Քաղցկեղ. բարդություններ

Քաղցկեղ. բարդություններ

Ինչպես քաղցկեղը, այնպես էլ քաղցկեղի բուժումները կարող են առաջացնել տարբեր բարդություններ:

Քաղցկեղի կամ քաղցկեղի բուժման ամենատարածված բարդությունները ներկայացված են ստորև:

  • Ցավ. թեև ոչ բոլոր քաղցկեղներն են առաջացնում ցավ, սակայն կան հիվանդության այնպիսի տեսակներ, որոնք ուղեկցվում են տանջող քրոնիկ ցավերով: Նման դեպքերում բժիշկը կարող է նշանակել ուժեղ ցավազրկող դեղեր, այդ թվում՝ թմրաբեր ցավազրկողներ կամ ուղեգրել ցավի մասնագետի խորհրդատվության:
  • Հոգնածություն. քաղցկեղային ընդհանուր թուլությունը և հոգնածությունն ունեն բազմաթիվ պատճառներ: Ընդհանուր թուլություն կարող են առաջացնել նաև քաղցկեղի որոշ բուժումներ: Օրինակ, ինչպես քիմիոթերապիան, այնպես էլ ճառագայթային բուժումը հաճախ ուղեկցվում են ժամանակավոր ընդհանուր թուլության նշաններով, որոնք զգալի չափով մեղմանում են բուժումը դադարեցնելուց շաբաթներ անց:
  • Շնչարգելություն. նույնիսկ ոչ թոքային տեղակայան քաղցկեղները և դրանց բուժումները կարող են առաջացնել օդի պակասի զգացում և հևոց: Կան նման վիճակները մեղմացնող որոշ մոտեցումներ:
  • Սրտխառնոց. քաղցկեղն ինքնին և քաղցկեղի բուժման որոշ մեթոդներ կարող են առաջացնել սրտխառնոց: Բժիշկները հաճախ գիտեն, թե որ բուժումը կարող է նման կողմնակի ազդեցություն դրսևորել: Կան սրտխառնոցը կանխարգելող կամ մեղմացնող որոշ բուժումներ:
  • Փորլուծություն կամ փորկապություն. քաղցկեղը և քաղցկեղի բուժումը կարող են ազդել ձեր աղիների գործունեության վրա՝ առաջացնելով փորլուծություն կամ փորկապություն: Քննարկեք աղիների գործունեության բարելավման հարցրերը ձեր բժշկի հետ:
  • Քաշի կորուստ. քաղցկեղը և քաղցկեղի բուժումը կարող են առաջացնել նիհարում, իսկ ծանր դեպքերում՝ հյուծում (կախեքսիա): Քաղցկեղային բջիջները «գողանում» և յուրացնում են նորմալ բջիջների հասանելիք սննդանյութերը՝ թողներով վերջիններիս «քաղցած» վիճակում: Հաճախ սա կախված չէ այն հանգամանքից, թե ինչքան կամ ինչ տեսակի սննդամթերքներ եք օգտագործում և սննդի հետ ինչքան կալորիա եք ստանում: Դեպքերի մեծ մասում սննդով կամ ներերակային ճանապարհով ստացված լրացուցիչ սննդանյութերը չեն օգնում քաշի կորստի մեղմացմանը:
  • Քիմիական փոփոխություններ. քաղցկեղը կարող է շեղել ձեր օրգանիզմի քիմիական հավասարակշռությունը և բարձրացնել ծանր բարդությունների ռիսկը: Քիմիական անհավասարակշռության նշաններից են ավելցուկային ծարավի զգացողությունը, հաճախակի միզարձակությունը, փորկապությունը, շփոթվածությունը և այլն:
  • Գլխուղեղի և նյարդային համակարգի խնդիրներ. քաղցկեղային գերաճը կարող է սեղմել նյարդային հյուսակները՝ առաջացնելով ցավ կամ մարմնի որևէ շրջանի գործունեության խանգարում: Գլխուղեղը ներառող քաղցկեղները կարող են առաջացնել գլխացավեր և ինսուլտին նմանվող ախտանիշներ, օրինակ՝ մարմնի մի կեսի թուլություն:
  • Քաղցկեղի տարածում. զարգացող քաղցկեղը սկսում է տարածվել մարմնի այլ շրջաններ: Այն, թե ինչ արագությամբ և դեպի ուր կտարածվի քաղցկեղը, կախված է հիվանդության տեսակից և տեղակայումից:
  • Քաղցկեղի «վերադարձ». քաղցկեղի վիրահատական հեռացումը կամ այլ բուժումները չեն երաշխավորում, որ հիվանդությունը չի կրկնվի: Որոշ քաղցկեղներ հակված են ավելի հաճախ կրկնվելու, քան մյուսները: Քաղցկեղի «վերադարձը» հնարավորինս վաղ հայտնաբերելու համար բժիշկը խորհուրդ կտա որոշ հետազոտություններ, որոնք պետք է պարբերաբար անցնեք:

Հոդվածը վերանայվել է՝ 01-05-2021