Գրադարան

Նախասրտերի ֆիբրիլյացիա. բուժում

Նախասրտերի ֆիբրիլյացիա. բուժում

Time Read 3 րոպե

Նախասրտերի ֆիբրիլյացիայի բուժումը կախված է նրանից, թե որքան ժամանակ եք ունեցել այս առիթմիան, ձեր ախտանիշներից և սրտազարկի խնդրի հիմքում ընկած պատճառից:

Բուժման նպատակներն են՝

  • վերականգնել սրտի ռիթմը
  • վերահսկեք սրտի հաճախականությունը
  • կանխարգելել արյան մակարդումը (թրոմբ), որը կարող է հանգեցնել ինսուլտի:

Նախասրտերի ֆիբրիլյացիայի բուժումը կարող է ներառել`

  • դեղորայք
  • սրտի ռիթմը վերականգնելու թերապիա (կարդիովերսիա)
  • վիրահատություն կամ կաթետերային միջամտություն:

Միասին դուք և ձեր բժիշկները կքննարկեք ձեզ համար լավագույն բուժման տարբերակը: Կարևոր է հետևել նախասրտերի ֆիբրիլյացիայի բուժման ծրագրին: Եթե ​​նախասրտերի ֆիբրիլյացիան լավ չի վերահսկվում, դա կարող է հանգեցնել այլ բարդությունների, այդ թվում՝ ինսուլտների և սրտային անբավարարության:

Դեղորայքային բուժում

Ձեզ կարող են նշանակել դեղեր՝ վերահսկելու, թե որքան արագ է ձեր սիրտը կծկվում և վերականգնել այն նորմալ մակարդակի: Դեղեր նշանակվում են նաև նախասրտերի ֆիբրիլյացիայի վտանգավոր բարդության՝ արյան մակարդուկների (թրոմբների) կանխարգելման համար:

Նախասրտերի ֆիբրիլյացիայի բուժման համար օգտագործվող դեղամիջոցները ներառում են հետևյալը:

  • Բետա-պաշարիչներ. այս դեղամիջոցները կարող են օգնել դանդաղեցնելու սրտազարկը հանգստի և գործունեության ընթացքում:
  • Կալցիումական անցուղիների պաշարիչներ. այս դեղամիջոցները վերահսկում են սրտի զարկերը, սակայն դրանցից պետք է խուսափել նրանք, ովքեր ունեն սրտային անբավարարություն կամ ցածր արյան ճնշում:
  • Դիգոքսին. այս դեղամիջոցը կարող է վերահսկել սրտազարկը հանգստի ժամանակ, սակայն ոչ այնքան լավ՝ գործունեության ընթացքում: Մարդկանց մեծամասնության համար անհրաժեշտ են լրացուցիչ կամ այլընտրանքային դեղամիջոցներ, ինչպիսիք են կալցիումական անցուղու պաշարիչները կամ բետա պաշարիչները:
  • Հակաառիթմիկ դեղամիջոցներ. այս դեղերն օգտագործվում են սրտի նորմալ ռիթմը պահպանելու համար, այլ ոչ միայն սրտի հաճախությունը վերահսկելու համար: Դրանք հակված են ավելի շատ կողմնակի ազդեցություններ ունենալ, քան այն դեղամիջոցները, որոնք վերահսկում են սրտի հաճախականությունը, ուստի հակաառիթմիկներն ավելի քիչ են օգտագործվում:
  • Արյունը նոսրացնողներ. արյան մակարդուկների (թրոմբների) հետևանքով առաջացած ինսուլտի կամ այլ օրգանների վնասման ռիսկը նվազեցնելու համար բժիշկը կարող է նշանակել արյունը նոսրացնող դեղամիջոց (հակակագուլանտ): Արյան նոսրացնող միջոցները ներառում են՝ Վարֆարին (Յանտովեն), Ապիքսաբան (Էլիքվիս), Դաբիգատրան (Պրադաքսա), Էդոքսաբան (Սավայսա) և Ռիվարոքսաբան (Քսարելտո): Եթե ​​դուք Վարֆարին եք ընդունում, պետք է կանոնավոր արյան թեստեր անցնեք՝ դեղամիջոցի ազդեցությունը վերահսկելու համար:

Կարդիովերսիա

Եթե ​​նախասրտերի ֆիբրիլյացիայի ախտանիշներն անհանգստացնող են կամ եթե սա նախասրտերի ֆիբրիլյացիայի առաջին դրվագն է, բժիշկը կարող է փորձել վերականգնել սրտի ռիթմը (սինուսային ռիթմը)՝ օգտագործելով կարդիովերսիա կոչվող միջոցառումը:

Կարդիովերսիան կարող է իրականացվել երկու եղանակով:

  • էլեկտրական կարդիովերսիա. սրտի ռիթմը վերականգնելու այս մեթոդը կատարվում է կրծքավանդակի վրա դրված թիակների կամ էլեկտրոդների միջոցով սրտին էլեկտրական հոսանք ուղարկելու (լիցքաթափելու) միջոցով: Սա ցավոտ միջամտություն է, ուստի պահանջում է հանգստացնող դեղամիջոցներ կամ մակերեսային ընդհանուր անզգայացում։
  • Դեղորայքային կարդիովերսիա. սրտի ռիթմը վերականգնելու համար օգտագործվում են ներերակային կամ բերանի միջոցով տրվող դեղամիջոցներ:

Կարդիովերսիան սովորաբար կատարվում է հիվանդանոցում՝ որպես պլանավորված պրոցեդուրա, սակայն այն նաև կարող է անցկացվել անհետաձգելի իրավիճակներում: Եթե ​​դա նախատեսված է, Վարֆարին (Յանտովեն) կամ արյան մեկ այլ նոսրացուցիչ կարող է տրվել դրա ավարտից մի քանի շաբաթ առաջ՝ նվազեցնելու արյան մակարդուկի և ինսուլտի ռիսկը:

Էլեկտրական կարդիովերսիայից հետո հակաառիթմիկ դեղամիջոցները կարող են նշանակվել անորոշ ժամանակով, որոնք կօգնեն կանխելու նախասրտերի ֆիբրիլյացիայի հետագա դրվագները: Անգամ դեղորայքի դեպքում, կա նախասրտերի ֆիբրիլյացիայի հերթական դրվագի հավանականությունը:

Վիրահատական կամ կաթետերիզացիայի միջամտություններ

Եթե նախասրտերի ֆիբրիլյացիան չի լավանում դեղորայքի կամ այլ թերապիայի միջոցով, բժիշկը կարող է խորհուրդ տալ այնպիսի միջամտություն, որը կոչվում է սրտային աբլացիա: Երբեմն աբլացիան որոշ հիվանդների համար առաջին բուժումն է:

Սրտային աբլացիան օգտագործում է ջերմություն (ռադիոհաճախականության էներգիա) կամ խիստ սառեցում (կրիոաբլացիա)՝ ձեր սրտում սպիներ ստեղծելու համար, որոնք արգելափակում են ոչ նորմալ էլեկտրական ազդանշանները և վերականգնում նորմալ սրտազարկը: Բժիշկը սրտի մեջ ներմուծում է ճկուն խողովակ (կաթետեր) արյունատար անոթի միջով, սովորաբար՝ ձեր աճուկից և սրտի մեջ: Կարող է օգտագործվել մեկից ավելի կաթետեր: Կաթետերի ծայրին առկա սենսորները առաջացնում են սառը կամ ջերմային էներգիա: Ավելի հազվադեպ, աբլացիան կատարվում է վիրաբուժական նշտարի միջոցով՝ բաց սրտի վիրահատության ժամանակ:

Կան սրտի աբլացիայի տարբեր տեսակներ: Նախասրտերի ֆիբրիլյացիայի բուժման համար օգտագործվող տեսակը կախված է ձեր առանձնահատուկ ախտանիշներից, ընդհանուր առողջական վիճակից և նախկինում կատարված սրտի այլ վիրահատությունից:

Այնուամենայնիվ, սրտի աբլացիայից հետո նախասրտերի ֆիբրիլյացիան կարող է վերադառնալ: Եթե ​​դա տեղի ունենա, կարող է առաջարկվել մեկ այլ սրտի աբլացիա կամ այլ բուժում: Սրտի աբլացիայից հետո կարող են անհրաժեշտ լինել ամբողջ կյանքի ընթացքում արյունը նոսրացնող դեղամիջոցներ՝ ինսուլտները կանխելու համար:

Եթե նախասրտերի ֆիբրիլյացիա ունեցող անձը չի կարող ընդունել արյունը նոսրացնող դեղամիջոցներ, բժիշկը կարող է խորհուրդ տալ կաթետերային միջատություն՝ սրտի ձախ վերին խոռոչում փոքր պարկը (հավելվածը) փակելու համար, որտեղ ձևավորվում են առիթմիայի այս տեսակի հետ կապված թրոմբների մեծ մասը: Այս միջամտությունը կոչվում է ձախ նախասրտի ելունի փակում: Փակող սարքը նրբորեն ուղղորդվում է կաթետերի միջով դեպի պարկ: Սարքը տեղադրվելուց հետո կաթետերը հանվում է: Սարքը մշտապես մնաում է տեղադրման վայրում: Ձախ նախասրտի հավելվածը փակելու վիրահատությունը տարբերակ է որոշ մարդկանց համար, ովքեր արդեն ունեցել են սրտի վիրահատություն:

Հոդվածը տեղադրվել է՝ 02-04-2023 վերանայվել է՝ 24-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով