Ցելյուլիտ․ կանխարգելում

Ցելյուլիտ․ կանխարգելում

Միշտ չէ, որ հնարավոր է ցելյուլիտը կանխարգելել, սակայն դուք կարող եք նվազեցնել հիվանդության զարգացման հավանականությունը։

Օրինակ, ցելյուլիտի առաջացման ռիսկը կարելի է կրճատել՝ նվազեցնելով ձեր մաշկի վնասվելու դեպքերը (քերծվածքներ, կտրվածքներ և այլն) և պահպանելով մաշկի պատշաճ հիգիենան։ Եթե ձեզ մոտ ախտորոշել են մաշկային որևէ հիվանդություն (օրինակ՝ գոտևորող որքին կամ էկզեմա), բժշկի նշանակումներին հետևելը և մաշկի ճիշտ խնամքը կարող են զգալիորեն կրճատել ձեզ մոտ ցելյուլիտի առաջացման հավանականությունը։

Մաշկի վարակի հիմնական պատճառը ձեռքի եղունգներն են և դրանցով մաշկը քորելը։ Այս համատեքստում, ձեռքերը կանոնավոր լվանալը և եղունգների ճիշտ խնամքը դառնում են խիստ կարևոր։ Ընդհանուր առմամբ, պատշաճ հիգիենան, օրինակ՝ ամենօրյա ցնցուղ ընդունելը և մաքուր ներքնաշոր կրելը կարող են օգնել, որ հնարավորինս նվազեցվի մաշկի շփումը բակտերիաների հետ։

Եթե ձեր մաշկը վնասվել է, պահեք առաջացած վերքը մաքուր՝ ամեն օր օճառաջրով կամ հականեխիչ լուծույթով մաքրելով այն։ Ծածկեք բաց վերքերը ստերիլ կպչուն վիրակապով (օրինակ՝ սանտավիկ)։

Եթե ունեք ձեր օրգանիզմի դիմադրողականությունը թուլացնող որևէ քրոնիկ հիվանդություն (օրինակ՝ դիաբետ) կամ ընդունում եք դեղեր, որոնք կարող են ճնշել ձեր իմունիտետը, ապա դուք պետք է առավել ուշադիր լինեք ձեր մաշկի հիգիենային և խնամքին, ինչպես նաև հաճախակի զննեք և ստուգեք ձեր ոտնաթաթի և մյուս շրջանների մաշկը՝ ուշադրություն դարձնելով նաև կոշտուկներին։ Ընդհանուր առմամբ, ցանկացած քրոնիկ հիվանդության լիարժեք վերահսկումն անշուշտ կնվազեցնի ցելյուլիտի առաջացման ռիսկը։

Ցելյուլիտը սովորաբար վարակիչ չէ, սակայն լվացեք ձեր ձեռքերն ամեն անգամ, երբ հպվում եք մաշկի ախտահարված շրջաններին։ Դա կարող է նվազեցնել վարակի հետագա տարածման հնարավորությունը։

Հոդվածը վերանայվել է՝ 02-02-2021