Գրադարան

Ուղեղային անևրիզմա. ախտանիշներ

Ուղեղային անևրիզմա. ախտանիշներ

Time Read 2 րոպե

Գլխուղեղային անոթների անևրիզմաների մեծ մասը, եթե չի պատռվել, ախտանիշներ չի առաջացնում:

Սա մասնավորապես ճիշտ է, եթե անրևրիզմաները փոքր են: Ուղեղային անևրիզմաները կարող են հայտնաբերվել պատկերային հետազոտությունների ժամանակ, որոնք նշանակվել են այլ հիվանդությունների ախտորոշման համար:

Այնուամենայնիվ, պատռված անևրիզմը շատ ծանր խնդիր է, որը սովորաբար առաջացնում է ուժեղ գլխացավ: Եվ, եթե չպատռված անևրիզման ճնշում է ուղեղային հյուսվածքը կամ նյարդերը, կարող են զարգանալ ցավ և այլ ախտանիշներ:

Պատռված անևրիզմա

Հանկարծակի, ուժեղ գլխացավը պատռված անևրիզմայի հիմնական ախտանիշն է: Այս գլխացավը մարդկանց կողմից հաճախ նկարագրվում է որպես ամենասոսկալի գլխացավը, որ երբևէ ունեցել են:

Բացի ուժեղ գլխացավից, պատռված անևրիզմայի ախտանիշները կարող են ներառել՝

  • սրտխառնոց և փսխում
  • պարանոցային կարկամություն
  • մշուշոտ տեսողություն կամ երկտեսություն (դիպլոպիա)
  • լուսազգայունություն (երբ ուժեղ լույսն աչքերի համար դառնում է անտանելի)
  • ցնցումներ
  • կոպի իջեցում (պտոզ)
  • գիտակցության կորուստ
  • շփոթվածություն:

«Արտահոսող» անևրիզմա

Որոշ դեպքերում անևրիզմայից կարող է լինել արյան թույլ արտահոսք: Երբ առաջանում է «արտահոսող» անևրիզմա, հաճախ դրան հետևում է ուղեղային անոթի ավելի ծանր պատռվածք: Արտահոսքերը կարող են առաջանալ անոթի պատռվածքից օրեր կամ շաբաթներ առաջ:

Ուղեղային անևրիզմայի արտահոսքի ախտանիշները կարող են ներառել՝

  • հանկարծակի, չափազանց ուժեղ գլխացավ, որը կարող է տևել մի քանի օր կամ մինչև երկու շաբաթ:

Չպատռված անրևրիզմա

Չպատռված ուղեղային անևրիզման կարող է ոչ մի ախտանիշ չունենալ, հատկապես, եթե փոքր է: Այնուամենայնիվ, ավելի մեծ չպատռված անևրիզման կարող է ճնշում գործադրել ուղեղային հյուսվածքների և նյարդերի վրա: Նման դեպքերում չպատռված ուղեղային անևրիզմայի ախտանիշները կարող են ներառել՝

  • ցավ մեկ աչքից վեր կամ աչքի ետևում
  • լայնացած բիբ (միդրիազ)
  • տեսողության փոփոխություն կամ երկտեսություն
  • դեմքի մի կողմի թմրածություն:

Ե՞րբ դիմել բժշկին

Դիմեք անհետաձգելի բուժօգնության եթե ձեզ մոտ ի հայտ է եկել հանկարծակի, չափազանց ուժեղ գլխացավ:

Եթե ​​դուք ինչ-որ մեկի հետ եք, ով գանգատվում է հանկարծակի, ուժեղ գլխացավից կամ կորցնում է գիտակցությունը կամ ցնցում ունի, զանգեք 1-03 և կանչեք շտապ օգնություն:

Հոդվածը տեղադրվել է՝ 24-11-2023 վերանայվել է՝ 24-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով