Ջրծաղիկ. բարդություններ

2 րոպե

Ջրծաղիկը սովորաբար թեթև ընթացքով հիվանդություն է:

Այնուամենայնիվ, որոշ դեպքերում ջրծաղիկը կարող է ստանալ ծանր ընթացք և հանգեցնել մի շարք բարդությունների, այդ թվում՝

• մաշկի, փափուկ հյուսվածքների, ոսկրերի, հոդերի կամ արյան բակտերիալ վարակներ (սեպսիս)
• ջրազրկում
• թոքաբորբ (պնևմոնիա)
• գլխուղեղի բորբոքում (էնցեֆալիտ)
• տոքսիկ շոկային համախտանիշ
• Ռեյի համախտանիշ, եթե ջրծաղիկի ընթացքում երեխաներին և անչափահասներին տրվել է Ասպիրին
• մահ:

Ովքե՞ր են բարդությունների ռիսկի խմբերում

Ջրծաղիկի բարդությունների ռիսկն ավելի բարձր է հետևյալ խմբերում՝

• նորածիններ, ում մայրերը երբեք չեն վարակվել կամ չեն պատվաստվել ջրծաղիկի դեմ
• անչափահասներ և չափահասներ
• երբևէ ջրծաղիկ չտարած հղի կանայք
• ծխող մարդիկ
• թուլացած իմունային համակարգով մարդիկ (օրինակ՝ քիմիոթերապիա ստացողներ, քաղցկեղ կամ ՄԻԱՎ ունեցողներ)
• մեկ այլ հիվանդության, օրինակ՝ ասթմայի կապակցությամբ ստերոիդ դեղամիջոցներ ընդունող մարդիկ:

Ջրծաղիկը և հղիությունը

Նորածնի ցածր քաշը և վերջույթների արատներն ավելի տարածված են այն նորածինների շրջանում, ովքեր ծնվել են հղիության վաղ փուլերում ջրծաղիկով վարակված մորից: Երբ հղի կինը ջրծաղիկով վարակվում է ծննդաբերությունից մեկ շաբաթ առաջ կամ ծննդաբերությունից հետո մի քանի օրվա ընթացքում, նորածնի մոտ նաև բարձրանում է ծանր և կյանքին սպառնացող վարակի զարգացման ռիսկը:

Եթե հղի եք և չունեք ջրծաղիկի նկատմամբ իմունիտետ, զրուցեք ձեր բժշկի հետ ձեզ մոտ կամ չծնված երեխայի մոտ հնարավոր վտանգների մասին:

Ջրծաղիկը և գոտևորող հերպեսը (որքին)

Եթե ունեցել եք ջրծաղիկ, բարձրանում է գոտևորող որքին (գոտևորող հերպես) կոչվող բարդության ռիսկը: Մաշկային վարակը լավանալուց հետո Varicella-zoster վիրուսը մնում է նյարդային բջիջներում և տարիներ անց կրկին ակտիվանում և ի հայտ է գալիս որպես գոտևորող հերպես՝ նյարդերի ուղղությամբ կարճ կյանք ունեցող, սակայն ցավ պատճառող բշտիկների խմբեր: Ավելի հավանական է, որ վիրուսը կրկին հայտնվի մեծ տարիքով չափահասների և թուլացած իմունային համակարգով մարդկանց մոտ:

Գոտևորող հերպեսին ուղեկցող ցավերը բշտիկային ցանի անհետացումից հետո կարող են պահպանվել երկար ժամանակ: Սա կոչվում է հետհերպեսային նևրալգիա և կարող է ստանալ ծանր ընթացք:

Գոտևորող հերպեսի պատվաստանյութը (Շինգրիքս) խորհուրդ է տրվում այն չափահասներին, ովքեր տարել են ջրծաղիկ: Այն խորհուրդ է տրվում 50 տարեկան և ավելի մեծ տարիքի մարդկանց, ներառյալ նրանց, ովքեր նախկինում ստացել են գոտևորող հերպեսի պատվաստում (Զոստավաքս): Զոստավաքսը խորհուրդ չի տրվում մինչև 60 տարեկան անձանց և ԱՄՆ-ում վաճառքից հանված է: