Կրծքային հեղձուկ (ստենոկարդիա)

Կրծքային հեղձուկ (ստենոկարդիա)
Անգլերեն անվանումը՝ Angina, Angina Pectoris

Եթե երբևէ ունեցել եք կրծքավանդակի շրջանի ցավեր, հավանաբար կհիշեք, թե ինչպիսի վախ է այն ձեզ պատճառել:

Կրծքավանդակի շրջանի ցավերը կարող են առաջանալ տարբեր պատճառներից: Սակայն նման գանգատ ունենալիս բոլորիս մտքին առաջին հերթին գալիս է սրտամկանի ինֆարկտը, որից հետո՝ կրծքային հեղձուկը (մյուս անվանումն է՝ ստենոկարդիա): Երկու դեպքում էլ անհրաժեշտ է անհետաձգելի բուժօգնություն:

Կրծքային հեղձուկի ախտանիշները

Կրծքային հեղձուկը սովորաբար առաջացնում է հետևյալ նշանները՝

  • կրծքավանդակի շրջանում ցավ կամ անհարմարության զգացում (դիսկոմֆորտ), որը հաճախ նկարագրվում է որպես սեղմող կամ ճնշող բնույթ ունեցող
  • ցավեր ձեռքերում, ուսերի շրջանում, պարանոցում կամ թիկունքում, երբեմն ինքնուրույն՝ առանց կրծքավանդակի ցավերի
  • օդի պակասի զգացում
  • ընդհանուր թուլություն
  • առատ քրտնարտադրություն
  • գլխապտույտ
  • նողկանքի զգացում:

Եթե ձեզ մոտ առկա են այս նշաններից մեկնումեկը, շտապ կապ հաստատեք ձեր բժշկի հետ: Եթե ձեր ցավերը տևում են ավելի քան 10 րոպե, անհապաղ զանգեք 1-03 և կանչեք շտապբուժօգնություն:

Ի՞նչն է կրծքային հեղձուկի պատճառը

Կրծքային հեղձուկի պատճառը սրտամկանի անբավարար արյունամատակարարումն է:

Սրտի խոռոչներում կա արյան բավարար պաշար, սակայն այդ արյունը նախատեսված է ձեր մյուս օրգաններն արյունամատակարարելու համար: Սրտամկանն արյուն ստանում է պսակային զարկերակներով, որոնք տեղակայված են դրսից՝ սրտի արտաքին պատին:

Եթե դուք ունեք սրտի պսակային զարկերակների հիվանդություն (հայտնի է նաև որպես սրտի իշեմիկ հիվանդություն), այս զարկերակների լուսանցքը նեղանում է ճարպային կուտակումներով և չի հասցնում սրտամկանին ապահովել բավարար քանակի արյունով, այսինքն՝ բավարար չափի թթվածնով և սննդանյութերով: Արդյունքում առաջանում է սրտամկանի իշեմիա:

Կրծքային հեղձուկի ախտորոշումը

Կրծքային հեղձուկն ախտորոշելիս ձեր բժիշկը կզրուցի ձեզ հետ՝ ուշադրություն դարձնելով ձեր գանգատներին և դրանց ուղեկցող երևույթներին, կզննի ձեզ և հավանաբար կնշանակի որոշ հետազոտություններ, այդ թվում՝

Ի՞նչ անել, եթե ինձ մոտ կրծքային հեղձուկ է

Եթե ձեզ մոտ կան կրծքային հեղձուկի նշաններ, անմիջապես դադարեցրեք որևէ գործ անելը, նստեք և փորձեք հանգստանալ:

Եթե գանգատները չեն մեղմանում կամ մինչև վերջ չեն վերանում, ընդունեք ձեր սովորական հակահեղձուկային այն դեղը, որը նման նոպայի առաջացման դեպքերի համար ձեզ նշանակել է բժիշկը:

Եթե 5 րոպե անց ձեր գանգատները շարունակվում են, ընդունեք այդ դեղի երկրորդ դեղաչափը: Դիմեք որևէ մեկին ձեր վիճակի մասին՝ հարևանությամբ գտնվող անձանց կամ հեռախոսով՝ ձեր մտերիմներից մեկնումեկին:

Եթե, այնուամենայնիվ, 5 րոպե անց ձեր գանգատները չեն մեղմանում կամ ավելի են ծավալվում, անհապաղ զանգեք 1-03 և կանչեք շտապբուժօգնություն:

Կրծքային հեղձուկի երկարատև բուժումը

Կրծքային հեղձուկի բուժման նպատակը գանգատները մեղմացնելն է և սրտամկանի սուր ինֆարկտի կամ ինսուլտի զարգացման ռիսկերը նվազեցնելը:

Չափավոր ընթացքով կրծքային հեղձուկը կարող է հաջողությամբ մեղմացվել հետևյալ միջոցառումներով՝

  • ավելի առողջ սննդակարգ
  • ֆիզիկական ակտիվության բարձրացում (զգուշությամբ և բժշկի հսկողությամբ)
  • սթրեսի կրճատում
  • եթե ծխող եք, ապա ծխելու դադարեցում:

Բժիշկը կարող է նշանակել որոշ հակահեղձուկային դեղեր, օրինակ՝ նիտրատներ (որոնք թուլացնում են ձեր ծայրամասային անոթները՝ նվազեցնելով սրտամկանի ծանրաբեռնվածությունը), բետա-բլոկատորներ կամ ասպիրին:

Եթե կրծքային հեղձուկն ունի ծանր ընթացք և մեծ է սրտամկանի ինֆարկտի կամ սրտանոթային այլ բարդությունների հավանականությունը, ձեզ կարող են առաջարկել անգիոպլաստիկա (պսակային զարկերակի ստենտավորում) կամ վիրահատական բուժման այլ միջամտություններ:

Հոդվածը վերանայվել է՝ 22-05-2019