Հիշողության կորուստ (ամնեզիա)

Այն, որ բոլորս էլ երբեմն մոռանում ենք վայրկյաններ առաջ լսած անունը, նորմալ է։

Սակայն լինում են դեպքեր, երբ հիշողության կորուստը վերածվում է առողջական և սոցիալական խնդրի։ Օրինակ, արդեն նորմալ չի կարելի համարել այնպիսի իրավիճակները, երբ ինչ-որ մեկը մշտապես մեծ ջանք պետք է գործադրի, որ հիշի իր կամ իր ընտանիքի անդամների անունները կամ վաղուց հայտնի առարկաների անունները։

Ամնեզիան հիշողության կորուստն է։ Ամնեզիայով մարդիկ դժվարությամբ են կարողանում մտապահել նոր բաները կամ վերհիշել (կամ չկարողանալ մտաբերել) ավելի վաղ տեղի ունեցած իրադարձությունները և գործերը։ Նրանք նաև կարող են ընկնել խառնաշփոթ իրավիճակների մեջ։

Սակայն ոչ բոլոր դեպքերում է ամնեզիան ստանում նման ծանր ընթացք։ Ավելի հաճախ տեղ է գտնում մասնակի ամնեզիան՝ հիշողության ոչ լիարժեք կամ մասնակի կորուստը։

Հիշողության կորուստն ինքնուրույն հիվանդություն կամ վիճակ չէ։ Այն ավելի հաճախ այլ հիվանդության կամ վիճակի ախտանշաններից մեկն է։ Հիշողության կորուստը սովորաբար ունենում է ժամանակավոր բնույթ, թեև որոշ իրավիճակներում կարող է դառնալ կայուն կամ մնայուն։

Ամնեզիան կարող է զարգանալ գլխուղեղի այն շրջանների վնասման ժամանակ, որոնք պատասխանատու են հիշողության համար։ Օրինակներից են՝ ուղեղի ցնցում կամ գլխուղեղի ավելի լուրջ վնասվածքներ, ինսուլտ կամ գլխուղեղի բորբոքային հիվանդություններ։ Այլ դեպքերում ամնեզիա կարող է զարգանալ հոգեբանական իրավիճակներից, թուլամտությունից (դեմենցիա), ալկոհոլի և թմրամիջոցների օգտագործումից կամ չարաշահումից և այլն:

Եթե դուք կամ ինչ-որ մեկը դժվարանում է հիշել այնպիսի բաներ, ինչպիսիք են ընտանիքի անդամների կամ մոտիկ հարազատների ու ընկերների անունները, ապա պետք է դիմել բժշկի։ Նույն կերպ, եթե հիշողության կորուստն առաջացել է գլխի վնասվածքից հետո, առանց հետաձգելու բժշկին դիմելը դառնում է պարտադիր։

Բժիշկը կզրուցի ձեզ հետ և կզննի ձեզ, իսկ անհրաժեշտության դեպքում կառաջարկի որոշ հետազոտություններ՝ ուղղված հիշողության կորստի բնույթի և չափի գնահատմանը և գլխուղեղի վնասվածքների կամ ախտահարումների հայտնաբերմանը:

Սակայն, եթե ձեզ մոտ ախտորոշվել է մնայուն ամնեզիա, նշանակված բուժումից զատ, ինքներդ կարող եք մշակել որոշ մոտեցումներ, որ բարելավեք ձեր հիշողությունը կամ նվազեցնեք ամնեզիայի բացասական ազդեցությունը ձեր և ձեր ընտանիքի անդամների առօրյա կյանքի վրա։

Առաջարկում ենք նաև դիտել հիշողության խանգարումների վերաբերյալ տեսանյութ

Հոդվածը վերանայվել է՝ 05-05-2021