Ախտանիշներ - Աորտալ ստենոզ

Աորտայի փականի նեղացումը (ստենոզը) ունի տարբեր՝ սկսած թեթևից մինչև ծանր ընթացք:

Ախտանիշները սովորաբար դրսևորվում են, երբ փականի նեղացումը արտահայտված է: Աորտայի փականի ստենոզով որոշ մարդիկ կարող են երկար տարիներ ախտանիշներ չունենալ:

Աորտայի փականի ստենոզի ախտանիշները կարող են ներառել հետևյալը՝

• ստետոսկոպով լսվող սրտի անկանոն ձայն (սրտի աղմուկ)
• ֆիզիկական ակտիվության ժամանակ կրծքավանդակային ցավ (կրծքահեղձուկ) կամ կրծավանդակի սեղմման-ճնշման զգացում
• ֆիզիկական ակտիվության ժամանակ գլխապտույտ, ուշաթափության զգացում կամ ուշագնացություն
• շնչարգելություն և հևոց, հատկապես ֆիզիկական ակտիվության դեպքում
• հոգնածություն, հատկապես ֆիզիկական ակտիվության բարձրացման ժամանակ
• արագ, թրթռացող («թփրտացող») սրտազարկ (սրտխփոց)
• ոչ բավարար սնվելը (գլխավորապես երեխաների մոտ)
• ոչ բավարար մարմնի քաշ հավաքելը (գլխավորապես երեխաների մոտ):

Աորտայի փականի ստենոզը կարող է հանգեցնել սրտային անբավարարության: Սրտային անբավարարության ախտանիշները ներառում են հոգնածություն, շնչարգելություն (հևոց) և կոճերի և ոտնաթաթերի այտուցվածություն:

Ե՞րբ դիմել բժշկին

Եթե ձեզ մոտ զարգանում են ախտանիշներ, որոնք կարող են հուշել աորտայի փականի ստենոզի մասին, պայմանավորվեք և այցելեք ձեր բժշկին: