Կրծքահեղձուկ (ստենոկարդիա)

Եթե երբևէ ունեցել եք ետկրծոսկրային շրջանի ցավեր, հավանաբար կհիշեք, թե ինչպիսի վախ է այն ձեզ պատճառել:

Ետկրծոսկրային ցավերը կարող են առաջանալ տարբեր պատճառներից: Սակայն նման գանգատ ունենալիս բոլորիս մտքին առաջին հերթին գալիս է սրտամկանի ինֆարկտը, որից հետո՝ կրծքահեղձուկը (մյուս անվանումն է՝ ստենոկարդիա): Երկու դեպքում էլ անհրաժեշտ է անհետաձգելի բուժօգնություն:

Կրծքահեղձուկի դասական գանգատը ետկրծոսկրային ցավն է կամ անհարմարավետության զգացումը (դիսկոմֆորտ), որը հաճախ նկարագրվում է որպես սեղմող կամ ճնշող բնույթ ունեցող և հաճախ ուղեկցվում է այլ նշաններով՝ օդի պակասի զգացում, առատ քրտնարտադրություն, կանանց մոտ՝ ստամոքսի շրջանի ցավեր և այլն:

Եթե ձեզ մոտ առկա են այս նշաններից մեկնումեկը, շտապ կապ հաստատեք ձեր բժշկի հետ: Եթե ձեր ցավերը տևում են ավելի քան 10 րոպե, անհապաղ զանգեք 1-03 և կանչեք շտապբուժօգնություն:

Կրծքահեղձուկի պատճառը սրտամկանի անբավարար արյունամատակարարումն է: Սրտի խոռոչներում կա արյան բավարար պաշար, սակայն այդ արյունը նախատեսված է ձեր մյուս օրգաններն արյունամատակարարելու համար: Սրտամկանն արյուն ստանում է պսակային զարկերակներով, որոնք տեղակայված են դրսից՝ սրտի արտաքին պատին:

Եթե դուք ունեք սրտի իշեմիկ հիվանդություն (հայտնի է նաև որպես պսակային զարկերակային հիվանդություն), այս զարկերակների լուսանցքը նեղանում է ճարպային կուտակումներով և չի հասցնում սրտամկանին ապահովել բավարար քանակի արյունով, այսինքն՝ բավարար չափի թթվածնով: Արդյունքում առաջանում է սրտամկանի իշեմիա:

Կրծքահեղձուկն ախտորոշելիս ձեր բժիշկը կզրուցի ձեզ հետ՝ ուշադրություն դարձնելով ձեր գանգատներին և դրանց ուղեկցող երևույթներին, կզննի ձեզ և հավանաբար կնշանակի որոշ հետազոտություններ, այդ թվում՝ էլեկտրասրտագրություն (ԷՍԳ, ЭКГ), սթրես-թեստ, էխոսրտագրություն (սրտի «էխո»), կորոնարոգրաֆիա և այլն:

Կրծքահեղձուկի բուժման նպատակը ձեր գանգատները մեղմացնելն է և սրտամկանի սուր ինֆարկտի զարգացման ռիսկը նվազեցնելը: Բժիշկը նշանակում է տարբեր խմբերի դեղեր, սակայն դուք ևս կարող եք օգնել ինքներդ ձեզ հետևյալ միջոցառումներով՝

  • ավելի առողջ սննդակարգ
  • ֆիզիկական ակտիվության բարձրացում (զգուշությամբ և բժշկի հսկողությամբ)
  • սթրեսի կրճատում
  • եթե ծխող եք, ապա ծխելու դադարեցում:

Եթե կրծքահեղձուկն ունի ծանր ընթացք և մեծ է սրտամկանի ինֆարկտի կամ սրտանոթային այլ բարդությունների հավանականությունը, ձեզ կարող են առաջարկել անգիոպլաստիկա (պսակային զարկերակի ստենտավորում) կամ վիրահատական բուժման այլ միջամտություններ:

Ի՞նչ անել, եթե ինձ մոտ կրծքահեղձուկ է

Եթե ձեզ մոտ կան կրծքահեղձուկի նշաններ, անմիջապես դադարեցրեք որևէ գործ անելը, նստեք և փորձեք հանգստանալ:

Եթե գանգատները չեն մեղմանում կամ մինչև վերջ չեն վերանում, ընդունեք ձեր սովորական հակահեղձուկային այն դեղը, որը նման նոպայի առաջացման դեպքերի համար նշանակել է բժիշկը:

Եթե 5 րոպե անց ձեր գանգատները շարունակվում են, ընդունեք այդ դեղի երկրորդ դեղաչափը: Դիմեք որևէ մեկին ձեր վիճակի մասին՝ հարևանությամբ գտնվող անձանց կամ հեռախոսով՝ ձեր մտերիմներից մեկնումեկին:

Եթե, այնուամենայնիվ, 5 րոպե անց ձեր գանգատները չեն մեղմանում կամ ավելի են ծավալվում, անհապաղ զանգեք 1-03 և կանչեք շտապբուժօգնություն:

Հոդվածը վերանայվել է՝ 30-03-2021