդություններ)

ՈւՊԳԽ-ը չի առաջացնում այլ հոգեբանական կամ զարգացման խնդիրներ: Այնուամենայնիվ, ՈւՊԳԽ ունեցող երեխաները ավելի հավանական է, քան մյուսները, որ ունենան նաև այնպիսի առողջական վիճակներ, ինչպիսիք ներկայացված է ստորև:

• Հակադրություն հրահրող խանգարում, որն ընդհանուր առմամբ սահմանվում է որպես հեղինակավոր գործիչների նկատմամբ բացասական, անհարկի և թշնամական վարքագծի դրսևորում:
• Վարքագծային (կոնդուկտիվ) խանգարում, որը դրսևորվում է հակասոցիալական պահվածքով, ինչպիսիք են գողությունը, կռվարարությունը, գույք փչացնելը և մարդկանց կամ կենդանիներին վնաս պատճառելը:
• Տրամադրության կարգավորման դեստրուկտիվ խանգարում, որը բնութագրվում է դյուրագրգռությամբ և հիասթափությանը դիմակայելու խնդիրներով:
• Ուսուցման խանգարումներ, ներառյալ կարդալու, գրելու, հասկանալու և հաղորդակցվելու հետ կապված խնդիրներ:
• Հոգեներգործուն նյութերի օգտագործման խանգարումներ, ներառյալ ապօրինի թմրամիջոցները, ալկոհոլը և ծխելը:
• Տագնապային խանգարումներ, որոնք կարող են առաջացնել ճնշող անհանգստություն և նյարդայնություն, և ներառում է կպչուն-սևեռուն (օբսեսիվ-կոմպուլսիվ) խանգարումը:
• Տրամադրության խանգարումներ, ներառյալ դեպրեսիան և բիպոլյար խանգարումը, որը ներառում է դեպրեսիա, ինչպես նաև մանիակալ վարք:
• Աուտիզմի սպեկտրի խանգարում` ուղեղի զարգացման հետ կապված վիճակ, որն ազդում է այն բանի վրա, թե ինչպես է մարդը ընկալում և շփվում ուրիշների հետ:
• Տիկ խանգարում կամ Տուրետի համախտանիշ՝ խանգարումներ, որոնք ներառում են կրկնվող շարժումներ կամ անցանկալի ձայներ (տիկ), որոնք չեն կարող հեշտությամբ կառավարվել։