ՈւՊԳԽ․ ինքնօգնություն

ՈւՊԳԽ․ ինքնօգնություն

Ուշադրության պակասի գերակտիվության խանգարումը (ՈւՊԳԽ) բարդ և տարբեր կլինիկական դրսևորումներով խնդիր է, ուստի դժվար է խորհուրդներ տալ, որոնք արդյունավետ կլինեն բոլոր երեխաների համար:

Այնուամենայնիվ, ստորև ներկայացված առաջարկները կարող են օգնել, որ ստեղծեք ՈւՊԳԽ-ով երեխայի հաջող բուժմանը նպաստող բարենպաստ միջավայր:

Երեխաների օժանդակությունը տանը

  • Ցուցադրե՛ք երեխային ձեր կապվածությունը. երեխաները կարիք ունեն լսելու և համոզվելու, որ սիրում և գնահատում եք նրանց: Միայն երեխայի վարքագծերի բացասական կողմերի վրա կենտրոնանալը կարող է խանգարել ձեր փոխհարաբերությանը և վատ անդրադառնալ նրա ինքնավստահության և ինքնագնահատականի վրա: Ցանկացած գործողությամբ, հույզերով և դիմախաղով ապացուցեք երեխային, որ մնում եք նրա ամենահավատարիմ մարդը:
  • Գտե՛ք երեխայի ինքնագնահատականի բարելավման ուղիներ. ՈւՊԳԽ-ով երեխաները հաճախ հաջողությունների են հասնում արվեստի ծրագրերում, երաժշտության, պարի կամ մարտարվեստի դասընթացներում: Ընտրեք այնպիսի զբաղմունք, որը համապատասխանում է երեխայի հետաքրքրություններին և ունակություններին: Բոլոր երեխաներն էլ ունեն հատուկ հմտություններ և տաղանդներ, որոնք կարող են զարգացվել և խրախուսվել: Փոքր, սակայն հաճախակի հաջողություններն օգնում են, որ երեխայի ինքնագնահատականն աստիճանաբար բարելավվի։
  • Օգտագործե՛ք պարզ բառեր և ցուցադրություններ, երբ երեխային ծանոթացնում եք ակնկալվող առաջադրանքին. խոսեք դանդաղ և հանգիստ և եղեք խիստ առանձնահատուկ և կոնկրետ: Խուսափեք միաժամանակ մի քանի հրահանգ տալուց: Մինչև երեխային որևէ առաջադրանք տալը ստեղծեք տեսողական շփում:
  • Հայտնաբերե՛ք երեխայի համար դժվար իրավիճակները. փորձեք խուսափել այնպիսի իրավիճակներից, որոնք երեխային պատճառում են դժվարություններ, օրինակ՝ երկարատև միջոցառումներին մասնակցություն, գնումներ հիպերմարկետներում և այլն:
  • Փորձեք պահպանել երեխայի ճաշելու, ցերեկները ննջելու և երեկոյան քնի հստակ օրակարգ. ՈւՊԳԽ-ով երեխաները դժվարությամբ են ընդունում և հարմարվում փոփոխություններին: Օգտագործեք մեծ օրացույց, որ նշեք մոտակա շաբաթների մեծ իրադարձությունները: Խուսափեք կամ առնվազն զգուշացրեք երեխային օրակարգի կտրուկ փոփոխությունների մասին:
  • Խրախուսե՛ք սոցիալական փոխազդեցությունը. օգնեք երեխային, որ սովորի սոցիալական հմտությունները՝ մոդելավորելով, բացատրելով և խրախուսելով հասակակիցների հետ դրական հարաբերությունները:
  • Երեխայի մոտ ամրապնդե՛ք առողջ ապրելակերպի դրույքները. համոզվեք, որ երեխան բավարար չափով հանգստանում է: Փորձեք ամեն կերպ նրան հեռու պահել գերհոգնածությունից, որը հաճախ վատթարացնում է ՈւՊԳԽ ախտանիշները: Կարևոր է նաև, որ երեխայի սննդակարգը լինի հավասարակշռված, որը նպաստում է առողջ զարգացմանը։ Առողջական օգուտներից բացի կանոնավոր վարժանքները կարող են դրականորեն ազդել երեխայի վարքագծերի վրա, եթե զուգակցվում է բուժման հետ:

Երեխաների օժանդակությունը դպրոցում

Իրազեկվեք ՈւՊԳԽ-ի և վերջինիս հաղթահարման ուղիների մասին այն ամենի մասին, ինչ կարող է օգնել երեխային: Հիշեք, որ դուք եք ձեր երեխայի լավագույն պաշտպանը:

  • Հարցրե՛ք դժրոցական ծրագրերի մասին. հետաքրքրվեք, թե հատուկ կրթություն կամ օժանդակություն տրամադրող ինչպիսի ծառայություններ ունի երեխայի կրթօջախը: Զրուցեք այս թեմայով համապատասխան մասնագետների, ինչպես նաև երեխայի բժշկի հետ:
  • Զրուցեք երեխայի դաստիարակների կամ ուսուցիչների հետ. պահեք սերտ հարաբերություն նրանց հետ և օգտագործեք ուսուցիչների ջանքերը՝ ուղղված դասասենյակում երեխայի օժանդակությանը։ Խնդրեք նրանց, որ ուշադիր լինեն երեխայի աշխատանքների և պահվածքի նկատմամբ, ինչպես նաև բաց չթողնեն առիթը՝ խրախուսելու նրա հաջողությունները։

Հոդվածը վերանայվել է՝ 27-06-2021