Ախտանիշներ - Ալերգիաներ

Ալերգիայի ախտանիշները, որոնք կախված են ներգրավված նյութից՝ ալերգենից և դրա ազդեցության տեսակից, կարող են ազդել ձեր շնչուղիների, քթային անցուղիների և հարքթային ծոցերի, մաշկի և մարսողական համակարգի վրա:

Ալերգիկ ռեակցիաները կարող են ընթանալ թեթևից մինչև ծանր ախտանիշներով: Որոշ ծանր դեպքերում սուր ալերգիան կարող է նպաստել կյանքին սպառնացող գերծանր ռեակցիայի զարգացմանը, որը հայտնի է որպես անաֆիլաքսիա:

Խոտային տենդը, որը նաև կոչվում է ալերգիկ ռինիտ (ալերգիկ հարբուխ), կարող է առաջացնել՝

• փռշտոց
• քթի, աչքերի կամ բերանի «առաստաղի» (կարծր քիմք) քորի զգացում
• քթահոսություն (հարբուխ) կամ լցվածության, փակվածության զգացում
• ջրակալած, կարմրած կամ այտուցված աչքեր (կոնյուկտիվիտ):

Սննդային ալերգիան կարող է առաջացնել՝

• բերանում ծակոցներ
• շրջունքների, լեզվի, դեմքի կամ ըմպան-կոկորդի այտուց
• եղնջացան
• անաֆիլաքսիա:

Միջատի խայթոցից ալերգիան կարող է առաջացնել՝

• խայթոցի տեղում այտուցված մեծ դաշտ
• ամբողջ մարմնով տարածվող քոր կամ եղնջացան
• հազ, կրծքավանդակի լարվածություն, շնչելիս՝ խզզոցներ կամ շնչարգելություն (հևոց)
• անաֆիլաքսիա:

Դեղորայքային ալերգիան կարող է առաջացնել՝

• եղնջացան
• մաշկի քոր
• մաշկի ցանավորում
• դեմքի այտուցվածություն
• շնչառական խզզոցներ
• անաֆիլաքսիա:

Ատոպիկ դերմատիտը, որը մաշկի ալերգիկ հիվանդություն է և նաև կոչվում է նաև էկզեմա, կարող է առաջացնել՝

• քոր
• մաշկի վրա կարմիրից մինչև շագանակագույն-մոխրագույն օջախներ
• հաստացած, կոպտացած և ճաքճքած ալրանման թեփոտ մաշկ

Անաֆիլաքսիա

Ալերգիայի որոշ տեսակներ, այդ թվում՝ սննդային և միջատի խայթոցից ալերգիաները կարող են խթանել գերսուր ալերգիկ ռեակցիա, որը հայտնի է որպես անաֆիլաքսիա: Անաֆիլաքսիան կյանքին սպառնացող վիճակ է, որը կարող է առաջացնել անհետաձգելի բուժօգնություն պահանջող շոկ:

Անաֆիլաքսիայի ախտանիշներից են՝

• գիտակցության կորուստ
• արյան ճնշման կտրուկ անկում (հիպոտենզիա կամ կոլապս)
• սուր շնչարգելություն և հևոց
• մաշկի ցան
• գլխապտույտ կամ ուշագնացության զգացում
• հաճախացած և թույլ սրտազարկ (տախիկարդիա)
• սրտխառնոց և փսխում:

Ե՞րբ դիմել բժշկին

Դուք կարող եք այցելել բժշկին, եթե ունեք ախտանիշներ, որոնք ըստ ձեզ կապված են ալերգիայի հետ և սովորական հակաալերգիկ դեղերով բավարար չեն մեղմանում: Եթե նոր դեղեր ընդունելուց հետո ունեք գանգատներ, տեղեկացրեք այդ մասին դրանք նշանակած բժշկին:

Եթե ձեզ մոտ կամ ձեր շրջապատում մեկնումեկի մոտ առկա է անաֆիլաքսիայի հասցնող սուր ալերգիկ ռեակցիա, առանց հապաղելու զանգահարեք 1-03 և կանչեք շտապ օգնություն:

Եթե ձեզ մոտ պահում եք Էպինեֆրինի ինքնաներարկիչ (Աուվի-Q, ԷլիՓեն և այլն), անմիջապես ներարկեք ինքներդ ձեզ:

Նույնիսկ եթե Էպինեֆրինի ներարկումից հետո ձեր ախտանիշները մեղմանում են, զանգեք 1-03 և կանչեք շտապբուժօգնություն կամ խնդրեք մեկնումեկին, որ ձեզ հասցնի մոտակա հիվանդանոց: