Ախտորոշում - Ամնեզիա

Ամնեզիայի ախտորոշման համար անհրաժեշտ է համապարփակ գնահատում:

Այն կարող է բացառել հիշողության կորստի այլ հնարավոր պատճառները, ինչպիսիք են Ալցհեյմերի հիվանդությունը, դեմենցիայի այլ ձևերը, դեպրեսիան կամ գլխուղեղի ուռուցքը:

Հիվանդության պատություն (անամնեզ)

Գնահատումը սկսվում է հիվանդության պատմության մանրակրկիտ ուսումնասիրությունից: Քանի որ հիշողության կորուստ ունեցող անձը կարող է չկարողանալ մանրամասն տեղեկատվություն տրամադրել, այն սովորաբար ստացվում է ընտանիքի անդամից, ընկերոջից կամ մեկ այլ խնամակալից:

Ձեր բժիշկը կարող է ձեզ մի քանի հարց տալ, որը նրան կօգնի հասկանալու ձեր հիշողության կորստի բնույթը և ծավալը: Սա թույլ է տալիս լուծել հետևյալ խնդիրները՝

• հիշողության կորստի տեսակը և արդյոք դա վերաբերվում է վերջին դեպքերին կամ երկարաժամկետ է
• երբ են սկսվել հիշողության խնդիրները և ինչպես են դրանք զարգացել
• հիշողության հետ կապված խնդիրներ առաջացնող գործոնները, ինչպիսիք են գլխի վնասվածքը, ինսուլտը կամ վիրահատությունը
• ընտանեկան պատմություն (անամնեզ), հատկապես նյարդաբանական հիվանդության վերաբերյալ
• ապօրինի թմրամիջոցների և ալկոհոլի օգտագործումը
• այլ ախտանիշները, ինչպիսիք են շփոթվածությունը, լեզվական խնդիրները, անձնային փոփոխությունները կամ ինքնասպասարկման անկարողությունը
• ցնցումների, գլխացավերի, դեպրեսիայի կամ քաղցկեղի պատմությունը:

Ֆիզիկական քննություն (բուժզննում)

Բուժզննումը կարող է ներառել նյարդաբանական հետազոտություն՝ ռեֆլեքսները, զգացողական գործառույթները և հավասարակշռությունը ստուգելու համար:

Կոգնիտիվ (ճանաչողական) թեստեր

Սա սովորաբար ներառում է թեստեր՝ կապված մտածողության, դատողության և վերջին և երկարաժամկետ հիշողության հետ: Բժիշկը ձեզ կհարցնի ընդհանուր տեղեկությունների մասին ձեր գիտելիքները, օրինակ՝ ներկայիս նախագահի անունը, ինչպես նաև անձնական տեղեկությունների և անցյալի իրադարձությունների մասին: Ձեզնից կարող է պահանջվել կրկնել բառերի ցանկ:

Հիշողության գնահատումը կարող է օգնել որոշելու հիշողության կորստի չափը և տրամադրել պատկերացում այն մասին, թե ինչպիսի օգնություն կարող է ձեզ անհրաժեշտ լինել:

Ախտորոշիչ թեստեր

Ձեր բժիշկը նաև կարող է առաջարկել՝

• պատկերային հետազոտություններ, ներառյալ ԿՏ կամ ՄՌՏ, որ ստուգի գլխուղեղի վնասումը կամ կառուցվածքային փոփոխությունները, ինչպիսին է ծավալի փոքրացումը
• արյան թեստեր, որ ստուգի վարակի, սննդանյութերի անբավարարության կամ այլ խնդիրների առկայությունը
• էլեկտրոէնցեֆալոգրաֆիա (ԷԷԳ), որ ստուգի ձեր գլխուղեղի ցնցումային ակտիվության առկայությունը: